Улс төр
ЭНЭ ХҮН ХЭН ЮМ БЭ
Сүүлийн үед олон нийтийн сүлжээ, телевизийн хэдэн суваг, сонин хэвлэлийг харж суух нь ээ, Монгол оронд болж бүтэхгүй байгаа бүх зүйл нэг л хүнээс болоод байгаа юм даг уу даа. Хөл хорио хязгаарлалтын улмаас орлогогүй болсон, бизнес нь зогссон иргэддээ бизнесээ дэмжлэг болгон өрх бүрт сая төгрөг өгье гэснээсээ, луйварчдын ард түмнээс хулгайлж харьд нуусан мөнгийг эргүүлж авчиръя, түмэн олонд тараая гэдгээсээ болж эрх барьж буй улс намд, тэдний хөлсний бичээч нарт чичлүүлэх болсон тэр хүн чинь ингэхэд хэн юм бэ.
Тэр бол талх үйлдвэрлэгч
Монгол Улс зах зээлд шилжин хамаг үйлдвэрүүд дампуурч, үүд хаалгаа барьж эхэлсэн тэртээх 1990-ээд оны эхээр Талх чихрийн үйлдвэрийг хувьчилж авсан байдаг юм. Эдүгээ тус үйлдвэр 30 жилийн турш улаанбаатарчуудыг хөрч амжилгүй дэлгүүрийн лангуун дээр очих шинэхэн талхаараа дайлсаар ирсэн.
Тэр бол түмэнд танигдсан СЕО
“Баянгол” зочид буудлыг хувьчилж аваагүйсэн бол эдүгээ хотын төв дэх балгас нэг бус хоёр болсон байж ч мэднэ. Улс гүрэн хөгжиж буйн хэмжүүр нь зочид буудлаас эхэлнэ гэдгийг олж харсан нэгэн.
Тэр бол дэлхийд танигдсан уран бүтээлч
Энэ хүн мөн л дэлхийд хамгийн том морьтой хөшөө босгож Монголын аялал жуулчлалын салбарыг үзүүлэх юмтай болгосон менежер. Үнэндээ бидэнд саяхныг хүртэл ирсэн зочдынхоо нүдийг баясгах зүйл Хар хориноос өөр юу байсан юм бэ. Дэлхийн хамгийн том морьтой хөшөө, Чингис хааны хөшөө Монголд сүндэрлэсэн тухай мэдээлэл гадаадын хэвлэлийн хуудсаар түгэж харь орны бядан явагч хэн хүний ирж үзэхсэн гэх сэтгэгдлийг төрүүлж чадсан цогцолбор бол яахын аргагүй Цончинболдог.
Тэр бол хөндлөн тэнхлэгийн төмөр замын автор
Монгол Улс төмөр замтай хэдий ч хоёр улсын хувь нийлүүлсэн өмч. Харин үндэсний, өөрийн гэсэн төмөр замтай болох түүнээс олсон ашгаа бусадтай хуваалцах бус дангаараа хүртэх хөндлөн тэнхлэгийн төмөр замын автор нь мань хүн. Монгол Улсад хөндлөн тэнхлэгийн төмөр зам байгуулах төслийг анх санаачилж үүнийхээ төлөө өчнөөн хүнд чичлүүлэн байж үндэсний компаниуд, цэрэг дайчиддаа найдан эхлүүлснээр өнөөдөр хөн Цогтцэций-Зүүнбаян чиглэлийн 414 км зам ашиглалтад хүлээлгэн өгөх гэж буй төмөр замчин. Түүний санаачилж, хэрэгжүүлсэн төслийн ачаар Өмнөговь аймгийн Цогтцэций суманд 11, Дорноговь аймгийн Мандах сумын нутагт найм, Зүүнбаянд есөн аж ахуйн нэгж ажилчдаа ажилтай байлгаж цалин хөлс өгч байгаа бол Монголын Зэвсэгт хүчний дөрвөн ч ангийн гэрээт цэргийн албан хаагчид, офицерүүд орон сууцны урьдчилгаанд өгөх хэдэн төгрөгтэй болж чадсан.
