Б.Баттөр, Х.Мөнхжин, Б.Санчир гэх гурван найз санаа нэгдэн Монголын анхны спортын сэргээн засах эмнэлэг болох “Almighty clinic”-ыг үүсгэн байгуулжээ. Тухайн эмнэлэг нь сэргээн засах үйлчилгээг үзүүлэхээс гадна лабораторийн шинжилгээ, цус, шээс, биохими молекул биологийн шинжилгээг хийх бөгөөд залуус нийгмийн хариуцлагын хүрээнд тодорхой хэмжээний эмзэг бүлгийн хүмүүсийг сард нэг удаа үнэ төлбөргүй үзэж оношилж байхаар болсон байна. Ингээд Almighty Clinic-ийн үүсгэн байгуулагч, хүний их эмч Б.Санчиртай ярилцсанаа хүргэж байна.

-Гурван найзын хүсэл тэмүүллээр энэхүү эмнэлэг нь биеллээ олсон байна.  Та гурав анх хэрхэн эмнэлэг нээе гэж шийдсэн бэ?

-Х.Мөнхжин бид хоёр миний ажиллаж байсан эмнэлэг дээр энэ санааг эхлүүлж байсан. Бид хоёр спортоор хичээллэдэг болохоор тамирчдад зориулсан эмнэлэг нээе, тэдэнд ийм эмнэлэг их хэрэгтэй гэж ярилцсанаар энэ санаа төрсөн юм. Дараахан Ангууч бид гурав  нийлж дахин эмнэлгийнхээ тухай сайн ярилцсаны дүнд эрүүл  амьдралын хэв маяг, урт удаан наслах, хамгийн гол нь чанартай урт наслах зэрэг эдгээр зүйлсийг залууст, нийгэмд уриалж таниулъя. Ингэхийн тулд эмнэлгээ нээж, илүү өргөжүүлэн хөгжүүлж хүн бүхэнд хүртээмжтэй томоохон клиникийн эмнэлэг болгох зорилго тавин, шийдвэрээ гаргасан.  Энэ өдрөөс хойш багагүй саад бэрхшээлийг туулсан. Аливаа зүйлийг бүтээнэ, бий болгоход саад тотгор мэдээж гарах болно. Бидэнд тусгай зөвшөөрөл авах, санхүүгээ зохицуулах гэхчилэн олон асуудал байлаа. Бид гурав дотны хүн, гэр бүлээсээ ямар нэгэн туслалцаа авахгүйгээр өөрсдөө бүх зүйлсээ босгоно гэсэн бодол, шийдвэртэй байсан юм. Өнгөрсөн намар эмнэлгийн тохижилтын ажил эхэлсэн. Үүний үр дүнд одоо л нэг бодит байдал дээр биеллээ оллоо. Гол нь зогсолтгүй тууштай зүтгэсний үр дүнд бид эмнэлгээ нээж чадлаа. Эмнэлгийн албан ёсны нээлт ирэх дөрөвдүгээр сарын сүүлээр болох юм. Тухайн нээлтээрээ дамжуулан бид тодорхой хэмжээнд олон нийт рүү чиглэсэн эрүүл мэндийн арга хэмжээ зохион байгуулна. Мөн эмнэлгийн үйлчилгээнээс гадна нэгэн гэнэтийн бэлэг хадгалж байна.

-Монголын анхны спортын сэргээн засах эмнэлэг гэдгээрээ их онцлогтой. Үүнээс гадна та бүхэн олон төрлийн эмчилгээг хийхийг зорьсон байна. Эмнэлгийнхээ талаар дэлгэрэнгүй танилцуулна уу?

