Монголбанкны ерөнхийлөгч Б.Лхагвасүрэн Монголбанк удахгүй мөнгөн дэвсгэртийн хэмжээг нэмэгдүүлэх саналыг УИХ-д оруулна хэмээн өнгөрсөн долоо хоногийн чуулганы хуралдааны үеэр мэдэгдсэн юм.

Тэрээр “Манай мөнгөн дэвсгэртийн хамгийн том нь 20 мянган төгрөг байдаг. Хорин мянган төгрөгийг ам.доллар руу шилжүүлбэл 7 ам.доллартой тэнцэж байгаа. Хүмүүс мөнгөө ам.доллар руу шилжүүлж байгаа нь манай мөнгөн тэмдэгтийн дэвсгэрт бага байгаатай холбоотой гэж үзэж дэвсгэртийн хэмжээг нэмэх боломжтой Монголбанкнаас харж байгаа. Энэ талаар удахгүй тодорхой санал гарах байр суурьтай байгаа” гэсэн юм.

Монголбанк бие даан шинэ төрлийн мөнгөн тэмдэгт хэвлэх эрхгүй бөгөөд УИХ хэлэлцэн шийдвэрлэснээр Монголбанк гүйлгээнд гаргах хуулийн зохицуулалттай. Тиймээс Монголбанк 50 мянгатын дэвсгэрт хэвлэх шийдвэрийг дангаар гаргах боломжгүй гэсэн үг. Ер нь шинэ төрлийн мөнгөн тэмдэгт хэвлэх, дэвсгэртийн тоог нэмэгдүүлэхэд улс орнууд маш олон хүчин зүйлийг харгалзаж үздэг. Үүнд бараа, бүтээгдэхүүний үнэ, дундаж цалингийн өсөлт гэх зэргийг дурьдаж болно. Энгийнээр тайлбарлавал инфляци өссөнтэй холбоотойгоор төгрөгийн худалдан авах чадвар муудаж, иргэд наад захын хэрэгцээний худалдан авалт хийхийн тулд зарцуулах мөнгөний овор хэмжээ нэмэгдээд эхэлбэл, дараагийн өндөр дүнтэй мөнгөн дэвсгэрийг хэвлэх шаардлагад гардаг байна.

Дашрамд дурдахад, одоогоор манай улсад нэг төгрөгөөс эхлээд 20 мянгат хүртэл 11 төрлийн цаасан дэвсгэрт хэрэглэж байгаа юм. Монголын хамгийн том мөнгөн дэвсгэрт болох 20 мянгатыг 2006 он гүйлгээнд гаргасан. Харин нэгт, тавт, аравт, хорьт, тавьт, зуут, таванзуут, мянгат, тав болон арван мянгатын дэвсгэртийг 1993 онд гүйлгээнд гаргажээ.