Дэлхий дахинд
Шинэ Зеланд улс хүнсний зориулалттай гялгар уутны хэрэглээг хориглов
Шинэ Зеланд улс байгаль орчны тогтвортой байдлыг дэмжих зорилгоор 2025 он гэхэд нэг удаагийн хуванцрын хэрэглээг бүрэн халах зорилт тавьсан.
Энэ зорилтынхоо хүрээнд энэ сарын 1-ний өдрөөс эхлэн хүнсний дэлгүүрт жимс, хүнсний ногоо савлах, хадгалах зориулалттай нимгэн уутыг хэрэглээнээс халж байна.
Ингэснээр Шинэ Зеланд улс энэ төрлийн нэг удаагийн хуванцрын хэрэглээг хориглосон дэлхийн анхны улс болж байна.
Тус улсын Байгаль орчны сайдын мэдээлж байгаагаар энэ шийдвэрийн хүрээнд жилд 150 сая гялгар уутыг хэрэглээнээс халах тухай тооцооллыг танилцуулжээ.
Шинэ Зеланд улс 2019 оноос хуванцрын хэрэглээг бууруулахад чиглэсэн алхмуудыг хийж хэрэгжүүлсээр ирсэн. Энэ жилийн санаачилга нь ихэвчлэн хогийн цэгт хаягдаж, хөрс, ус далайг хамгийн их бохирдуулж буй нэг удаагийн хуванцрын хэрэглээг багасгахад чиглэж байна гэж мэргэжилтнүүд тодорхойлж байна.
Нэг удаагийн хуванцрын хэрэглээг халах нь сайн хэрэг боловч нөгөө талдаа хүний өдөр тутмын амьдралынх нь салшгүй хэсэг болсон энэ хэрэгцээг хэрхэн эко ногоон байдлаар орлуулах вэ гэдэг асуудлыг Шинэ Зеландын Засгийн газар мөн шийдвэрлэхээр ажиллаж байгаа юм байна.
Энэ хүрээнд тус улсын Засгийн газар хуванцар бүтээгдэхүүний инновацийн санд 50 сая ам.долларын санхүүжилт олгох юм байна.
Энэ сангаар дамжуулж сав баглаа боодол үйлдвэрлэгч аж ахуйн нэгжүүдийн бизнес үйл ажиллагааг дэмжих зорилготой гэж “Би Би Си” мэдээлжээ.
Одоо тус улсын хүнсний дэлгүүрүүд нимгэн гялгар уутны оронд нэг удаагийн цаасан торыг ашиглаж эхэлсэн байна. Тухайлбал, улсдаа хамгийн олон буюу 185 сүлжээ дэлгүүртэй Коунтдаун компанийн хувьд хэрэглэгчдэдээ дахин боловсруулах боломжтой торон уутыг санал болгож буй юм байна.
Нэгдсэн үндэстний байгууллагаас гаргасан судалгаагаар хүн төрөлхтөн жилд дунджаар таван их наяд гялгар уут хэрэглэгдэг. Нийт үйлдвэрлэсэн хуванцрын 36 хувийг сав баглаа боодол, түүний дотор хүнс савлах, хадгалах зориулалттай нимгэн гялгар уут болон ундааны сав эзэлдэг юм байна. Мөн энэ төрлийн хуванцрын 85 хувийг нь дахин боловсруулдаггүй хогийн цэгт хаягддаг гэсэн тооцоо байна.
Дэлхий дахинд
Кени улсад үерийн улмаас 71 хүн амь насаа алдаж, 110 хүн эмнэлэгт хүргэгджээ
Кени улсын Накуру мужийн Май Махиу хотын ойролцоо болсон үерийн улмаас 71 хүн нас барж, 110 хүн эмнэлэгт хүргэгдсэн гэж тус мужийн захирагч Сюзан Кихика өчигдөр мэдэгджээ.
Тус хотын үерийн далан сэтэрч, төмөр замын доогуурх гармаар дамждаг ус зайлуулах хоолой бөглөрснөөр хот үерт автжээ.
Үүний улмаас мод үндсээрээ булгарч, тээврийн хэрэгсэл болон байшингууд олноор урсаж, олон хүн амь насаа алдсан байна.
Аврах багийнхан үүссэн шавар, хог хаягдлыг цэвэрлэж байгаа бөгөөд амиа алдагсдын тоо нэмэгдэж болзошгүй байгаа аж.
Кени улсад гуравдугаар сараас хойш бороотой байгаа бөгөөд энэ хугацаанд 103 иргэн амиа алдаж, олон мянган айлыг нүүлгэн шилжүүлээд байна.
Түүнчлэн сүүлийн жилүүдэд орсон борооны нөлөөлөл олон газарт мал аж ахуй, газар тариаланг устгаж, өлсгөлөн, усны хомсдолд оруулаад байгаа талаар Засгийн газрын Хэвлэлийн төлөөлөгч Исаак Майгуа мэдэгдлээ гэж ОБЕГ-аас мэдээллээ.
Дэлхий дахинд
Японд газар хөдлөлтийн улмаас есөн хүн хөнгөн гэмтжээ
Дэлхий дахинд
АНУ-ын Ерөнхийлөгч асан Дональд Трампд холбогдох эрүүгийн хэргийн анхны шүүх ажиллагаа эхлэв
АНУ-д Ерөнхийлөгч асан Дональд Трампын эсрэг дөрвөн ч эрүүгийн хэрэг үүсгэн шалгаж байна.