Улс орон, иргэдийнхээ төлөө хийсэн, хийж байгаа бүхнийхээ төлөө МАН хэмээх улс төрийн том намын толгойны өвчин болж, энэ намын удирдлага, зүтгэлтэн, гишүүд, бичээч, сурталч нарыг өглөө бүрий босохдоо “За өнөөдөр юу гэж муу хэлж, юугаар нь дайруулан гүтгэх билээ” гэж шаналан сэрээдэг энэ хүн бол Монгол Улсын Төрийн тэргүүн Халтмаагийн Баттулга л даа.
Түмний төлөө дуугараад адлагддаг нэгэн
Нэг ч өдөр бизнес эрхлээгүй хэр нь ээ хилийн чинадад хэдэн арван саяар нь байршуулсан ам. Доллар, нуусан хөрөнгийг татан авчирч цар тахлын үеинй хөл хорио, хязгаарлалтад туйлдсан өрх бүрт тараая / өрх бүрт нэг сая төгрөг олгоё / гэсэн санаачилга гарган УИХ-ын дарга Г.Занданшатарт тогтоолын төсөл өргөн барьсан нөхөр бол мөнөөх л хүн. Ингэхдээ зүгээр ч нэг бэлэн мөнгө тоолоод өгчихгүй, 200 мянгыг нь бэлнээр, 800 мянгаар нь архи тамхинаас бусад, үндэсний үйлдвэрийн бүтээгдэхүүн худалдан авах ваучер хэлбэрээр олгоё хэмээсэн. Чухамдаа энэ нь айл өрхийнхөө амьжиргааг өөд нь татахын зэрэгцээ ажил бизнес нь дампуурах дээрээ тулаад жижиг, дунд үйлдвэрлэл эрхлэгчдээ дэмжих гэсэн алсын хараа байсан. Харамсалтай нь эрх баригч МАН-ынхан бас элдвээр хэлж, мөнгө байхгүй гэж ирээд шагшралдсан.
Тэр чимээгүй л байлаа
Монгол Улсаас АНУ-д суугаа Элчин сайд Ё.Отгонбаярыг алс мордохынх нь өмнө хүлээн авч уулзахдаа “Монголд үйлдвэрлэсэн оёмол бүтээгдэхүүнийг гаалийн татвараас чөлөөлөх, авлигатай тэмцэх тал дээр идэвхтэй ажиллаарай” хэмээн захисан байдаг. Харамсалтай ноён, Элчин сайд энэ талаар ямар ч ахиц дэвшил гараагүй, “Гуравдагч хөршийн худалдааны тухай” хуулийн төслийг АНУ-ын Хууль тогтоох байгууллагаар батлуулах талаар хангалттай санаачилга гаргаж ажиллаагүй. Иймд төрийн тэргүүний хувьд захиж хэлснээ сануултал МАН-ынхан ажил хийдэггүй нөхрөө өмөөрч улаан дээлэндээ багтахгүй болтлоо уурлаж бухимдан “ Элчин сайд маш сайн ажиллаж байгаа тул эргүүлж татахгүй” гэсэн хариуг барих нь тэр. Үүний шанд өнөөх Ё.Отгонбаяр нь намынхаа нэг зүтгэлтний хүүхдийг сургуульд оруулах гээд л хөөцөлдөж явна.
Тэр дуугүй л байгаа
Ж.Эрдэнэбат нь Ерөнхий сайдаар ажиллаж байхдаа ашигт малтмалын лицензүүдийг өөртөө хамаарал бүхий компаниудад гарын үсэг зураад авчихсныхаа төлөө хорих ялаар шийтгүүлсэн. Гэвч эрх ба-ригчдын даалгавраар хэргийг нь мөр-дөн байцаал-тад буцаасны хүчинд сул-лагдсан. Түү-гээр барахгүй энэ сарын 18-нд УИХ-ын гишүүний тангараг өргөсөн. Шоронгийн наараас төрийн ордонд залрах эрхээ олж авсан тэр өдөр Х.Баттулга төрийн тэргүүний хувьд УИХ-ын чуулганы нэгдсэн хуралдаан дээр “Холбогдоод байгаа эрүүгийн хэрэг нь шүүхээр шийдэгдээгүй байхад яаран сандран тангараг өргөх хэрэг байна уу” гээд УИХ-ын даргад “Уг хэрэг нь шүүхээр эцэслэн шийдвэрлэгдээгүй байхад Улсын Их Хурлын гишүүний тангараг өргүүлж, төрийн хамгаалалтад авч хаацайлах гэж буй явдлыг дэмжихгүй байна. Ж.Эрдэнэбат Улсын Их Хурлын гишүүний тангараг өргөснөөр хуулийн хамгаалалтад орж, холбогдсон гэмт хэргийг нь шударгаар шийдвэрлэж чадахгүйд хүрнэ” хэмээн Монголын төрөөс шударга ёсыг шаардсаныхаа төлөө дахиад л МАН-ын сурталчдын уурыг хүргэж үгийг нь барав.
