Спорт

Жил бүрийн 08-р сарын 24 Коби Брайантын өдөр

Нийтэлсэн

3 жил өмнө

2022-08-24

Нийтэлч

Жил бүрийн 08-р сарын 24-ий өдрийг алдарт сагсан бөмбөгчин асан “Коби Брайантын өдөр” /Kobe Bryant Day/ болгон тэмдэглэж байх шийдвэрийг Калифорнийн Оранж Каунтигийн Хяналтын зөвлөлөөс /Orange County Board of Supervisors in California/ албан ёсоор баталсан бөгөөд чухам энэ өдрийг сонгосон нь түүний төрсөн 1978 оны 08-р сарын 23-нтай огт холбоогүй аж. Харин түүний Лос Анжелес Лейкерс багт байх хугацаандаа өмсөж байсан өмсгөлийн 8 болон 24 гэсэн дугааруудыг бэлгэдэн сонгосон өдөр гэнэ.

Брайант Филаделфиа Севентисиксерс /Philadelphia 76ers/ багийн тоглогч асан, Лос Анжелес Спаркс /Los Angeles Sparks/ багийн ахлах дасгалжуулагч асан Жөү Брайантын ганц хүү юм. Түүний эцэг эх нэгэн рестораны цэснээс харсан нэр болох Японы Кобэ хотын алдартай үхрийн махны нэрээр хүүгээ нэрлэжээ.

Аав нь НБА-ийн хүн байсан тул Коби Брайантыг гурван настайгаасаа эхлэн сагсан бөмбөгтэй нөхөрлөсөн гэж үздэг. Түүнийг бага байхад аав нь Италид тоглох болсноор гэр бүлээрээ нүүж, 13 настай байхад нь АНУ-д эргэн иржээ.

Өсвөр насандаа Коби сайн тоглодоггүй байв. Нэг удаагийн тоглолт дээр ямар ч оноо аваагүйдээ сэтгэлээр унаж, аавтайгаа цаашид яах талаараа ярилцахад аав нь “Чи муу тоглогч байсан ч гэсэн би чамд хайртай хэвээрээ байх болно” гэжээ. Аавынхаа үгэнд урамшиж, бэлтгэлдээ бүх анхаарлаа төвлөрүүлж, хичээнгүйлэн хөдөлмөрлөх болжээ. Үр дүнд нь ахлах сургуульд орохдоо хамгийн сайн тоглогчдын нэг болж, Үндэсний сагсан бөмбөгийн холбоо болон томоохон их сургуулиас ч урилга авав.

1996 онд ахлах сургуулиа төгсөхдөө их сургууль эсвэл NBA хэмээх хоёр сонголттой тулгарч, NBA-г сонгосноор ахлах сургуулиасаа Үндэсний сагсан бөмбөгийн холбооны тамирчин болжээ. Ингэснээр тэрбээр NBA-н хамгийн залуу тоглогч хэмээх тодотголыг зүүв.

Брайант, Шакил О’Нил нар Лэйкерс багийг 2000-2002 онд гурван удаа НБА-гийн аварга болгосон. 2003-2004 оны улирлын дараа О’Нил явж, Брайант Лэйкерсийн гол тоглогч болсон бөгөөд 2005-2006, 2006-2007 оны улирлуудад НБА-д оноогоор тэргүүлжээ. 2006 онд Брайант Торонто Рэпторсын эсрэг 81 оноо (хувийн дээд амжилт) авсан нь НБА-гийн түүхэнд хоёрт орох агуу амжилт болсон.

Тэрээр өдөрт 05:00-07:00, 11:00-14:00, 18:00-20:00 цагуудад бялдаржуулах төвд дасгал хийдэг байв.

Эрт эхэлснээрээ бусдаас илүү их хөдөлмөрлөх боломжтой болно гэж тэрээр боддог байжээ. Мөн тоглолтын бичлэгээ маш их үзэн алдаагаа ажиглаж, хэрхэн сайжруулахаа бодохын зэрэгцээ бусад өрсөлдөгчөө судалдаг байжээ.