Тэгвэл энэ хэргүүдийн эхнийх нь буюу хувийн мэдээллээ далдлах зорилгоор төлбөр хийсэн гэх хэргийн шүүх ажиллагаа Нью-Йоркийн шүүх дээр эхэлж байгаа тухай олон улсын хэвлэлүүд мэдээлж байна.
Шүүхийн ялын тогтоол гартал нэгээс хоёр сар үргэлжилж болзошгүй гэж тооцогдож байгаа энэ шүүх ажиллагаагаар өдгөө 77 настай Дональд Трампын 2016 оны Ерөнхийлөгчийн сонгуулийн өмнө насанд хүрэгсдийн киноны жүжигчин Сторми Дэниелс хэмээх эмэгтэйд дотно харилцаатай байснаа нууцлахыг даалгаж өмгөөлөгчөөрөө дамжуулан 130 мянган ам.доллар төлсөн, үүнийгээ ажил хэргийн нөхцөлийн дагуух хууль ёсны төлбөр мэтээр санхүүгийн хуурамч баримт бүрдүүлсэн хэрэгт өнгөрсөн оны гуравдугаар сард эрүүгийн хэрэг үүсгэсэн хэргийг хэлэлцэнэ.
Прокуроруудын зүгээс Дональд Трампын энэ үйлдлийг сонгуулийн боломжид нь нөлөөлж болзошгүй гэдэг үүднээс мэдээллийг нуун далдлахыг завдсан хэрэг гэж үзсэн.
Ирэх 11 дүгээр сард болох АНУ-ын Ерөнхийлөгчийн сонгуульд Бүгд найрамдах намаас нэр дэвших эрхээ долоодугаар сард болох намынхаа их хурлаас баталгаажуулахаар зэхэж байгаа Дональд Трамп харин өөрт нь тулгаж байгаа бүх гэмт хэргийг үндэслэлгүй гүтгэлэг гэж үгүйсгэдэг.
Тэрбээр шүүх танхимд орох үедээ ч гэсэн “Улстөрийн мөрдлөг хавчлага болж байна” гэдэг байр сууриа сэтгүүлчдэд илэрхийлжээ.
Үүнээс гадна экс Ерөнхийлөгчийг төрийн нууцын зэрэглэлтэй баримт бичгүүдэд хайхрамжгүй хандсан, 2020 онд өөрийн ялагдал хүлээсэн Ерөнхийлөгчийн сонгуулийн дүнг цуцлуулах санаархлаар үйлдсэн гэдэг өөр хоёр гэмт хэрэгт нийт 34 зүйл ангиар буруутгасан.
Сүүлийн хоёр нь, 2021 оны нэгдүгээр сард Капитолын ордонд дайран орж, хүмүүс амь эрсдэхэд хүргэсэн үймээн самууныг өдөөн турхирсан, нөгөө нь Жоржия муж улсад мөн тэндхийн сонгуулийн үйл явцыг тасалдуулахыг завдсан гэх хэргүүд юм.
Үүний зэрэгцээ АП-Чикагогийн ИС-ийн дэргэдэх судалгааны төв хамтран явуулсан судалгаагаар, гурван америк хүн тутмын нэг нь Трампын мөнгө шилжүүлсэн үйлдлээ нууцалсан нь хууль бус, өөрөөр хэлбэл, гэмт хэрэг мөн гэж үзжээ.
Мөн тал шахам хувь нь бусад гурван гэмт хэрэгт ч Дональд Трампыг ямар нэг байдлаар гэм буруутай гэсний дээр, бүх шүүх үйл явц тэгэхдээ прокурорууд болоод шүүгчид нь зөв шударга ажиллаж, үнэн зөв шийдвэр гарна гэдэгт төдийлөн итгэлтэй бус байгаагаа илэрхийлжээ.
-
Улс төр3 цаг өмнө
Мюнхэн хотын Амбан захирагч Кристоф Мартин Гёбель илтгэл тавилаа
-
Нийгэм10 цаг өмнө
ОХУ-аас ирүүлсэн хүмүүнлэгийн тусламжийн үр тарианы тэжээлийг хүлээн авч, орон нутагт олголоо
-
Нийгэм10 цаг өмнө
Уламжлалт анагаах ухааны 7 их сургууль цөм төлөвлөгөөгөө нэгдсэн байдлаар тогтжээ
-
Нийгэм11 цаг өмнө
Аюулт үзэгдэл, ослын 99 удаагийн дуудлагаар үүрэг гүйцэтгэжээ
-
Нийгэм10 цаг өмнө
Замын-Үүд сумын ойн барилдаанд Б.Орхонбаяр арслан түрүүллээ
-
Улс төр8 цаг өмнө
Монгол Улсын Ерөнхийлөгч У.Хүрэлсүх ээжүүдэд Алдарт эхийн одон гардууллаа
-
Нийгэм8 цаг өмнө
Монгол Улсаас жүдо бөхийн 6 дахь Дэлхийн аварга төрлөө
-
Нийгэм7 цаг өмнө
Х.Нямбаатар: Нийслэлийн өмчийн асуудалтай холбоотойгоор Л.Наранбаатар, Ц.Батбаатар нарыг хуулийн байгууллагаар шалгуулна