Тэр дуугүй л суугаа
Бүр ердөө хоёр, гуравхан хоногийн өмнө дөө,ОХУ-аас манай оронд суугаа Бүрэн эрхт Элчин сайдыг хүлээн авч уулзаад Монгол Улс цар тахлын вакцин үйлдвэрлэх боломжтой гэдгийг онцолж, ОХУ-ын “Sputnik V” вакциныг Монгол Улсад үйлдвэрлэх боломжийг судалж, хамтран ажиллах саналыг Кремльд уламжилж өгөхийг хүсээдэхлээ.
Гадаад орноос корона-вирусын вакцин худалдан авна, хүн амаа дархлуужуулна гэж хэдэн арван тэрбум төгрөг төсөвлөчихөөд цагаа болохоор ДЭМБ-ын зөвшөөрсөн, зөвшөөрөөгүй хандивын вакциныг тусламжаар авч байхын оронд баталгаатай вакциныг эх орондоо үйлд-вэрлэвэл нэгдүгээрт хямд, нөгөө талаар био анагаахын шинжлэх ухаанаа хөгжүүлэх, эрдэмтдээ дэмжих гэсэн санаа л даа. Гэтэл эх орныхоо, хүчин чадал, эрдэмтэн судлаач, эмч мэргэжилтнүүдийнхээ чадвар чансааг мэдэхгүй хөлсний бичээчид бас л болж бүтэхгүй худал амлалт хэмээн шагшралдав.
Энэ хүн чинь тэгээд хэн юм бэ
Энэ хүн үү, энэ бол ганц өдөр ч бизнес эрхлээгүй атлаа эрбумтан болчихоод, тэр мөнгөөрөө бусдад найр тавин цүнхийг нь барьж гүйж, төр, улс орон, ард түмний өмч хөрөнгө, газар, уул уурхайг зарж борлуулан завшсан хөрөнгөөрөө засгийн албыг худалдан авдаг нөхдүүдтэй огт адилгүй л нэгэн. Тэр ганзгын наймаанаас хөл дээрээ босч, олон түмэнд хэрэгтэй тустай зүйл бүтээж амжсан л хүн.
Энэ хүн 15 жилийн өмнө улс төрд хөл тавьж, нутгийн олныхоо дэмжлэгийг хүлээн УИХ-д сонгогдон улмаар УИХ-ын Хүний эрхийн дэд хорооны даргаар ажиллаж байж. Дараа нь 2008 онд УИХ-ын гишүүнээр дахин сонгогдож, Зам тээвэр барилга хот байгуулалтын сайд, 2012 оноос УИХ-ын гишүүн Үйлдвэр худалдааны сайдаар ажилласан улстөрч.
Энэ бүхнээс үзвэл амьтны ад болоод байгаа энэ хүн монголчуудын ярьдгаар “биеэ засаад, гэрээ засчихсан, гэрээ засаад, төрөө засахаар яваа” монгол эр.
Монгол Улс улс төр нийгэм, эдийн засгийн шинэ тогтолцоонд шилжин тулж өнгөрүүлсэн гурван аравны талд нь хувийн бизнес эрхэлж, талд нь төрдөө зүтгэж улс орон, ард түмнийхээ төлөө ажилласан төрийн хүн.
Тэгэхээр энэ хүн бол улс төрийн шатарт хүү огтоос биш бод, бүр бэрс гарсан нөхөр. Тэр өнөөгийн зарим нэгэн шиг хэдэн хүний дээлийг солих, намынхаа дэмжигчдийг сая төгрөгийн төлбөртэйгээр нэг сар сургах тухай ярьдаг сайд биш.
