Газрын кадастрын мэдээллийн нэгдсэн санд 1,054,266 иргэн, хуулийн этгээдийн эзэмшил, ашиглал, өмчлөлийн газар бүртгэлтэй байдаг. Гэвч улсын хэмжээнд 598 мянга гаруй нэгж талбар зөрчилтэй байгаа юм.  Зөрчилтэй газрууд  гэдэг нь баталгаажаагүй гэсэн үг аж. Тодруулбал, газрын захирамж шийдвэр гарсан хэдий ч бүртгэгдээгүй газрууд байдаг бөгөөд эдгээрийг мэдээллийн нэгдсэн санд бүртгэх ажил улсын хэмжээнд эхлээд байна. Газрын нөхөн бүрдүүлэлт ирэх тавдугаар сарын 1-нийг дуустал үргэлжлэх юм.

Иймд газар эзэмшигч, өмчлөгч, ашиглагч иргэн аж ахуйн нэгж байгууллагын газрын бүртгэл мэдээлэл нь газрын кадастрын мэдээллийн нэгдсэн цахим системд шилжсэнтэй холбогдуулан www.egazar.gov.mn газрын цахим систем болон EGAZAR гар утасны апплейкэшн ашиглан өөрийн газрын бүртгэл мэдээллийг шалгаж, баталгаажуулах ёстой аж.  Хэрэв таны газар цахим системд ямар нэг бүртгэлгүй бол аймаг, дүүрэг, сумын ЗДТГ газрын даамалд газрын гэрчилгээ, гэрээ, кадастрын зурагтай биечлэн очиж бүртгүүлээрэй. Учир нь Монгол Улсын хэмжээнд нэг л удаа шинэчилсэн бүртгэлийн ажил хийгдэх юм.

Иргэн та газрын мэдээллийг газрын кадастрын нэгдсэн мэдээллийн санд баталгаажуулж авснаар цаашид:

-Газрын гэрээ, гэрчилгээ, кадастрын зургийг цахим системээс хэвлэж авах,

-Өөрийн эзэмшиж, өмчилж буй газрын дэлгэрэнгүй мэдээллийг харах,

-Газрын төлбөр, татварыг цаг алдалгүйгээр цахим банкаар төлөх,

-Газрын бичиг баримтыг банк болон банк бус санхүүгийн байгууллагад барьцаалж эдийн засгийн эргэлтэнд оруулах,

-Цахимаар эзэмшил, өмчлөлийн нийт 42 төрлийн өргөдөл хүсэлт илгээх боломжууд бүрдэнэ.

Хэрэв иргэн, аж ахуйн нэгж  өөрийн нэр дээрх газраа энэ хугацаанд амжиж бүртгүүлэхгүй бол цаашид газрын харилцаатай холбоотой үйлчилгээ авах боломжгүй болно. Өөрөөр хэлбэл  газар эзэмших эрх нь хүчингүй болж газраа зарах, банканд барьцаалах, бэлэглэх, өвлүүлэх ямар ч боломжгүй юм.

Цаашид Газар зохион байгуулалтын төлөвлөлтийн системээс газар  олгоно. Тодруулбал,  төлөвлөгөөнд тусгагдаагүй бол мэдээллийн санд орохгүй болжээ. Харин  бичиг баримтын зөрчилгүй бол систем дээр шууд баталгаажуулж байгаа юм. Баталгаажуулсны дараа иргэн, хуулийн этгээд гэрээ, гэрчилгээ, кадастрын зургаа интернетээс хэвлэн авах боломжтой болно.

Г.Батзориг: “Газар зохион байгуулалтын ерөнхий төлөвлөгөө”-г тавдугаар сард зохион байгуулна

/Нийслэлийн Газар зохион байгуулалтын албаны дарга/

-Нийслэлийн “Газар зохион байгуулалтын ерөнхий төлөвлөгөө”-г боловсруулах ажил 90 хувьтай өрнөж байна. Ерөнхий төлөвлөгөөг “ Газар дэлхий”, “Гео ботаник” гэсэн хоёр компанийн нэгдэл боловсруулж байгаа.  Ирэх тавдугаар сард дуусгаж, НИТХ-д өргөн барихаар төлөвлөсөн.  Энэхүү төлөвлөгөөг “Улаанбаатар хотыг хөгжүүлэх ерөнхий төлөвлөгөө-2040” бодлогын баримт бичигтэй уялдуулан боловсруулж байна.

Түүнчлэн нийслэлийн хэмжээнд ой, усны хамгаалалтын бүсэд 15.600 нэгж талбар  багтсан. Энэ оны газар зохион байгуулалтын төлөвлөгөө ёсоор ой болон усны сан бүхий газрыг чөлөөлөх ажил  хийнэ. Түүхийн дурсгалт дөрвөн байршилд есөн нэгж талбар өртөнө. Эдгээрийн гурвынх нь газар эзэмших эрхийг цуцалсан.  Бусад байршлыг энэ ондоо багтаан цэгцэлнэ. Баянзүрх дүүргийн Хонхор орчимд Экологийн коридорь гаргах бөгөөд түүнд өртөж буй 451 нэгж талбар бий. Экологийн коридорь гаргах ажлыг энэ онд эхлүүлнэ гэв.