Хийж бүтээх хүсэл эрмэлзмээр дүүрэн хөдөлмөрч эмэгтэйчүүдийг онцолдог “БҮТЭЭЛЧ ЭЭЖ” цувралдааГ.Хонгорзулыг урьсан юм. Олон улсын харилцааны мэргэжлээр их сургууль дүүргэсэн тэрбээр ой зургаан сартай хүүхдээ харахын хажуугаар бяцхан үрсэд зориулж хүүхэлдэй нэхдэг. Арван жилд суралцаж байхдаа хөдөлмөрийн хичээлд илүү сонирхолтой байсан нь энэ ажлыг хийх эхлэлийг тавьжээ.

“Наймдугаар ангид байхдаа нэхэхийг сурсан. Хүүхдийн оймс, ороолт, аяганы суурь зэргийг нэхдэг байлаа. Дүү нараа баярлуулах гэж анх тоглоом нэхэж эхэлсэн. Анх нэхсэн тоглоом маань хүүхэлдэй. Урт улаан үстэй. Нээх том толгойтой туршилтын бүтээл болсон. Толгой нь биендээ хүндэдсэн” хэмээн нүүрэндээ мишээл тодруулан ярив. Анх хийж буй бүхэнд алдаа оноо зэрэг дэнслэгддэг. Тиймээс хийж буй ажилдаа чин сэтгэлээсээ хандах хэрэгтэй. Ах эгч нарынхаа хүүхдэд зориулж, хүүхэлдэйн киноны баатрууд болон амьтдыг нэхэж бэлэглэдэг байсан нь өдгөө түүний амьдралын салшгүй нэг хэсэг болжээ.

Аливаа ажлыг хийх тусам сайширч арга барилаа олдог. Сошиол орчноос бичлэг үзэж, хэрхэн яаж нэхэх талаар суралцахаас гадна зураг харж, схем гаргаж, тоолж нэхдэг байна. Дэгээ зүүгээр нэгбүрчлэн нэхдэг учир ажиллагаа ихтэй. Толгой, их бие, гар хөл, чих, зэрэг бүгдийг нь тус тусад нь нэхэж, дараа нь холбон оёж, хувцсыг нь өмсүүлснээр түүний бүтээл дуусна.“Хүүхдэд зориулж тоглоом нэхэж байгаа болохоор сайн сайхан зүйл бодоод хийдэг. Оюун санаа маань цэгцрээд ямар бүтээл болох бол гэж их догдолно. Энэ ажилдаа их дуртай” гэв.

Хүүхэлдэй урладаг тэрбээр Турк улсаас зориулалтын утсыг захиж авчруулдаг учир хүүхдийн биед ямар нэгэн сөрөг нөлөөгүй. Нэг тоглоомыг 1-3 өдрийн хугацаанд нэхдэг ба хэлбэр хэмжээнээсээ шалтгаалаад 10-50 мянган төгрөгийн үнэтэй. Үүнээс гадна үйлчлүүлэгч түлхүүрийн оосор болон төрөл бүрийн амьтны дүрс бүхий тоглоомыг нэхүүлэх боломжтой. “Одоогоор 10төрлийн нийт 30 гаруй тоглоом нэхсэн. Цаашид төрлөө нэмнэ. Хийж эхлээд удаагүй учраас хүмүүс төдийлөн мэддэггүй. “Хонгорхон үрс хүүхдийн тоглоом” гэсэн пэйж хуудсаар захиалга авдаг. Өнгө үзэмж, эдэлгээ сайтай. Ирээдүйд нэхмэл тоглоомын дэлгүүртэй болохыг мөрөөддөг” гэв.

Хүсэл мөрөөдлөө биелүүлэхээр хөдөлмөрлөж буй бүсгүй хөвгүүдийн дуртай хүүхэлдэйн киноны баатар хүн аалз, unicorn зэргийг урлаж бяцхан үрсийг баярлуулдаг байна.