Иймдээ ч тэр “боргосон нохой болгон руу эргэж ноцоод байдаггүй” гэж ярьдагчлан өөрийг нь бизнесменийх нь хувьд, улстөрчийнх нь хувьд хэлэх хэлэхгүй үгээр дайрч доромжилсон бүгд рүү эргэж хараад хариу илгээгээд байдаг шалчигнуур нөхөр биш.
Энэ хүн МАН хэмээх улс төрийн бүхэл бүтэн машиныг өөрийнхөө эсрэг хөдөлгөж, үндсэндээ ажиллуулж, олон нийтийн сүлжээ, хэвлэл мэдээллийн хэрэгслийн бичээч сэтгүүлчдийг ажилтай, орлоготой байлгаж байгаа сөрөг хүчин. Энэ хүн бол Монгол Улсын Ерөнхийлөгч Халтмаагийн Баттулга.
#МонголынМэдээСонин
Улс төр
Улс төрийн намын тухай хуулийг дагаж мөрдөх журмын тухай хуульд өөрчлөлт оруулах тухай хуулийн төслийг анхны хэлэлцүүлэгт шилжүүлэв
Улсын Их Хурлын 2024 оны намрын ээлжит чуулганы өнөөдрийн үдээс өмнөх нэгдсэн хуралдаан 10 цаг 06 минутад гишүүдийн 52.4 хувийн ирцтэй эхэлж, Улс төрийн намын тухай хууль /Шинэчилсэн найруулга/-ийг дагаж мөрдөх журмын тухай хуульд өөрчлөлт оруулах тухай хуулийн төслийн хэлэлцэх эсэхийг үргэлжлүүллээ.
Улсын Их Хурлын чуулганы 2024 оны 11 дүгээр сарын 28-ны өдрийн хуралдаанаар төслийн хэлэлцэх эсэх хэлэлцүүлгийг эхлүүлсэн бөгөөд өнөөдрийн хуралдаанаар санал хураалт явуулав. Чуулганы нэгдсэн хуралдаанд оролцсон Улсын Их Хурлын 68 гишүүний олонх дэмжив. Иймд анхны хэлэлцүүлэгт бэлтгүүлэхээр харьяалах Байнгын хороонд шилжүүллээ.
Дараа нь Цөмийн аюулгүй ажиллагааны тухай конвенц соёрхон батлах тухай хуулийн төслийн хэлэлцүүлгийг үргэлжлүүлж, соёрхон батлахыг дэмжих эсэхээр санал хураалт явуулахад санал хураалтад оролцсон гишүүдийн олонх дэмжив. Мөн Цөмийн материалыг биечлэн хамгаалах тухай конвенцын 2005 оны нэмэлт, өөрчлөлтийг соёрхон батлах тухай хуулийн төслийн хэлэлцүүлгийг үргэлжлүүлж, соёрхон батлахыг дэмжих эсэхээр санал хураалт явуулсан. Чуулганы нэгдсэн хуралдаанд оролцсон Улсын Их Хурлын 76 гишүүний 70 нь дэмжин, баталлаа. Бага хэмжээний цөмийн материалын шинэчилсэн протоколыг соёрхон батлах тухай хуулийн төслийн хэлэлцэх эсэх хэлэлцүүлэг 2024 оны 11 дүгээр сарын 28-ны өдрийн хуралдаанаар эхэлсэн бөгөөд өнөөдрийн хуралдаанаар санал хураалт явуулав. Чуулганы нэгдсэн хуралдаанд оролцсон Улсын Их Хурлын 76 гишүүний 90.8 хувь нь дээрх хуулийн төслийг соёрхон батлахыг дэмжлээ.
Монгол Улсын Их Хурлын чуулганы хуралдааны дэгийн тухай хуулийн 46 дугаар зүйлийн 46.1.3-т “Улсын Их Хурал энэ хуулийн 46.1.2-т заасан хууль, тогтоолын эцсийн найруулгатай танилцаж ёсчлохыг зөвшөөрөх” гэж заасны дагуу Цөмийн энергийн тухай хуульд нэмэлт, өөрчлөлт оруулах тухай хууль болон хамт баталсан хуулиудын эцсийн найруулгыг сонсов.
