“Хөх Зүрх аян”-ы хүрээнд, “Түгээмэл Хөгжил” бие даан амьдрах төвийн “Хөгжлийн бжрхшээлтэй өсвөр наснынхны өдөр тутмын нийгмийн оролцоог нэмэгдүүлэх, хөгжүүлэх төсөл”-ийн өсвөр үеийнхэн болон Өсвөр Үеийнхний Хөгжлийн Төвийн “Солонгын Дайчид” охидын скаутын бүлгийн гишүүд хамт, хөгжлийн бэрхшээлтэй болон энгийн хүүхдүүд хамтран ажиллах, харилцан суралцах нь ямар давуу тал, үр дүнтэй байдаг талаар төсөөллөө хөгжүүлэхээр Тесо Корпорацийн Айсмарк компаний зайрмагны үйлдвэртэй танилцах аялал зохион байгуулсан.

Аялалд гарахын өмнө, “Солонгын Дайчид” охидын скаутын бүлгийнхэн, ялгаатай байдалд мэдрэмжтэй хандах, ямагт бусдын найз нөхөр байж, тусалж явах аялалын ёс зүйн кодын талаар ярилцсан. Ингээд “Түгээмэл Хөгжил” бие даан амьдрах төв дээр очиход биднийг халуун дулаанаар хүлээн авч, байгууллагынхаа зорилго, үнэт зүйл, үйл ажиллагааны талаар танилцуулснаас гадна, өрөөнд байсан бүх хүмүүс анхаарлаа хандуулан хоорондоо танилцаж, энгийн бөгөөд тэгш оролцоотой нэгэнтэйгээ харилцаж байсан нь бидний хувьд нэгэн шинэ ертөнц байсан юм.

Бид нар бүгдээрээ хичээл, сургуулиа тараад цугларсан байсан тул “Түгээмэл Хөгжил” бие даан амьдрах төв дээр цайлсан. Энэ үеэр тус төвийн сайн дурын ажилтан, Япон улсын иргэн Тайра сан хэлэхдээ, “… Нийгмийн хүртээмжтэй байдал гэдэг бол, хүүхдүүд хөгжлийн бэрхшээлтэй эсэх, эрүүл эсэхээс үл хамааран хамтдаа хөгжиж, нийгмийн амьдралд хамтран оролцож, нэгнийхээ хэрэгцээ шаардлагад мэдрэмжтэй хандаж, хүсэл сонирхлыг мэдэрч харилцах нь хамгийн чухал хүний эрхийн боловсролуудын нэг юм. Ирээдүйд нийгмийн аль ч хүрээнд хөгжлийн бэрхшээлтэй хүүхдүүдийн хамгийн сайн хамтрагч нь бусад хүүхдүүд болох нь нийгмийн ээлтэй, хүртээмжтэй тогтолцоог бий болгоход нөлөөлж чадах хамгийн том нөлөөлөл болдог. Тиймээс хүүхэд бүр ялгаатай байдлаасаа үл хамааран цагийг үр бүтээлтэй өнгөрүүлэх төвүүдийн үйл ажиллагаа, хамтын ажиллагааг дэмжих нь хамгийн чухал юм гэдгийг Япон улсын сайн туршлагууд харуулж байна. Үүнийг Монголд ч гэсэн төлөвшүүлж авч явах нь бидний хамтын ажиллагаа болж байна” гэж хэлсэн нь, хоёр төвийн анх удаа санаачилж явуулж буй үйл ажиллагаанд сэтгэлийн дэмжлэг, урам болсон.

Биднийг “Айсмарк” зайрмагны үйлдвэр дээр очоод хаалгаар орох, налуу замаар явах, ариутгасан хувцас өмсөх, ариутгалын өрөөгөөр орох, мөн үйлдвэрт зочилсон зочдын хэсгээр явах гэх мэт бүх цаг хугацаануудад туслахыг хичээж, тэргийг түрж өгөх, гадуур хувцасны оронд ариутгасан хувцас өмсгөх зэрэгт тусалсан маань анх удаа байсан учраас, эхэндээ үнэхээр хэцүү санагдсан. Бас алдаа гаргахвий  гэж өөртөө итгэлгүй байдлаасаа болоод сандарч, айж байсан ч гэсэн  хүнд хэцүү гэж бодохоос илүү шинэ зүйл сурч байна гэж хандаад, аль болох нээлттэй байж, түрж байгаа хүүхдэдээ байнга санаа тавьж явсан.

Аялалын төгсгөлд, биднийг зайрмагаар дайлахад, хурдан идэх юмсан гэж бодсоноос биш, уутыг нь задлахад хэцүү байх тухай огт бодоогүй байсан. Ингэж бодоод бага зэрэг гэмшсэн ч гэсэн, сандралгүйгээр зайрмагийг задалж өгөхдөө маш их зүйлс ойлгож байсан. Хүүхдүүд биднээс өөр харагдлаа гээд бид тэдэнтэй өөрөөр харилцалгүй, яг л адилхан хүүхдүүд, миний сонсдог хөгжмийг сонсдог, найзуудтайгаа ярилцаж, цагийг хөгжилтэй өнгөрүүлэхийг хүсдэг, ирээдүйд хэн болох талаар бодож, хичээлдээ сайн сурахыг эрмэлздэг адилхан л хүүхүүд болохоор эмээлгүйгээр тэвчээртэй байж, сэтгэлээсээ хандаж чадвал яаж харилцах вэ гэх айдас төрөхгүй юм байна гэдгийг мэдэж авсан.

Тайра саны хэлсэнтэй ч ижил, бид ирээдүйд харилцан суралцаж, хамтран амьдрахын тулд найз нөхөддөө тусалж, ижил тэгш боломжоор хангагдах, бүх зүйлсийг хүртээмжтэй байлгахын тулд эвлэлдэн нэгдэх хэрэгтэйг ухааруулсан сайхан аялал болсон. Баярлалаа та бүхэндээ!

#Табүхэнэвлэлдэннэгдэхийгхүсвэл #Endhumantrafficking

#Залуучууднийгмийгөөрчилжбайна  #Solidaritymatters