-Манай эмнэлэг өнөөдрийн байдлаар мэргэжлийн тамирчдад нэн шаардлагатай нөхөн сэргээх болон сэргээн засах үйлчилгээг үзүүлэхээс гадна дотор сэргээн засах, хүүхэд гэсэн үйл ажиллагааны чиглэлтэй. Түүнчлэн лабораторийн шинжилгээ, цус, шээс, биохими молекул биологийн шинжилгээ зэргийг хийнэ.  Удахгүй Улаанбаатар хотын дагуул хот болох  “Aero city” хотын нэгдсэн эмнэлэг нь “Almighty Clinic” болно гэсэн төлөвлөгөөтэй байгаа. Иймд бид багаа бүрдүүлэн, улам хөгжүүлээд явж байна. Эмнэлгийн салбар гэдэг өөрөө маш өндөр хариуцлага, ур чадвар болон сэтгэл шаардсан салбар юм. Тэгэхээр аль болох мэргэжлийн хамт олныг бүрдүүлэх болно. Бид үйл ажиллагаагаа эхлүүлэх үедээ дотоодын бүхий л компаниудтай хамтарч, дэмжиж ажиллана. Залуус өөрт хэрэгтэй зөвлөгөө мэдээллээ авч болдог эмнэлэг үүд хаалгаа нээж байна гэж ойлгож болно. Та бүхэн заавал өвдсөн гэхгүйгээр чөлөөтэй ирж үзүүлж, өвдөхөөсөө өмнө урьдчилан сэргийлэх үзлэг оношилгоондоо орж эрүүл мэндийн зөвлөгөө мэдээлэл авч болно.

Цар тахал харьцангуй намжаад ирэхийн цагт бид зарим нэг арга хэмжээ, сургалт зөвлөгөө зохион байгуулах бөгөөд тэндээс олсон ашгаа сайн үйлст зарцуулах юм. Мөн нийгмийн хариуцлагын хүрээнд тодорхой хэмжээний эмзэг бүлгийн хүмүүсийг сард нэг удаа үнэ төлбөргүй үзэж, оношилж байх үйлчилгээг нэвтрүүлнэ. Ингэснээр бид эрүүл мэндийн үйлчилгээ иргэн бүрд хүртээмжтэй хүргэх зорилгын нэгээхэн хэсгийг биелүүлж байгаа юм болов уу гэж бодож байна.

-Манай зөвлөх эмчээр миний багш болох зүрх судас, Монгол Улсын зөвлөх эмч, доктор, профессор Ариунцэцэг эмч ажиллах болно. Түүнчлэн нарийн мэргэжлийн резидентын сургалтаа дуусгасан зарим нь бүр өрх, сумын эмнэлэгт хүртэл ажиллаж байсан туршлагатай хамт олон байна. Цаашид багаа улам хүчирхэгжүүлэн явах болно.  Бид одоогоор дотор, дотрын эрхтнүүд, зүрх судас, үе мөч зэргийг эхогоор харж байна. Үйл ажиллагааныхаа чиглэлийг нэмэн, улам хөгжүүлээд ирэхийн цагт мэдээж жирэмсний эхо, ургийн эхо зэргийг хараад явна. Спортын сэргээн засах буюу тамирчдыг өндөр ачаалалтай бэлтгэлийн дараа эргээд булчин тогтолцоо сэргэж маргаашийн бэлтгэлдээ бэлэн болоход нь зориулж уламжлалт зүү эмчилгээ, бариа төөнүүр хийх болно. Түүнчлэн Францын алдарт “Финикс” сэргээн засах эмчилгээний аппаратыг үйлчилгээндээ нэвтрүүлж байгаа. Тус аппарат нь тамирчдад зориулсан 50 гаруй төрлийн эмчилгээг хийх чадвартай, эмчилгээний технологи нь Нобелийн шагнал хүртэж байсан төхөөрөмж юм.

-Засварын  ажлыг өөрсдөө хийсэн харагдсан. Хөл хориотой энэ үед их хэцүү байсан байх?

