Оросуудын зүгээс арваннэгдүгээр сарын 15-нд украины эрчим хүчний байгууламжуудад пуужингаар цохилт өгсөн нь эдний цэргийн тусгай ажиллагаа эхэлснээс хойшхи хамгийн өргөн хүрээтэй, том цохилт байлаа гэж Украины Эрчим хүчний сайд Герман Галущенко мэдэгдсэнийг “Укринформ” хэвлэлд бичсэн байна. “Энэ бол дайны эхнээс эрчим хүчний системд өгсөн хамгийн өргөн хүрээтэй буудлага байлаа” гэж сайдын хэлснийг хэвлэл иш татжээ.

Пуужингийн буудлагад эрчим хүчний дэд байгууламжууд, цахилгаан дамжуулах шугамууд өртсөн гэж тэр онцолсон байна.

Бий болсон нөхцөл байдлыг Украины ерөнхийлөгчийн Тамгын газрын дэд дарга Кирилл Тимощенко маш ноцтой гэжээ. Түүний хэлснээр бол долоон сая гаруй хэрэглэгч гэрэл цахилгаангүй болсон гэнэ. “Хэрвээ бид хүнээр тооцоолох юм бол бүр ч их тоо гарна” гэж тэр хэлжээ.

“Мягмар гарагторосууд украины нутаг руу голдуу  эрчим хүчний байгууламжууд руу 85 пуужингаар цохилт өгсөн, дахиад “20 орчим” пуужин харвах бололтой” гэж  Украины Ерөнхийлөгч Владимир Зеленский мэдэгдсэн байна. “Оросууд Украин руу,  манай хотууд руу, иэхвчлэн эрчим хүчний байгууламжууд руу 85 пуужингаар цохилт өглөө. Дахиад 20 орчим пуужин харваж магадгүй байна” гэж Зеленский Telegram сувагтаа нийтэлсэн дүрс бичлэгийн илгээлтдээ ярьжээ. “Энэ цохилтууд манай олон хотын эрчим хүчний байгууламжуудыг онилсныг бид мэдэж байна” гэж тэр онцолжээ.

Арваннэгдүгээр сарын 15-ны өдөр бүхийл Украин даяар агаарын түгшүүр зарласан байна. Оросууд Киев, Харьков, Львов, Житомир, Хмельницк, Ровненск, Сумск болон бусад мужуудыг пуужингаар харвасны улмаас орон даяар цахилгаан тасалдахад хүрсэн  байна.

Аравдугаар сарын 10-нд Крымын гүүрэнд дэлбэрэлт болсны дараанаас Оросууд  украины дэд бүтэц, эрчим хүчний байгууламжууд руу цохилт өгч эхэлсэн юм. Энэ хүрээндээ эрчим хүчний үүсгүүрүүд, батлан хамгаалах үйлдвэрлэл, цэргийн удирдлагын болон холбооны байгууламжуудыг пуужингаар харваж, бөмбөгдөж байгаа юм. Үүнээс хойш украины бүс нутгуудад өдөр бүр, заримдаа орон даяар агаарын түгшүүр зарлаж байгаа юм.

Украины эрчим хүчний байгууламжийн бараг 40 хувь нь, үүн дотор цахилгаан станцууд оросын бөмбөгдөлт, пуужингийн улмаас гэмтэж их хэмжээгээр цахилгаан тасалж хязгаарлахад хүрээд байна гэж Украины Ерөнхийлөгч Владимир Зеленский арваннэгдүгээр сарын 1-нд мэдэгдсэн. Үүний улмаас орон даяар  цахилгаан хязгаардлах график гарган мөрдөж, ард иргэдийг эрчим хүчээ хэмнэхийг уриалаад байна.

Оросын пуужин Польшийн нутагт унаж дэлбэрлээ

Арваннэгдүгээр сарын 15-ны орой Польшийн Пшевлдув тосгоны районд, Украины хилийн ойролцоо тариан талбайд оросын хоёр ч пуужин унаж дэлбэрсэн хэрэг гарлаа гэж польшийн ZET радиостанц мэдээллээ. Дэлбэрэлтийн улмаас хоёр хүн амь үрэгдсэн байна. “Орон нутгийн цагаар 15:40-д Люблин мужийн Хрубешувск суурингийн Пшеводув тосгоны нутаг дэвсгэрт оросын пуужин дэлбэрч польшийн хоёр иргэн амь үрэгдлээ” гэж Польшийн Гадаад хэргийн яамны мэдэгдэлд дурджээ.

Польшийн Засгийн газар Үндэсний Аюулгүй байдлын зөвлөлийн шуурхай хуралдаан хийж цэргийн хэд хэдэн ангид байлдааны бэлэн байдал зарласан  байна.

Болсон үйл явдалтай холбогдуулан Польшийн Гадаад хэргийн яам ОХУ-ын Элчин сайдыг  дуудсан гэж мэдээлжээ.

Тус улсын  дорнод нутагт Украины хилийн ойролцоох Пшеводув тосгоны районд болсон халдлагатай  холбогдуулан Польшийн Гадаад хэргийн яам ОХУ-ын Элчин сайд Сергей Андреевыг дуудлаа гэж гадаад хэргийн яамны албан сайтад мэдээлсэн байна.

“Гадаад хэргийн сайд Збигнев Рау ОХУ-ын Элчин сайдыг Гадаад хэргийн яаманд дуудаж, болсон үйл явдлыг нэн даруй тодруулахыг шаардлаа” гэж Гадаад хэргийн яам мэдэгджээ.

Харин ОХУ-ын Батлан хамгаалах яам үйл явдлыг өдөөн хатгасан мэдэгдэл гээд үйл явдлын газар дээрээс авсан зургаа нийтэлснийг үзэхэд оросын зэвсэгтэй ямар ч холбоогүй зүйл байна гээд оросын цэргийнхэн энэ өдөр украин-польшийн хилийн ойролцоо пуужингаар цохилт өгөөгүй хэмээн няцаасан байна.