УИХ-ын намрын ээлжит чуулган ирэх аравдугаар сарын 15-нд нээлтээ хийнэ. Энэ  чуулганаар хэлэлцэхээр хүлээгдэж буй  гол гол хуулийн төслүүдийн талаар товч мэдээлэл хүргэе.

-Шүүхийн шинжилгээний тухай хуулийн шинэчилсэн найруулга,

-Зөрчлийн тухай хуулийн шинэчилсэн найруулга,

-Эрүүгийн хуульд нэмэлт өөрчлөлт оруулах хуулийн төсөл,

-Хуульчийн эрх зүйн байдлын тухай хууль,

-Мөнгөн зээлийн үйл ажиллагаа зохицуулах тухай хууль,

– Монгол Улсын Үндсэн хуульд оруулсан нэмэлт, өөрчлөлтөд хууль тогтоомжийг нийцүүлэх, түүнтэй холбогдуулан авах арга хэмжээний тухай Улсын Их Хурлын 2020 оны 02 дугаар тогтоолд туссан төслүүд

– Монгол Улсын хууль тогтоомжийг 2024 он хүртэл боловсронгуй болгох үндсэн чиглэл батлах тухай Улсын Их Хурлын 2021 оны 12 дугаар тогтоолд заасан 2022, 2023 онд хэлэлцэх хуулийн төслүүд

– Шинэ сэргэлтийн бодлого батлах тухай Улсын Их Хурлын 2021 оны тогтоолоор баталсан нэн яаралтай хэлэлцэх болон өргөн мэдүүлэх хуулийн төслүүд;

– Хүнсний хангамж, аюулгүй байдлыг хангах талаар авах зарим арга хэмжээний тухай УИХ-ын 2022 оны 36 дугаар тогтоолд заасан 2022 онд хэлэлцэх хууль, тогтоолын төслүүд болон хуулиар тусгайлан заасан хугацаатай 64 асуудлыг хэлэлцэхээр тусгажээ.

Ингээд Зөрчлийн тухай хууль болон  Мөнгөн зээлийн үйл ажиллагаа зохицуулах тухай хуулийн төслийн талаарх зарим мэдээллийг дор хүргэе.

УИХ-ын хаврын чуулганы үеэр  ХЗДХ-ийн  сайд Х.Нямбаатар Зөрчлийн тухай хуулийг шинэчлэх тухай  мэдээлсэн. Зөрчлийн тухай хууль хэрэгжиж эхлээд таван жил болж буй ч энэ хугацаанд найман сая гаруй зөрчлийн хэрэг шийджээ. Тодруулбал,  жилд дунджаар 2.3 сая гаруй хувь хүн, хуулийн этгээд уг  хуулиар хариуцлага хүлээсэн байна. Нийт  зөрчлийн 98 хувийг Замын хөдөлгөөний аюулгүй байдлын журам зөрчих зөрчил эзэлж иржээ.  ХЗДХ-ийн сайд Х.Нямбаатар шинэчлэгдэж буй Зөрчлийн тухай хуулийн талаар ийнхүү хэлжээ.

-Төр торгож шийтгэхээс илүүтэй, зөвлөдөг, шалган тусалдаг чиглүүлдэг хяналт шалгалтын тогтолцоо, механизмыг ажиллуулах агуулгаар Зөрчлийн тухай хуулийн шинэчилсэн найруулгын төсөл орж ирсэн.

-Жагсаал цуглаан зохион байгуулах Журмын тухай хуулийг дагуулж өөрчилж байгаа. Энэ хүрээнд бид жагсаал хийхдээ заавал зөвшөөрөл авах тухай асуудал ярихгүй. Үндсэн хууль, Иргэний болон улс төрийн эрхийн пакт, түгээмэл тунхаглалд заасан эрхээ эдэлж, жагсаж цуглах гэж байгаа иргэд зөвхөн жагсаал цуглаан байгуулах гэж байгаа талаар холбогдох нутаг дэвсгэрийнхээ нэгжид л 24 цагийн өмнө нь мэдээлэх үүрэгтэй.

-Торгуулиа төлөхгүй бол дараах төрлийн үйл ажиллагаа хязгаарлагдана. Нэгдүгээрт, жолооны үнэмлэх нөхөж авах, сунгахыг хязгаарлана. Хоёрдугаарт, гадаад паспорт авах эрхийг хязгаарлана. Гуравдугаарт, төрийн албаны шалгалт өгөх эрхийг хязгаарлана. Өөрөөр хэлбэл, хүн бүр хууль шүүхийн өмнө тэгш эрхтэй байх Үндсэн хуулийн зарчмын хүрээнд явж байгаа. Зарим хэсэг нь эрх зүйн зөрчил гаргаад торгууль шийтгэлээ төлдөг, зарим нь 20, 30 жилээр төлддөгүй байж болохгүй.

Ломбардын үйл ажиллагааг цэгцэлж татвар төлөлтийг нэмэгдүүлнэ

Ломбард буюу барьцаалан зээлдүүлэх газрыг цэгцлэх зорилгоор Мөнгөн зээлийн үйл ажиллагааг зохицуулах тухай хуулийг УИХ-ын хаврын чуулганаар хэлэлцсэн ч батлалгүй орхисон. Өнөөдрийн байдлаар манай улсад  1000 орчим ломбард байдгаас татвар төлдөг нь тун цөөн. Тухайлбал, 2020 оны байдлаар 294 татвар төлөгчийн 33.5 тэрбум төгрөгийн борлуулалтын орлогоос 2.5 тэрбум төгрөгийн татвар төлжээ. Иймээс тус хуулиар ломбардын үйл ажиллагааг цэгцэлж, хэрэглэгчдийн эрх ашгийг хамгаалах талаар тусгаад байгаа юм. Хуулийн төсөл нийт найман бүлэгтэй.

Хуулийн үйлчлэх хүрээг банк, банк бус санхүүгийн байгууллага, хадгаламж, зээлийн хоршооноос олгох мөнгөн зээлийн үйл ажиллагаатай холбогдсон харилцаа болон хуульд өөрөөр заагаагүй бол иргэнээс олгох нэг удаагийн шинжтэй, эсвэл ашиг олох зорилгогүй зээлийн харилцаанд үйлчлэхгүй байхаар тусгажээ. Уг төсөлд мөнгөн зээлийн үйл ажиллагаа эрхлэгчдэд тодорхой шаардлага тавьж, бүртгэл, хяналттай болгох зохицуулалтыг тусгасан. Тодруулбал, нэгдсэн бүртгэлд бүртгүүлэлгүйгээр зээлийн үйл ажиллагааг ашгийн төлөө, байнга явуулах тохиолдолд хүү авах эрхээ алдаж, холбогдох зөрчлийн хэргийн хариуцлага хүлээлгэх нөхцөл бүрдэх юм.