Тэрээр 1 удаа Оскарын шагнал хүртэж, 5 удаа НБА-ын аварга болж, 2008 онд НБА-ын MVP, 2009, 2010 онд шувтаргын тоглолтын MVP болж, 18 удаа дараалан /1999 онд ажил хаялт болсон/ бүх оддын тоглолтонд орж, орох бүрдээ гарааны 5-д багтаж, 4 удаа бүх оддын тоглолтын MVP болж, 1997 онд цагирган дээрээс довтлох тэмцээнд түрүүлж, 2006 онд нэг тоглолтонд 35,4 оноо дунджилж, нийт 2,832 оноо авсан нь түүхэнд 7-рт бичигддэг байна. Мөн тэрээр 2008, 2012 оны олимпийн алтан медальтай.

Коби Брайант 2013 онд шагайны шөрмөсөө тасалсан байна. Хэдийгээр гэмтлээ эдгээж, дахин тоглосон ч эргэн сэдэрч, гэмтэл бэртэл нэмэгдсээр байсан тул 2016 онд зодог тайлжээ. Зодог тайлсныхаа дараагаас охиныхоо сургуулийн сагсан бөмбөгийн багийг дасгалжуулж байв. Харамсалтай нь агуу тамирчин маань 2020 оны 1-р сарын 23-нд охины хамт нисдэг тэргээр зорчиж яваад осолдож, хорвоог орхисон билээ.

Түүний дурсгалыг хүндэтгэх өдөр бүх насаараа амьдарсан гэж болох Лос Анжелес хотоор нь зочлохыг зөвлөхөөс гадна, эхнэртэйгээ хамтран 2007 онд залуучуудыг спортоор хичээллэхэд нь дэмжлэг үзүүлэх зорилготой байгуулсан “Коби болон Ванесса Брайнт нарын гэр бүлийн сан” /The Kobe and Vanessa Bryant Family Foundation (KVBFF)/-ийн үйл ажиллагааг дурсан, орон нутгийнхаа энэ чиглэлийн байгууллагуудад хандив өргөхийг хүсчээ. Одоо ч Брайнт болон охин Жианнагийн нэрэмжит “Мамба ба Мамбасита” / Mamba and Mambacita Foundation/ гэх залуу охидыг спортоор хичээллэхэд дэмжлэг үзүүлдэг байна.

Сэдвүүд:

Дэлгэрэнгүй ...

Спорт

Сүхбаатар аймгийн Онгон сумын 100 жилийн ойн барилдаанд аймгийн хурц арслан Н.Өсөхбаяр түрүүлжээ

Нийтэлсэн

2 сар өмнө

2025-04-07

Нийтэлч

24barimt

Сүхбаатар аймгийн Онгон сумын түүхт 100 жилийн ойд зориулсан Монгол улсын өсөх идэр харцага Дахын Одсүрэнгийн нэрэмжит улс, аймгийн алдар цолтой хүчит 128 бөхийн барилдаанд Сүхбаатар аймгийн Онгон сумын харьяат, “Хилчин” спорт хороо, ХЦ-0208 анги, “Эвт Чулуу” ХХК, “Нэгдэл” клуб, “Жавхлант” дэвжээний бөх, аймгийн хурц арслан Нямдоржийн Өсөхбаяр түрүүлж, Төв аймгийн Өндөрширээт сумын харьяат, “Сүлд” спорт хороо, ШШГЕГ 427-р анги, “Заамар Өгөөмөр Хайрхан” ХХК, “Дорнын Өртөө” ХХК, “Нэгдэл” клуб, “Батхаан Транс” ХХК, “Дүнжингарав” дэвжээний бөх, улсын заан Доржхандын Хүдэрбулга үзүүрлэв.

Дөрөвт Өвөрхангай аймгийн Төгрөг сумын харьяат, Нутгийн Буян групп, Барилга инженерийн цэргийн удирдах газар, “Их Монголын Хүчтэн” дэвжээний бөх, улсын арслан Ц.Бямба-Отгон, Ховд аймгийн Зэрэг сумын харьяат, “Аврагч” спорт хороо, “Монтед” Констракшн, “Асиан Сити” ХХК, “Валькан” групп, “Ховд” дэвжээний бөх, улсын заан Б.Бат-Өлзий нар шалгарлаа.

