Нийслэлд нэг өдөр хэдхээн минутын бороо орсон чинь хот бүхэлдээ үерт автав. Олон нийтийн сүлжээгээр иргэд Нийслэлийн засаг дарга, Улаанбаатар хотын захирагч Д.Сумъяабазарын  хот доторхи усан зам энэ юм уу хэмээн доог тохуу хийж байна.  Миний хувьд ч бас хотын дарга эрхэм Туул голыг татаж нийслэл хот дундуураа урсгана гэсэн нь биелж байгаа юм байх гэж бодов. Харамсалтай нь нийслэлийн засаг даргын усан зам гэр хорооллын хамаг л хог хаягдал, үнс нурам, хуванцар сав энэ тэрийг хотын төв рүү, хотын даргын  хэлээд байсан усан зам руу туугаад авчрах нь тэр.

Тэгээд ч нийслэлийн иргэд таны байгуулах усан замд зорчихоор завь, тансаг хөлөг онгоцоо худалдан авч бэлтгэж амжаагүй  байхад Нийслэлийн Засаг дарга, Улаанбаатар хотын захирагч маань усан замаа нээчихсэнд тулгамдсан иргэд зам хөндлөн гарч чадахгүйгээр үл барам, зарим айл, хороолол усанд автаж энд тэнд хаягдсан хог хаягдал усан замаар минь урсч төвөг удав.

Эндээс юу харагдав гэхээр юун түрүү манай хотын эрх баригчид энэ гудамж талбайнхаа ус зайлуулах шугамыг сайжруулж ажилд оруулах хэрэгтэй юм байна, тэгэж байж усан замаа нээх хэрэгтэй юм байна. Жилийн жилд л жаахан бороо орохоор иргэд нь гудамжаар зорчиж, гарц шугамаар зам хөндлөн гарч  чадахаа байгаад, гудамжаар явж байсан машин нь үерийн усанд хөвөөд эхэлдэг энэ байдлыг хотын эрх баригчид анхааралдаа авах цаг болсон нь яах аргагүй харагдаж байна.  Хотын гудамжинд зүв зүгээр болоод байсан замыг засч бродюрыг нь солин  ах дүү хамаатан садандаа  хөрөнгө оруулж, мөнгө угааж  байхын оронд гудамж талбайнхаа ус зайлуулах  шугам хоолойг  засаад, шинээр тавьчихвал мөн ч их буян болмоорсон.

Хэдхэн минут орсон борооноор үүссэн энэ их үерийн ус нь нийслэлийн гэр хорооллын хамаг л хог хаягдал, нүхэн жорлонгийн ялгадас бүхнийг хамаад ирж байгаа нь саяын үерээр Сонгинохайрхан дүүрэгт хуримтлагдсан үер уснаас харагдлаа. Энэ нь нийслэлийн оршин суугчдын агаар амьсгалаар дамжин эрүү ахуйд нь ямар их хор хөнөөл учруулж байгааг таашгүй.

Бидэнд харагдаж байгаа нь л урсаал ирсэн энэ олон хуванцар сав, цаас хог болов чиг урсаад ирж байгаа энэ их усанд хотын гэр хорооллынхны  үнс нурмаас эхлүүлээд бие засах газар, ил жорлонгийнх нь ялгадас тэр чигээрээ халиад ирж байгаа.

Ийм байхад Нийслэлийн засаг даргын тамгын газар, Хот тохижилт үйлчилгээний газар жил бүр гудамж замын хашлага, бродюрыг солих, өмнө жил зассан чанаргүй замаа дахин засч мөнгө угааж, ажил хийсэн нэр зүүж байхын оронд нийслэлийнхээ инженерийн шугам сүлжээ, ус зайлуулах шугамыг хотын доорхи хот болох хонгил зэргийг засч байгуулах  ажлыг дэс дараатайгаар хийвэл эрх баригч энэ нөхөд  биш юмаа гэхэд монголын, энэ нийслэлийн хойч үеийнхэнд амьдрах таатай орчин нөхцөл бүрдмээр  биш үү.

Нийслэл хотдоо дүүжин зам, метро, усан тээвэр  байгуулна гэж том том ярихын оронд эхний ээлжинд хотынхоо гудамж талбайн ус зайлуулах шугам хоолойг шинэчлэн сайжруулчихвал жилийн жилд хур уснаар ард иргэд нь  гутлаа тайлан нэг нэгнээ үүрч, үгүй зарим нь уртын харайлтаар харайж байхгүй л болохсон.