Нийгэм
Эмчийг луйвардсан хэрэг хэрхэн шийдэгдэх бол…
Сүүлийн үед шуугиан тариад байгаа нэгэн хэргийн давж заалдах шатны шүүх хурал өнөөдөр болно. Энэ нь Монгол Хьюндай эмнэлэг, Ким Бусоб эмчийг Монголын эмч нар хэрхэн луйвардсан хэрэг юм. БНСУ-ын Намянжу хотын Хьюндай эмнэлгийн захирал Ким Бусоб 2013 оноос Монголд ирж, гэмтлийн эмнэлэгт үе мөчний хагалгаа хийж байгаад үзүүлэх өвчтөн олширсон тул Гэмтэл согогийн эмнэлгийн эмч Д.Мөнхбатаар удирдуулан “MBC med” эмнэлгийг Баянгол дүүрэгт байгуулсан. Гэвч Д.Мөнхбат эмч гэр бүл, найзын хамт анхны өдрөөсөө эхлэн зорилготойгоор солонгос эмчийг луйвардах ажлаа эхлүүлж, Ким Бусоб эмчийн эмнэлгийг “MBG med” хэмээн нэг үсгийг өөрчлөн залилж авсныг Баянгол дүүргийн анхан шатны шүүх тогтоож луйврын гэмт хэрэг үйлдсэнийг тогтоосон байна. Харин харамсалтай нь Д.Мөнхбатад 10 сая төгрөгийн торгууль ногдуулан хэргийг хаах гэж байгаа нь дэндүү шударга бус, хүлээн зөвшөөрөх аргагүй тул давж заалдах шатны шүүхэд ханджээ.
Монгол Улсын Засгийн газар, Хууль зүй, дотоод хэргийн сайд Х.Нямбаатар гадаадын хөрөнгө оруулагч нарыг луйвардаж, дээрэмдэх явдлыг таслан зогсоохоо мэдэгдэж, ийм төрлийн 50 гаруй хэрэг шүүх, хуулийн байгууллагад шалгагдаж байгааг онцолж байсан. Дээрх хэрэг яг ийм төрлийн гадны хөрөнгө оруулагчийг дээрэмдсэн, залилсан хэргийн том жишээ. Монголын шүүхэд итгэл алдалгүй дахин давж заалдсан солонгос эмчийн луйвардуулсан хэргийг шударгаар шийднэ гэсэн хүлээлт байна.
Нийгэм
Авто замын салбарын өвөлжилтийн бэлтгэл 100 хувь хангагджээ
Зам, тээврийн хөгжлийн төв ТӨҮГ-аас 2024-2025 оны өвөлжилтийн бэлтгэл ажлыг хангах 11 арга хэмжээ төлөвлөснөө 100 хувь бүрэн хангалаа.
Улсын чанартай авто замын халтиргаа гулгаа үүсдэг хэсэг, зам, даваанд ашиглах хуурай элс, үнс, давсыг нөөцлүүлэх, шуурхай ажлын хэсэгт ажиллах машин механизмын засвар үйлчилгээг хийлгэж, бэлтгэж, хэрэгжилтэд нь хяналт тавин ажиллаж байна гэж Зам, тээврийн яамнаас мэдээллээ.
Нийгэм
Улаанбаатар хотын Ерөнхий менежерийн 23 дугаар шуурхай зөвлөгөөн боллоо
Улаанбаатар хотын Ерөнхий менежерийн 23 дугаар шуурхай зөвлөгөөн өнөөдөр болж, Улаанбаатар хотын Ерөнхий менежер бөгөөд Захирагчийн ажлын албаны дарга Г.Батзориг зөвлөгөөнийг удирдан явууллаа.
Шуурхай зөвлөгөөнөөр Улаанбаатар хотын Ерөнхий менежерийн 22 дугаар шуурхай хуралдаанаар өгсөн үүрэг даалгаврын хэрэгжилтийн явцыг Хяналт, үнэлгээний газрын дарга Ц.Рэгзэдмаа танилцууллаа.
Хуралдааны дэгийн дагуу өвөлжилтийн бэлтгэл, давс бодисын нөөцлөлт болон хадгалалт хамгаалалтын нөхцөлийг сайжруулах хүрээнд авч хэрэгжүүлсэн арга хэмжээний талаарх мэдээлэл, инженерийн хангамжийн байгууллагуудын бэлэн байдлыг хангах команд штабын дадлага сургуулилтын үр дүн, ус хангамж, ариутгах татуурга, инженерийн шугам сүлжээний өргөтгөл шинэчлэл, төсөл хөтөлбөрүүдийн хүрээнд 2025 онд хэрэгжүүлэх ажлын төлөвлөлт, сургууль цэцэрлэгүүдийн халаалт, нүүрсний нөөцлөлт, бэлэн байдалд явуулсан үзлэг, нөхцөл байдлын талаарх мэдээлэл, хяналтын камерыг нэмэгдүүлэх, удирдлагын төвийг бий болгох чиглэлээр хэрэгжүүлж буй үйл ажиллагааны талаарх мэдээллийг холбогдох газрын удирдлагууд танилцуулж авч хэрэгжүүлэх арга хэмжээг хэлэлцлээ.
Улаанбаатар хотын Ерөнхий менежер Г.Батзориг дүүрэг бүр хүлээсэн үүргийн дагуу цэвэрлэгээ үйлчилгээний ажлыг эрчимжүүлж дүүргийн харьяанд байгаа үйлчилгээний байгууллага, төлбөртэй зогсоолууд, томоохон зах худалдааны төвүүдэд хяналт хийж 50 метрийн цэвэрлэгээ үйлчилгээг байнга хийх дадлыг бий болгоход анхаарч, хариуцлагагүй, зөвшөөрөлгүй үйл ажиллагаа явуулж буй аж ахуй нэгжийн хяналтыг сайжруулахыг анхаарууллаа.
Мөн хот нийтийн аж ахуй чиглэлээр ажиллаж байгаа техникийн хяналтыг сайжруулахад технологийн шийдлийг ашиглаж ажиллахыг чиглэл болгож, инженер хангамжийн чиглэлээр 3, хог хаягдал, менежментийг сайжруулах чиглэлээр 7, тохижилт ногоон байгууламжийн чиглэлээр 2, нийт 12 үүрэг даалгаврыг холбогдох чиг үүргийн байгууллагуудад өгч ажиллалаа гэж Улаанбаатар хотын Захирагчийн ажлын албанаас мэдээллээ.
Нийгэм
Монгол үндэсний бөхийн багийн халз барилдаан болно
“Хийморь” төслийн хүрээнд зохион байгуулж буй дэлхийн хүчтэнүүд монгол үндэсний бөхөөрөө барилдах “Жүдо бөх болон Чөлөөт бөх”-ийн хоорондох монгол үндэсний бөхийн багийн халз барилдаан зохион байгуулагдах гэж байна.
1999 онд зохион байгуулагдсан тус барилдаан тэнцээгээр өндөрлөсөн бол ийнхүү 25 жилийн дараа энэ цагийн хүчтэнүүд хайнааг хагалах гэж байна.
“Жүдо бөх болон Чөлөөт бөх”-ийн хоорондох монгол үндэсний бөхийн багийн халз барилдаан 2024 оны 12 дугаар сарын 15-ны 13:00 цагт Монгол бөхийн өргөөнд болно гэж Монголын Үндэсний Бөхийн Холбооноос мэдээллээ.