Монгол Улсын 2025 оны төсвийн тухай хууль болон хамт баталсан хууль, тогтоолд бүхэлд нь тавьсан Монгол Улсын Ерөнхийлөгчийн хоригийг Монгол Улсын Их Хурал хүлээж авсантай холбогдуулан хууль, тогтоолд нэмэлт, өөрчлөлт оруулах асуудал хэлэлцэх дэгийн тухай хуулийн төслийг хэлэлцэж, Ёс зүй, дэгийн болон Хууль зүйн байнгын хорооны хамтарсан санал, дүгнэлтийг Улсын Их Хурлын гишүүн Ч.Лодойсамбуу танилцууллаа.
Улсын Их Хурлаас 2024 оны 11 дүгээр сарын 08-ны өдөр баталсан Монгол Улсын 2025 оны төсвийн тухай хууль болон хамт баталсан хууль, тогтоолд Монгол Улсын Ерөнхийлөгч 2024 оны 11 дүгээр сарын 19-ний өдөр бүхэлд нь хориг тавьсныг Улсын Их Хурал 2024 оны 11 дүгээр сарын 22-ны өдөр хүлээн авсан.
Ёс зүй, дэгийн болон Хууль зүйн байнгын хорооны 2024 оны 11 дүгээр сарын 27-ны өдрийн хамтарсан хуралдаанаас Монгол Улсын Ерөнхийлөгчөөс Монгол Улсын 2025 оны төсвийн тухай хууль болон хамт баталсан хууль, тогтоолд бүхэлд нь тавьсан хоригийг Улсын Их Хурал хүлээн авсантай холбогдуулан хууль, тогтоолыг хэрхэн хэлэлцэх талаар санал боловсруулах үүрэг бүхий ажлын хэсгийг байгуулсан юм. Улсын Их Хурлын гишүүн Ч.Лодойсамбуу ажлын хэсгийг ахалж, бүрэлдэхүүнд нь Улсын Их Хурлын гишүүн А.Ариунзаяа, Д.Ганмаа, М.Нарантуяа-Нара, П.Сайнзориг, Ц.Сандаг-Очир, Х.Тэмүүжин, Г.Уянгахишиг, Б.Хэрлэн нар ажиллажээ.
Ажлын хэсэг 2 удаа хуралдаж, Монгол Улсын Их Хурлын чуулганы хуралдааны дэгийн тухай хуулийн 16 дугаар зүйлд заасан “Хуралдааны дэгээр зохицуулаагүй асуудлыг хэлэлцэх журам”-ыг баримтлан Монгол Улсын 2025 оны төсвийн тухай хууль болон хамт баталсан хууль, тогтоолд Монгол Улсын Ерөнхийлөгчөөс бүхэлд нь тавьсан хоригийг Улсын Их Хурал хүлээж авсантай холбогдуулан хууль, тогтоолд нэмэлт, өөрчлөлт оруулах асуудлыг хэлэлцэх дэгийн тухай хуулийн төсөл боловсруулан энэ сарын 28-ны өдөр Ёс зүй, дэгийн болон Хууль зүйн байнгын хорооны хамтарсан хуралдаанд танилцуулжээ.
Дээрх санал, дүгнэлттэй холбогдуулан Улсын Их Хурлын гишүүн Д.Батбаяр, Н.Наранбаатар, Л.Мөнхбаясгалан, С.Эрдэнэбат, Ц.Идэрбат, Х.Ганхуяг, Ж.Батжаргал, Д.Ганбат, Ц.Даваасүрэн, С.Амарсайхан, Д.Батлут, З.Мэндсайхан, М.Бадамсүрэн нар асуулт асууж, хариулт авсан. Гишүүд Монгол Улсын Их Хурлын чуулганы хуралдааны дэгийн тухай хуульд өөрчлөлт оруулан, Ерөнхийлөгч төсвийн тухай хуульд бүхэлд нь хориг тавьсан тохиолдолд шийдвэрлэх зохицуулалтыг тусгах нь зүйтэй гэдэг байр суурийг илэрхийлж, энэ талаар ажлын хэсгийн ахлагч болон Байнгын хороодын дарга нараас хариулт, тайлбарыг авсан юм. Түүнчлэн орон нутгийн төсвийн хэлэлцүүлгийн цаглавартай холбоотой тодруулгыг Сангийн сайдаас асууж, хариулт авсан.
