Говьд байдаг нэг жуулчны бааз люкс гэр өглөөний цайтайгаа хоногийн 350 ам.доллар гээд зар сурталчилгаагаа олон нийтийн сүлжээнд байрлуулж. Ийм мөнгө төлсөн гадаадын жуулчин тэр эзгүй цөлд юу үзэх юм бол. Яахав элс, гүрвэл, магадгүй Ёлын ам гээд үзэх юм бишгүй л байгаа байх л даа.

Жилдээ хэдэн сая жуулчин хүлээж авдаг, үзэж харах эртний дурсгал энэ гээд юм ихтэй Тайланд улсад “Novotel-ийн энгийн өрөө 82 ам.доллар гэхэд ийм үнэтэй буудалд хэн ордог юм гээд одтой зочид буудлын өрөө дунджаар 60, энгийн өрөөнүүд нь 30 орчим ам.доллар байдаг. Ингэж байж энэ улс жуулчин татдаг, Гэтэл манайд эзгүй хээр таван ханатай гэр 200 доллар гэх юм” хэмээн тэнд амьдардаг монгол хүн бичиж байна. Иймдээ ч коронавирусын цар тахал дэгдээд байсан 2021 оны эхний таван сард Тайланд улс 239,2 мянган жуулчин хүлээж авч байж.

Ер нь ганц энэ ч биш Тэрэлж дэх амралтын газрууд мөн л хоногийн 300-350 мянган төгрөгийн ханштай болсон талаар хүмүүс ярьж бичиж байна.

Коронавирсуын цар тахлын дэгдэлт, хөл хорио, хязгаарлалтын үед жуулчны бааз, амралтын газрууд үйлчлүүлэгчгүй байж санхүүгийн хувьд хямарсан нь үнэн. Гэхдээ алдагдлаа ингэж нэг амьсгаагаар нөхнө гэвэл харин ч эсрэгээрээ аялагч жуулчлагчдын өмнө хаалгаа тас хаасантай адил болмоор. Яахав, Тэрэлж нэг хоёр гээд тансаг газруудад манай эрх баригчид, олигархиудын хүүхдүүд бөөнөөрөө очиж наргиж цэнгэж тансаглан, хар тамхиа татацгаж аав ээжийнхээ гараа ч хөдөлгөлгүйгээр олсон мөнгийг гарын салаагаар урсгадаг байж болох.

Гэхдээ л сүүлийн жилүүдэд хүрээгээ тэлэн эх орныхоо байгалийн сайхан газруудаар гэр бүлээрээ аялж амардаг дотоодын эгэл жуулчид, аялагчдынхаа боломжийг жуулчны энэ баазууд хэт өндөр үнээр хааж байгаа юм биш үү. Дэлхийн аялал жуулчлалын байгууллага коронавирусын цар тахлын дараах аялал жуулчлалын гол трэндийг дотоодын аялал жуулчал гээд зарлачихсан байхад ийм үйлчилгээ аялагчдыг татах уу.

Хувийнхаа машинд бензин хийгээд, хоол хүнсээ тээгээд явж байгаа нэг гэр бүлийнхэн, найз нөхөд хэдэн хоног хээрээр гэр хийн майхан сав барьж яваад нэг хоног буудалд буугаад, ус цасанд орж тавтай амраад явъя гэхэд өөдөөс нь ийм үнэ хэлбэл, юм бүхний үнэ өсч эдийн засгийн хүндрэлд ороод байгаа хүмүүс хоногийн 200-300 долларыг төлж дийлэх  үү.

Эдийн засгийн хямрал, үнийн өсөлт ганц манай оронд ч биш, дэлхий нийтийг хамарч хаа сайгүй халаасаа тэмтэрч байхад гаднаас ирэх ганц нэг жуулчин нь хоногийн 350 доллар төлөөд үзэж харах ч юм юуч үгүй, талын салхинд зүгээр л илбүүлээд буцах уу. Энэ жилийн жуулчны түрүүч японы хоёр иргэн халаасандаа нэг ч долларгүйгээр явган мацаж яваа чинь нэгийг хэлээд байна биш үү.

Монгол Улсын Ерөнхий сайд Л.Оюун-Эрдэнэ 400 сая жуулчин хүлээж авна гээд зарлачихсан, үүнд бэлтгээд өөрийнхөө хөшөөг нутагтаа босгочхоод байхад жуулчны бааз, амралтын газрууд нь ингээд байвал тэр олон жуулчин гадаадаас ирэх үү. Угтан авагчаас нь ор хоногийн үнийг нь асуучхаад гараад голын эрэг дээр майхнаа босгоод түүдэг асаагаад суух байлгүй.

Хоёр жил хөл хорионд байсан би ч гэсэн энэ зун аятайхан амралтад ганц нэг хоноё уу гэж бодож байсан, бэнчин хүрэхгүй юм байна, болихоос…..