-Анх энэхүү талбайг хүлээн авахад бараан өнгө, засалтай байсан. Засварын ажил нэлээд их хийсэн юм. Удахгүй энэ талаарх влог сошиалд цацах төлөвлөгөөтэй байна. Цар тахлаас болж засварын ажил дундаа хэд хэдэн удаа саатсан. Учир нь тухайн үед хэн ч гэрээсээ гарч чадахгүй болсон ба хийж, эхлүүлж байсан ажлаасаа удаан хугацаанд холдохоор зориг мохох зэрэг зүйл болох шинжтэй болдог юм байна лээ. Гэвч үндсэн том зорилго минь бидэнд урам зориг өгч байсан юм. Иймд хөл хорио тавигдангуут шуудхан засварын ажилдаа эргэн орж байлаа. Өмнөх талбай нь манай эмнэлгийн загварт тохирохгүй байсан тул хананаас авахуулаад нураах хэрэгтэй олон зүйлс гарсан. Зоригтой, эрчтэй засварын ажилдаа дайрч орсон боловч санасан шиг бас тийм ч амархан байгаагүй. Энэ үед бид өөрсдийн сошиал хаягтаа “Сэтгэлээрээ ирж, засварын ажилд тусалж өгөх хүн байна уу” хэмээн story хийхэд маш олон залуус бидэнд хандан нураалт, засварын ажилд тусалсан. Энэ нь бидэнд улам итгэл найдвар нэмж улмаар эмнэлгийн үйл ажиллагаагаа өргөн хүрээнд, хүртээмжтэй явуулж чадахуйц томоохон эмнэлэг болно гэсэн зорилт руу алхах ташуур болж өгсөн. Тэдгээр залууст бүгдэд нь их баярладаг. Энэ зэргээр бид бүгдийг хамтдаа даван туулсан юм.

-Өнгөний хувьд мэдээж цагаан, хөх өнгийг сонгосон. Учир нь  тус хоёр өнгө тайвшралыг хүнд өгдөг юм. Ингэснээр тухайн хүн эмнэлэгт орж ирэх үед эмч, эмнэлэгтээ итгэх итгэлцлийг бий болгоно. Үйлчлүүлэгчдийнхээ сэтгэл санаа, сэтгэл зүйн  эмчилгээний эхлэл үүдээр  орж ирэхэд бий болж байхаар бодож төлөвлөсөн. Үүнд мөн манай таньдаг архитектур найзууд тусалж оролцсон.

-Залуус нийлж ийм сайхан зүйлийг бүтээн байгуулж байгаад талархалтай байна. Одоо үед манайхан их мэдлэг, боловсролтой болсон санагддаг. Таны хувьд энэ талд ямар байр суурьтай байдаг вэ?

-Залуус мундаг, боловсорсон байна. Дэлхийтэй хөл нийлүүлж алхаж чадаж байна, зарим салбарт урд нь ч гарч алхаж байна. Ийм үед бид өөрсдөө эвлэлдэн нэгдэж, хамтраад зүтгэж чадвал удахгүй улс эх орон минь сайхан болох байх. Өнөөдөр үнэхээр сайхан үйлчилгээ, сайн зүйлийг хүсэж үүнийгээ олж чадахгүй байгаа бол үүнийг өөрөө яагаад хийж, бүтээж болохгүй гэж. Манай залуу үеийнхэн бүгд эвлэлдэж нэгдэн, нэг зүгт чиглэвэл ихийг бүтээж чадна.

-Цаашдын эмнэлгийн зорилт нь юу вэ?

-Монгол Улс 2015-2019 оны байдлаар эмчилгээний зардалд жилд дунджаар 50 орчим сая доллар банкны гүйлгээгээр гадаадын орнууд руу явуулдаг. Энэ урсгалыг бид Монголдоо үлдээх болно. Гадаадын чадварлаг эмч нарыг өөрсдийн  багтаа нэгтгэж гадагшаа явж буй энэ мөнгөн урсгалыг зогсоох мөн эх орондоо өндөр хүчин чадалтай эмнэлгийг ашиглалтад оруулан гадаадад хийгдэх хүнд, хэцүү мэс ажилбаруудыг хийх зорилгыг тээн явж байна.

-Ярилцсанд баярлалаа.