Дараа нь Байнгын хороодын саналаар Монгол Улсын 2025 оны төсвийн тухай хууль болон хамт баталсан хууль, тогтоолд бүхэлд нь тавьсан Монгол Улсын Ерөнхийлөгчийн хоригийг Монгол Улсын Их Хурал хүлээж авсантай холбогдуулан хууль, тогтоолд нэмэлт, өөрчлөлт оруулах асуудал хэлэлцэх дэгийн тухай хуулийн төслийг эцэслэн батлахыг дэмжих санал хураалт явууллаа. Санал хураалтад Улсын Их Хурлын 81 гишүүн оролцож, 55 нь дэмжив. Монгол Улсын Их Хурлын чуулганы хуралдааны дэгийн тухай хуулийн 44 дүгээр зүйлийн 44.2-т “Нэгдсэн хуралдаанд хуулийн төслийг эцэслэн батлах санал хураалт явуулах бөгөөд Улсын Их Хурлын нийт гишүүний олонх дэмжсэн бол эцэслэн баталсанд тооцно” гэж заасан байдаг.
Хуулийн төсөл ийнхүү батлагдаагүй учир Улсын Их Хурлын дарга Д.Амарбаясгалан Монгол Улсын Их Хурлын чуулганы хуралдааны дэгийн тухай хуулийн 90 дүгээр зүйлийн 90.8, 90.9 дэх заалтыг баримтлан Ёс зүй, дэгийн болон Хууль зүйн байнгын хороо хамтарсан хуралдаанаа хийж, холбогдох асуудлыг хэлэлцэхийг даалгав. Үүгээр чуулганы үдээс өмнөх нэгдсэн хуралдаан завсарлалаа гэж Улсын Их Хурлын Хэвлэл мэдээллийн газраас мэдээлэв.
Улс төр
Хөгжлийн бэрхшээлтэй иргэдэд чиглэсэн бодлого, шийдвэр, үйл ажиллагааг бүх талаар дэмжинэ
Монгол Улсын Ерөнхийлөгчийн ивээл дор зохион байгуулж буй “Хөгжлийн бэрхшээлтэй иргэдийн хөгжил оролцоо-2024” үндэсний чуулган Төрийн ордонд эхэллээ.
Чуулганаар “Хөгжлийн бэрхшээлтэй иргэдийн хөгжил, оролцоог хангах төрийн бодлого, ололт амжилт, тулгамдсан асуудал”, “Эрх зүйн орчны шинэчлэл”, “Нийгмийн оролцоог хангахад иргэний нийгмийн байгууллагын үүрэг, хариуцлага,” “Тогтвортой хөгжилд хөгжлийн бэрхшээлтэй иргэдийн оролцоо-Олон улсын байгууллагын дэмжлэг, хамтын ажиллагаа” зэрэг сэдвийг хэлэлцэж, зөвлөмж гаргах юм.
Мөн салбар хуралдаанаар Хөгжлийн бэрхшээлтэй хүний эрхийг хангах зөвлөлийн үүрэг, оролцоо, төр, хувийн хэвшил болон төр, иргэний нийгмийн байгууллагын түншлэл, хамтын ажиллагааны талаар хэлэлцэнэ.
Үндэсний чуулганыг Ерөнхийлөгч Ухнаагийн Хүрэлсүх нээж хэлсэн үгэндээ, хөгжлийн бэрхшээлтэй иргэдийн эрх, хөгжил, хамгаалал, оролцоо нь Ерөнхийлөгч, төр, засгийн бодлого, үйл ажиллагааны тэргүүлэх чиглэл гэдгийг тэмдэглэлээ.
Хөгжлийн бэрхшээлтэй иргэдээ дэмжих, тэдний сайн сайхан амьдралын төлөөх аливаа бодлого, шийдвэр, санал, санаачилга, үйл ажиллагааг бүх талаар дэмжиж ажиллахаа илэрхийллээ.