Наймд улсын харцага Б.Зоригтбаатар, улсын өсөх идэр начин Ч.Батчулуун, улсын начин Б.Түвшинтөгс, аймгийн арслан Ц.Төмөрцоож нар үлдэв.

Улсын цолд ойрхон бөхийн шагналыг Ховд аймгийн арслан Ц.Төмөржоожид гардуулсан юм.

Тус барилдааны түрүү бөх 10 сая, үзүүр бөх 6 сая, дөрөвт үлдсэн бөхчүүд тус бүр 2 сая төгрөгийн бай шагналыг хурдын удмын адуутай гардсан юм.

Дараагийн долоо хоногийн бямба гараг буюу дөрөвдүгээр сарын 12-ны 13:00 цагаас Монгол улсын Ерөнхий сайд, Улсын хошой баатар, Маршал Х.Чойбалсангийн нэрэмжит улс аймгийн цолтой 128 бөхийн барилдаантай.

Дэлгэрэнгүй ...

Спорт

“ХАРБИН-2025”: О.Мишээл 19, Г.Марал-Эрдэнэ 20 дугаар байрт орлоо

Нийтэлсэн

4 сар өмнө

2025-02-14

Нийтэлч

24barimt

БНХАУ-ын Харбин хотод “Харбин-2025” Азийн өвлийн спортын IX наадам долоо дахь өдрөө болов. Хоёрдугаар сарын 13-нд уран гулгалтын эмэгтэйчүүдийн чөлөөт үзүүлбэрийн ганцаарчилсан төрөлд 24 тамирчин оролцсон бол манай улсаас дасгалжуулагч Тэцүкацү Накашимагийн удирдлага дор О.Мишээл (55.30 оноо), дасгалжуулагч Рина Хорегийн удирдлага дор Г.Марал-Эрдэнэ (54.72 оноо) нар чөлөөт үзүүлбэрээ үзүүлж, О.Мишээл 19 дүгээр байр, Г.Марал-Эрдэнэ 20 дугаар байрт орлоо. Г.Марал-Эрдэнэ Азийн наадамд хоёр дахь удаагаа оролцсон бол О.Мишээлийн анхны Азийн наадам, мөн насанд хүрэгчдийн анхны тэмцээн нь энэ байлаа.

Тус төрөлд БНСУ-ын уран гулгагч, ДАШТ-ий хүрэл медальт Ким Чае Ёон (147.56 оноо) алтан медаль хүртэж, Япон улсын тамирчин, ДАШТ-ийн гурван удаагийн аварга, олимпын мөнгө, хүрэл медальт Каори Сакамото (136.87 оноо) мөнгө, Япон улсын тамирчин Ёшида Хана (136.44 оноо) хүрэл медаль хүртлээ. Монголын уран гулгалт, шорт трейк, гүйлтийн тэшүүрийн баг Азийн наадамд анх удаа бүрэн бүрэлдэхүүнээрээ оролцсон нь анхдагч үйл явдал болсныг нэмж тодотгоё.

Дэлгэрэнгүй ...

Спорт

Б.Алтанчимэг холимог тулааны ДАШТ-ээс Монголын баг тамирчдын анхны медалийг хүртлээ

Нийтэлсэн

7 сар өмнө

2024-11-08

Нийтэлч

24barimt

Узбекистан улсын нийслэл Ташкент хотод холимог тулааны залуучууд, насанд хүрэгчдийн дэлхийн аварга шалгаруулах тэмцээн энэ сарын 5-10-ны өдрүүдэд болж байна.

Нийт 85 орны 900 гаруй тамирчин өрсөлдөж байна.

Тэмцээний залуучуудын эмэгтэйчүүдийн 61.2 кг-ын жинд Монгол Улсын тамирчин, Азийн АШТ-ий хүрэл медальт Б.Алтанчимэг Узбекистаны тамирчин Покиза Баксриеваг ялснаар хүрэл медалийн болзол хангалаа.

Тэрбээр өнөөдөр мөнгөн медалийн төлөө Словак улсын тамирчин Европын аварга Эва Эрделиоватай тулалдах юм.

Б.Алтанчимэг холимог тулааны ДАШТ-ээс медаль хүртсэн анхны монгол тамирчин болж байна гэж Биеийн тамир, спортын улсын хорооноос мэдээллээ.

Дэлгэрэнгүй ...