Амралт зугаалгын улирал эхэлж архидан согтуурах явдал газар авсныг ганцхан жишээнээс харж болох нь. Бидний ярьж заншсанаар “Баасан гарагийн их уулт”-ын үеэр цагдаагийн байгууллагаас шөнийн хяналт хийжээ. Тодруулбал,  зургадугаар сарын 10-ны өдрийн 22:00 цагаас 11-ний өглөөний 06:00 цаг хүртэлх найман цагийн хугацаанд “Зөвийг хэвшүүлье” уриатайгаар “Уусан бол бүү жолоод” арга хэмжээг  улс даяар зохион байгуулсан байна.

Энэ үеэр нийт 655 жолооч согтуугаар авто машин жолоодож яваад баригдав. Архи уусан үедээ авто машинтай “жирийлгэсэн” нөхдүүд Улаанбаатар хотод 366, орон нутаг 289 байж. Ганцхан шөнө, найман цагийн хугацаанд тэднийг илрүүлж бусдын болон өөрийнх нь амь нас, эд хөрөнгийг авран хамгаалж болзошгүй аюулаас урьдчилан сэргийлсэн байна. Үүнээс гадна тээврийн хэрэгсэл жолоодох эрхгүй хөдөлгөөнд оролцож явсан зөрчил нийслэлд 63, орон нутагт 176 илэрчээ.

Зөвхөн энэ оны эхний таван сарын байдлаар Цагдаагийн байгууллагын хяналт шалгалтаар согтуугаар тээврийн хэрэгсэл жолоодсон 22 мянга 95 зөрчил  илрүүлсэн дүн мэдээ бий. Тэгвэл улсын хэмжээнд согтуугаар тээврийн хэрэгсэл жолоодсоны улмаас  541 зам тээврийн осол бүртгэгдэж 43 хүний амь нас хохирсон аж.

Энэ бол аюулын харанга дэлдэж буй тоо баримт. Тайван цагт элдэв баяр ёслол тэмдэглэж яваад амь насаа алдах явдал тасрахгүй, улам нэмэгдэх шинжтэй болж буй нь харамсалтай. Өнөөдөр дайн тулаан болж буй дэлхийн халуун цэгт ч ийм олон хүн амь насаа алдсан тоо баримт тэр бүр гардаггүй.

Иймд хөдөлгөөнд оролцогч та дээрх нөхцөл байдалд дүгнэлт хийн өөрийн болон бусдын амь нас эрүүл мэнд, эд материалд хохирол учруулж болзошгүй эрсдэл өдөр тутамд байгааг ухамсарлаж өөрөө үлгэрлэн хэн нэгний буруу үйлдлийг таслан зогсооход таны оролцоо, хамтын ажиллагаа чухал гэдгийг  анхаарна уу. Өнөөдөр монголчууд бид “цагдаа л байхгүй бол, бас таарахгүй бол болчихно”  гэсэн муйхар зангаар нэг хундага архи ууснаа цагаатган бодох, тэгээд  автомашин жолоодоод явдгаа болих хэрэгтэй.

Дуудлагын жолооч, такси үйлчилгээ гээд баярлаж наргисан жолооч нар минь санаа амар  гэртээ хүргүүлэх боломж бишгүй дээ л бий.  Дуудлагын жолоочийн үйлчилгээнд мэргэшсэн найдвартай газрууд ч олширсон. Хот дотор нэг цагийн 20 мянган төгрөгийн үйлчилгээний хөлс авдаг гэж байгаа. Бүр 30 мянга байсан ч яахав. Ганц “гожин” юмны л үнэ. Уухдаа харамлаагүй бол харихдаа бас харамлах хэрэг байна уу. Өөрийн болоод өрөөлийн амь нас, эд хөрөнгөөр дэнчин тавиад ухаан мэдрэлгүй явснаас найдвартай үйлчилгээ аваад зохих хөлсийг нь төлсөн  нь дээр гэдгийг ухаарахгүй байгаа нь харамсалтай.

Уг нь заавал эрсдэл дагуулсаны дараа ойлгох асуудал биш сэн. Ууж идэх, баяр ёслол тэмдэглэх гэж байгаа бол унаа тэргээ эхнээсээ зохицуулаад явчихвал болох бус уу. Согтуу жолоочийн балагт хэргийн талаарх мэдээлэл цахим орчин, зурагт гээд бүхий л хэвлэлээр их гардаг. Гэсэн хэдий ч бид үүнд дүгнэлт хийж тэр алдааг нь давтахгүй байх чадваргүй  юм гэж үү. Сүүлийн хоёр жилийн хугацаанд  коронавируст цар тахлын хөл хоройны улмаас монгол түмэн наадамдаж чадаагүй. Харин энэ жил өргөн дэлгэр наадамлах шинжтэй. Аймаг сумдын тэгш ойн баярын хөтөлбөрүүд ч гараад эхэлж. Аливаа баяр, наадмын үеэр согтуу жолоочийн тарьсан балаг, хурд хэтрүүлсэнээс үүдсэн  эмгэнэлт хэргийн талаарх мэдээлэл хөвөрдөг нь харамсалтай. Тэгэхээр “Уусан бол бүү жолоод” арга хэмжээг  улс орон даяар цаашид тогтмол, ядаж наадам өнгөртөл хэрэгжүүлээд үзвэл түүнийг дэмжих иргэн захаас аваад буй гэдэгт эргэлзэхгүй байна.  Иймд энэ бүгдэдээ дүгнэлт хийж ууж идэхээ зохицуулаад амар тайван амарч, зугаалж наадацгаая.