“Тэрбум мод”, “Хүнсний хангамж, аюулгүй байдал”, “Цагаан алт”, “Эрүүл монгол хүн” болон “Хархорум хот” үндэсний хөдөлгөөнд хөгжлийн бэрхшээлтэй иргэдийн оролцоог нэмэгдүүлнэ гэдгээ хэлэв.
Манай улсад 111 мянга гаруй иргэн хөгжлийн бэрхшээлтэй. Эдгээрийн 84 хувь буюу 93 мянга нь хөдөлмөрийн насных хэдий ч 15 мянга нь л ажил хөдөлмөр эрхэлж байна.
Иймээс төрийн байгууллага, аж ахуйн нэгжүүд тэднийг ажлын байраар хангах хуулиар хүлээсэн үүргээ биелүүлэх, орлого, амьжиргааг нь сайжруулах, нийгмийн хамгаалал, боловсрол, эрүүл мэндийн үйлчилгээг чанартай, хүртээмжтэй хүргэх нь чухал байгааг тэмдэглэлээ.
Ялангуяа хөгжлийн бэрхшээлтэй иргэн бүрийг баялаг бүтээгч, үйлдвэрлэгч болгохын төлөө ажиллах, санхүүжилтээ нэмэгдүүлэх, онцлогт нь тохирсон ажил, хөдөлмөрийн шинэлэг хэлбэр, үйлчилгээг өргөжүүлэх шаардлагатайг онцлов.
Орон сууцны зээлийн нөхцөлийг сайжруулах, түрээсийн, нийтийн, амины орон сууцны хангамж, хүртээмжийг нэмэгдүүлэх, үйлдвэрлэлийн болон ахуйн осол, гэмтлээс шалтгаалсан олдмол хэлбэрийн хөгжлийн бэрхшээлтэй иргэдийн тоо жил ирэх тусам нэмэгдэж байгаад дүгнэлт хийж ажиллахыг Засгийн газарт чиглэл болголоо.
2017-2021 оны Засгийн газар Хөгжлийн бэрхшээлтэй хүний хөгжлийн газар, Хөгжлийн бэрхшээлтэй хүүхдийн сэргээн засах хөгжлийн төв байгуулах, Хараагүй хүмүүсийн хөдөлмөр, сургалтын үйлдвэрийг Хөдөлмөр, сургалт, хөгжлийн төв болгон өргөтгөх шийдвэр гаргаж байлаа.
Сүүлийн жилүүдэд ч тулгамдаж буй асуудлуудыг шийдвэрлэх чиглэлээр цөөнгүй арга хэмжээ хэрэгжүүлж байна.
Энэ хүрээнд нийгмийн халамжийн тэтгэвэр, тэтгэмжийг нь тодорхой хувиар нэмж, танхимын сургалт болон хөгжлийн үйлчилгээнд хамрагдах боломжгүй хөгжлийн бэрхшээлтэй хүүхдүүдийг дэмжих үйлчилгээг хөгжүүлэх, орон нутагт Хөгжлийн бэрхшээлтэй иргэний хөгжлийн төв, Хөдөлмөр эрхлэлтийг дэмжих төвүүдийг байгуулж байна.
Улс төрийн оролцоог нь нэмэгдүүлэхэд анхаарсны дүнд УИХ-д хөгжлийн бэрхшээлтэй иргэдийг төлөөлсөн хоёр гишүүн сонгогдсон. Мөн манай тамирчид Паралимпын наадмаас нэг алт, гурван мөнгөн медаль авсан нь хөгжлийн бэрхшээлтэй иргэдийн хөгжил, нийгмийн оролцоог нэмэгдүүлэх чиглэлд ахиц дэвшил, үр дүн гарч байгаагийн илрэл гэж Ерөнхийлөгч хэлсэн үгэндээ дурдлаа.
Дэлхийн улс орнууд ирэх сард тохиох “Хөгжлийн бэрхшээлтэй хүний эрхийн олон улсын өдөр”-ийг “Хүртээмжтэй, тогтвортой ирээдүйн төлөөх хөгжлийн бэрхшээлтэй хүмүүсийн манлайллыг нэмэгдүүлье” уриан дор тэмдэглэх юм.
