Эрүүдэн шүүлт явуулсан гэм буруутай нь тогтоогдвол хариуцлага хүлээх хүн нь зөвхөн ХЭРЭГ БҮРТГЭГЧ, МӨРДӨН БАЙЦААГЧ нар гэж хуульд заажээ. Гэтэл Б.Содномдаржаа, Т.Чимгээ нарыг эрүүдэн шүүсэн гэх хэрэгт яллагдагчаар татагдсан есөн хүний дотор хэрэг бүртгэгч, мөрдөн байцаагч гэх албан тушаалтай хүн БАЙХГҮЙ. Энэ нь Б.Хурц нарын есөн хүнд “ял завших” боломж олгохыг үгүйсгэхгүй-

Төр, нийгмийн нэрт зүтгэлтэн С.Зоригийг хөнөөсөн хэргээр гурван шатны шүүхээс ялын дээд хэмжээг авсан Б.Содномдаржаа, Т.Чимгээ нарыг эрүүдэн шүүж, хилс хэрэг хүлээлгэсэн гэх үндэслэлээр ТЕГ-ын дарга асан Б.Хурц, Улсын Ерөнхий прокурорын орлогч асан Г.Эрдэнэбат, ТЕГ-ын ажилтан О.Бархасбадь, Ч.Мөнхгал, С.Баяр, Ч.Отгонбаяр, С.Эрдэнэбат, ШШГЕГ-ын ажилтан Э.Өлзийбаяр, О.Бямбажав нарын есөн хүнийг яллагдагчаар татан шалгаж байгаа билээ.

Тэдэнд хуучин Эрүүгийн хуулийн 251.1, 133.1-т зааснаар хэрэг бүртгэл нээж, мөрдөн шалгах ажиллагаа хийж дууссан бөгөөд өнгөрсөн долоо хоногт холбогдох хэргийг нь Төв аймаг дахь Эрүүгийн хэргийн анхан шатны шүүхэд шилжүүлээд байна.

Б.ХУРЦ НАР “ЯЛ ЗАВШИХ” МАГАДЛАЛТАЙ

Тэгвэл Б.Хурц нар “ял завших” магадлалтай, тийм хуулийн “цоорхой” бий гэдгийг зарим хүн хэлж, хардаж байна. Тэд олон жил хуулийн салбарт ажилласан ямар ч хүн хуулийг арван хуруу шиг ээ цээжилсэн гэхээсээ илүүтэй “хуулийн цоорхой”-г хамгийн сайн мэддэг байж таарна. Яг энэ жишгээр ТЕГ-ын дарга асан Б.Хурц нар анхнаасаа төр, нийгмийн нэрт зүтгэлтэн С.Зоригийг хөнөөсөн хэргээр ял сонссон Б.Содномдаржаа, Т.Чимгээ нарыг эрүүдэн шүүж, хэрэг тулгах үйл явцдаа “хуулийн цоорхой”-г ашигласан гэх хардлага зарим нэгэнд нь байгаа аж.

Учир нь, ТЕГ-ын дарга асан Б.Хурц нарын есөн хүнийг яллагдагчаар татсан хоёр зүйл ангийн нэг нь хуучин Эрүүгийн хуулийн 251.1 дэх заалт юм. Тэрхүү заалтад “Хэрэг бүртгэгч, мөрдөн байцаагч хүч хэрэглэж буюу хүч хэрэглэхээр заналхийлэх, тарчилган зовоох, тохуурхан даажигнах, хуурч мэхлэх зэрэг хууль бус арга хэрэглэж мэдүүлэг өгөхийг албадан эрүү шүүлт тулгасан бол тодорхой албан тушаал эрхлэх, үйл ажиллагаа явуулах эрхийг гурван жил хүртэл хугацаагаар хасаж, таван жил хүртэл хугацаагаар хорих ял шийтгэнэ” гэж цаасан дээр хараар бичжээ.

Эрүүдэн шүүсэн гэх үндэслэлээр яллагдагчаар татагдсан ТЕГ-ын дарга асан Б.Хурц нарын есөн хүнийг зүйлчилсэн хуулийн заалтаас харахад эрүүдэн шүүлт явуулж улмаар гэм буруутай нь тогтоогдвол хариуцлага хүлээх хүн нь зөвхөн ХЭРЭГ БҮРТГЭГЧ, МӨРДӨН БАЙЦААГЧ нар л болж таарч байгаа юм. Гэтэл Б.Содномдаржаа, Т.Чимгээ нарыг эрүүдэн шүүсэн гэх хэрэгт яллагдагчаар татагдсан есөн хүний дотор хэрэг бүртгэгч, мөрдөн байцаагч гэх албан тушаалтай хүн нэг ч БАЙХГҮЙ. Энэ нь ТЕГ-ын дарга асан Б.Хурц нарын есөн хүнд “ял завших” боломж олгохыг үгүйсгэхгүй.

Харин одоо хүчин төгөлдөр үйлчилж байгаа Эрүүгийн хуулийн шинэчилсэн найруулгын төсөлд хэрэг бүртгэгч, мөрдөн байцаагч гэдэг үгийг ТӨРИЙН АЛБАН ХААГЧ гэдэг үгээр сольжээ. Хэрэв ТЕГ-ын дарга Б.Хурц нарт холбогдох хэргийг шинэ Эрүүгийн хуулиар зүйлчилсэн бол тэд “ял завших”, “ялаас мултрах” боломжгүй, тийм хардлага ч зарим хүнд төрөхгүй байх байлаа. Гэтэл төр, нийгмийн нэрт зүтгэлтэн С.Зоригийн амь насыг хөнөөсөн хэргээр гурван шатны шүүхээс ялын дээд хэмжээ авсан Б.Содномдаржаа, Т.Чимгээ нарыг эрүүдэн шүүж, хилс хэрэг хүлээлгэсэн гэх хэрэгт яллагдагчаар татагдсан Б.Хурц нарт хуучин Эрүүгийн хуулийн хоёр ч заалтаар гэм буруутай эсэхийг нь дэнслэх гэж байна.

Дээр нь, эрүүдэн шүүсэн үйл явцыг биечлэн гүйцэтгэсэн гэгдэх Ц.Амгаланбаатар, Итгэлтөгс нарыг яллагдагчаар биш ГЭРЧЭЭР оролцуулах гэж байгаа талаар эх сурвалж өгүүлсэн билээ. Тэр ч битгий хэл, ТЕГ-ын дарга асан Б.Хурц нарын өмгөөлөгчдийн зүгээс “Энэ бол эрүүдэн шүүсэн хэрэг биш. Хүний эрүүл мэндийн эсрэг гэмт хэрэг” гэж үзэж байгаа аж.

Ямартай ч тэднийг гүйцэтгэх ажлын тухай хууль, тогтоомж зөрчсөн гэх үндэслэлээр Эрүүгийн хуулийн 133.1-т зааснаар давхар яллаад байгаа юм. Энэхүү заалтад “Гүйцэтгэх ажлын тухай хууль тогтоомжоор хориглосон үйл ажиллагаа явуулсан бол хөдөлмөрийн хөлсний доод хэмжээг тавин нэгээс нэг зуу дахин нэмэгдүүлсэнтэй тэнцэх хэмжээний төгрөгөөр торгох, гурваас дээш зургаан сар хүртэл хугацаагаар баривчлах, эсхүл гурван жил хүртэл хугацаагаар хорих ял шийтгэнэ” гэсэн байдаг.