Нийслэлийн Засаг дарга бөгөөд Улаанбаатар хотын Захирагч Х.Нямбаатар Бүгд Найрамдах Социалист Вьетнам Улсын “Рокс” группийн удирдах зөвлөлийн дарга, MSB банкны ТУЗ-ийн дарга Тран Ан Туан тэргүүтэй төлөөлөгчдийг хүлээн авч уулзлаа.

Энэ үеэр хотын дарга Х.Нямбаатар Улаанбаатар хотын агаар, орчны бохирдол, авто замын түгжрэл, иргэдийн амьдралын чанарыг дээшлүүлэх зорилтын дагуу хэрэгжүүлэх 24 мега төслийг танилцуулж, хамтран ажиллах боломжийн талаар санал солилцсон юм. Тодруулбал, эдгээр мега төслөөс эхний ээлжид нийтийн тээвэрт их багтаамжийн олон төрөлт хэрэгсэл нэвтрүүлэх ажлын хүрээнд Улаанбаатар метро төслийн нэгдүгээр шатны нээлттэй тендерийг зарласнаас гадна трамвайны нэгдүгээр шугамын трассыг тодорхойлж, ТЭЗҮ-ийг боловсруулж буй. Мөн Улаанбаатар хотын авто замын түгжрэлийг бууруулах зорилтын дагуу Туулын хурдны замын олон улсын нээлттэй тендерийг зарласан. Агаарын бохирдлыг бууруулах ажлын хүрээнд “20 минутын хот” нэгдсэн төлөвлөлтийг баримтлан Сэлбэ, Баянхошуу, Ханын материалд 20 мянган айлын цогцолбор хорооллыг барих ажлыг эхлүүлээд байгааг онцолсон юм.

Мөн тэрбээр манай хоёр улсын хувьд сүүлийн жилүүдэд улс төр, батлан хамгаалах, худалдаа, эдийн засаг, аялал жуулчлал, хөдөө аж ахуйн салбарын хамтын ажиллагааны чиглэлээр харилцаагаа өргөжүүлж байгааг дурдан цаашид Улаанбаатар хоттой илүү нягт хамтран ажиллах боломжтой гэдгийг уламжлав.

Танилцуулгын төгсгөлд БНСВУ-ын “Рокс” группийн удирдах зөвлөлийн дарга, MSB банкны ТУЗ-ийн дарга Тран Ан Туан сонирхож буй төсөл, хөтөлбөрүүдийнхээ талаар тодруулж, цаашид хоёр талын хамтын ажиллагааг бэхжүүлэх чиглэлд бүхий л талаар дэмжлэг үзүүлэн, хамтран ажиллахдаа таатай байх болно гэдгээ илэрхийллээ.

“Рокс” групп нь хот, аж үйлдвэрийн паркийн хөгжил, менежмент, үл хөдлөх хөрөнгийн түрээс, худалдаа үйлчилгээ, зочид буудал, эрчим хүч, банк санхүүгийн чиглэлд үйл ажиллагаа явуулдаг Вьетнамын тэргүүлэгч корпорацуудын нэг юм.

ХӨСҮТ-ээс менингитийн нөхцөл байдлын талаар мэдээлэл өглөө.

ХӨСҮТ-ийн Ерөнхий захирал Э.Анхбаяр “Налайх дүүрэгт бүртгэгдсэн менингококкт халдвар авсан 3 настай хүүхдийн биеийн байдал хүнд амь тэмцсэн байдалтай байсан. Хүүхэд ХӨСҮТ-д өчигдөр орой ирсэн. Өнөөдөр үдээс өмнө эндлээ.

2024 онд тус халдварын 5 сэжигтэй тохиолдол бүртгэгдэж, лабортаторийн шинжилгээгээр 2 тохиолдол батлагдсан. Тухайн хоёр хүүхэд эдгэрээд гарсан. 2025 онд 2 сэжигтэй тохиолдол бүртгэгдсэнээс нэг нь  харамсалтай нь өнөөдөр эндлээ. Өчигдөр Баянгол дүүрэгт сэжигтэй тохиолдол ирээд шинжилгээний дүн гарсан. Өнөөдрийн байдлаар тууралт халдварууд ихсэж байна” гэлээ.

Эрүүл мэндийн сайд Т.Мөнхсайхан албаны хүмүүсийн хамтаар өнөөдөр манай аймагт ажиллаж байна. Сайдын бүрэлдэхүүнд Хавдар судлалын үндэсний төвийн захирал Н.Эрдэнэхүү, Эмгэг судлалын үндэсний төвийн захирал  Б.Ганзориг, Улсын гуравдугаар төв эмнэлгийн захирал Ц.Төмөр-Очир болон яамны хэлтэс албад, харьяа байгууллагын дарга нар багтжээ.

Албаныхны манай аймагт ажиллаж буй  зорилго нь  сайдын тушаалаар томилогдсон төвлөрлийг сааруулах “Үндэсний баг”-ийн үйл ажиллагаатай танилцах, дэмжлэг үзүүлэх, орон нутгийн эрүүл мэндийн салбарт тулгамдаж буй бэрхшээлийг газар дээр нь шийдэх,  зарим асуудлыг бодлого үйл ажиллагаандаа тусгах юм.

Үндэсний  баг нь   манай аймагт хавдар, зүрх судас, ангиографийн оношилгоо, гэмтэл согог, ерөнхий мэс заслын тусламж үйлчилгээг  үзүүлэхээс гадна эмч, эмнэлгийн мэргэжилтнүүдийг ажлын байранд   дадлагажуулах,  сургах, мэргэжил арга зүйгээр ханган  ажиллаж буй.

Салбарын сайд эхлээд А.Амарын танхимд аймгийн эрүүл мэндийн салбарын  эмч, эмнэлгийн ажилтнуудын төлөөлөлтэй уулзаж санал солилцов.  Уулзалтад аймгийн ИТХ-ын дарга Д.Мөнхбат, Засаг дарга Б.Зоригтбаяр болон бусад холбогдох албаны хүмүүс оролцлоо.