Улс төр
Ерөнхий сайд Л.Оюун-Эрдэнэ Саудын Арабын Хаант Улс, Арабын Нэгдсэн Эмират Улсад ажлын айлчлал хийнэ
Монгол Улсын Ерөнхий сайд Л.Оюун-Эрдэнэ 2024 оны арванхоёрдугаар сарын 1-9-нд Саудын Арабын Хаант Улсын Эр-Рияд хотноо зохион байгуулагдах Цөлжилттэй тэмцэх тухай НҮБ-ын конвенцын Талуудын 16 дугаар бага хуралд (UNCCD COP16) оролцох үеэр Саудын Арабын Хаант Улс болон Арабын Нэгдсэн Эмират Улсад ажлын айлчлал тус тус хийнэ.
Ерөнхий сайд Л.Оюун-Эрдэнэ НҮБ-ын конвенцын Талуудын 16 дугаар бага хуралд тус хурлын дараагийн даргалагчийн хувиар оролцож, цөлжилт, уур амьсгалын өөрчлөлт, газрын доройтлын асуудлаарх Монгол Улсын Засгийн газрын байр суурийг илэрхийлж, үндэсний түвшинд хэрэгжүүлж буй бодлого, үйл ажиллагааг танилцуулахын зэрэгцээ НҮБ-ын Ерөнхий нарийн бичгийн даргын орлогч Амина Мохаммед, Цөлжилттэй тэмцэх тухай НҮБ-ын конвенцын Гүйцэтгэх нарийн бичгийн дарга Ибрахим Тио, НҮБ-ын Хөгжлийн хөтөлбөрийн захирагч Аким Штайнер нартай тус тус уулзаж, харилцаа, хамтын ажиллагааны асуудлаар санал солилцоно. Ерөнхий сайд Л.Оюун-Эрдэнэ мөн бага хурлын үеэр болох Усны дээд түвшний уулзалтад оролцож, Монгол Улсын байр суурийг илэрхийлнэ.
Монгол Улсын Ерөнхий сайд Л.Оюун-Эрдэнэ Саудын Араб, Эмират Улсад ажлын айлчлал хийх үеэр тухайн орнуудын удирдлагатай уулзаж, хоёр талын харилцааг хөгжүүлэх, эдийн засгийн агуулгаар баяжуулах, чингэхдээ хот бүтээн байгуулалт, цахим хөгжил, хиймэл оюун ухаан, төрийн үйлчилгээ зэрэг салбарт хамтын ажиллагааг өргөжүүлэх асуудлаар дэлгэрэнгүй санал солилцоно.
-
Нийгэм11 цаг өмнө
Т.Дүүрэнг нэг сарын хугацаагаар цагдан хорилоо
-
Нийгэм6 цаг өмнө
Авто замын салбарын өвөлжилтийн бэлтгэл 100 хувь хангагджээ
-
Нийгэм10 цаг өмнө
12 дугаар сарын 1-нээс техникийн үзлэг, оношилгоонд ороогүй, татвар төлөөгүй, торгуультай тээврийн хэрэгслийг замын хөдөлгөөнд оролцуулахгүй
-
Улс төр13 цаг өмнө
Ерөнхий сайд Л.Оюун-Эрдэнэ Саудын Арабын Хаант Улс, Арабын Нэгдсэн Эмират Улсад ажлын айлчлал хийнэ
-
Нийгэм14 цаг өмнө
СХД-ийн хэмжээнд 749.5 тонн давсны нөөцтэй байна
-
Нийгэм7 цаг өмнө
Улаанбаатар хотын Ерөнхий менежерийн 23 дугаар шуурхай зөвлөгөөн боллоо
-
Эдийн засаг13 цаг өмнө
“Тэнгэр даатгал” ХХК-ийн хувьцааны анхдагч зах зээлийн арилжааг нээх цан цохих ёслол боллоо
-
Улс төр10 цаг өмнө
Хөгжлийн бэрхшээлтэй иргэдэд чиглэсэн бодлого, шийдвэр, үйл ажиллагааг бүх талаар дэмжинэ