Туркийн Стамбул хотын төв Таксим талбайн орчимд жуулчид иргэд олноороо хөлхдөг Истикляль гудамжинд дэлбэрэлт болж зургаан хүн амь үрэгдэн, 81 хүн бэртэж шархадсан хэрэг гарсан байна. Туркийн Ерөнхийлөгч Режеп Тайип Эрдоган “манай төрийн алба, тусгай хүчнийхэн энэ аймшигт хэргийг үйлдсэн байж болох буруутныг хайж байна” гэж ням гарагт телевизээр ард түмэндээ хандаж хэлжээ.

Туркийн дэд ерөнхийлөгч Фуат Октай харин энэ дэлбэрэлтийг амиа золиослогч эмэгтэй үйлдсэн гэсэн байна. “Халдагч нь эмэгтэй хүн байсан, тэр бөмбөг дэлбэлсэн. Энэ бол террорист  халдлага гэдгийг харуулж байна. Дэлбэрэлтийн улмаас зургаан хүн нас барж, шархдагсдын тоо 81 хүрлээ. Эднээс хоёр хүний биеийн байдал хүнд байна” гэж Октай хэлжээ.

Октайн хэлснээр бол дөрвөн хүн газар дээрээ нас барж, хоёр нь эмнэлэгт очоод нас баржээ. Туркийн Ерөнхий прокурорын газрын 14 мөрдөн байцаагч, шүүх эмнэлгийнхэнтэй хамтран мөрдөн шалгах ажилд орсон байна. “Энэ халдлагын ард хэн ч байлаа гэсэн, тэр манай оронд ч юмуу, ертөнцийн аль ч өнцөгт байсан бид түүнийг олохдоо л олно. Тэр хүмүүсийг Туркт авчирч шүүн таслах болно” гэж Октай мэдэгджээ.

Туркийн ерөнхийлөгч Эрдоган Балид болох Их-20-ийн орнуудын чуулга уулзалтад оролцохоор явахынхаа өмнө нисэх буудалд хийлгэсэн хэвлэлийн бага хурал дээрээ “Гэм буруутай этгээдүүд хариугаа хүртэх болно. Турк улсыг, турк үндэстнийг терроризмын тусламжтайгаар эзлэх гэсэн оролдлого өнөөдөр ч, маргааш ч бүтэхгүй” гэжээ.

Стамбул хотын амбан захирагч Али Ерликая дэлбэрэлтийг орон нутгийн цагаар 16:20-д болсон гэсэн байна. Тэр дороо цагдаагийн отряд, түргэн тусамж, гал сөнөөгчид, онцгой байдлын албаныхан хүрэлцэн иржээ.

Дүрс бичлэг дээр зоогийн газар, дэлгүүр, худалдааны төв олноороо байдаг Истикляль гудамжаар айж сандарсан хүмүүс гүйлдэж, шархдаж гэмтсэн хүмүүс гудамжинд хэвтэж, сууж байгаа нь харагдсан байна.

Энэ Истикляль гудамжинд ОХУ-ын консул байрладаг ч дэлбэрэлт эндээс хэдэн барилгын цаана болжээ. “Таксим талбай руу орох гудамжийг хааж, тэнгэрт нисдэг тэрэг эргэлдэж байна. Цагдаагийнхан хэв журам сахиулан түргэн тусламжийн тэрэг нааш цааш давхилдаж байна” гэж Би-би-сигийн сурвалжлагч Орла Герин газар дээрээс нь суралжлан дамжуулжээ.

Стамбул хотод хамгийн сүүлд 2017 оны нэгдүгээр сарын 1-нд калашниковын автомат буугаар зэвсэглэсэн этгээд шөнийн клубт дайран орж гал нээснээр  39 хүн амь үрэгдэж, 69 хүн шархдаж байсан юм.