Оросын пуужингийн цуврал цохилтуудын улмаас Украины эрчим хүчний системийн 50 хувь нь жагсаалаас гарсан байдалтай байгааг тус улсын Ерөнхий сайд Денис Шмыгаль мэдэгдсэн байна. Цахилгаан болон усны хомсдолын улмаас Украинд энэ өвөл хүмүүнлэгийн сүйрэл нүүрлэж байгааг НҮБ анхааруулж байна.

Украин дахь оросын цэрэг дайны ажиллагаа эхэлснээс 9 сарын хугацаан дахь хамгийн ширүүн бөмбөгдөлтүүдийн дараа цахилгаан эрчим хүчний хангамжийг сэргээх ажил Киевт анхны цас орж хүйтэрсэн энэ үед явагдаж байгааг эрх баригчид мөн мэдээлж байна. Европын холбооны зүгээс Украинд хэлбэрдэлтгүй дэмжлэг үзүүлэхийг амлаж, ОХУ-ын хөрш улсынхаа эсрэг хийж байгаа “харгис дайны”-г эрс зэмлэн буруутгаж байгаагаа мэдэгдсэн Европын холбооны комиссын дэд ерөнхийлөгч Валдис Домбровскийтай Ерөнхий сайд Шмыгаль хамтарсан хэвлэлийн хурлын үеэр мөн улсынх нь зүүн болон өмнөд хэсэгт ширүүн тулаанууд болж байгааг дурджээ.

Украины ерөнхийлөгч Зеленский дайнаас өмнө 44 сая шахам хүн аж төрж байсан Украин улсад өнөөдрийн байдлаар 10 сая шахам хүн гэрэл цахилгаагүй сууж байгааг мэдэгдсэн байна. Түүний хэлснээр, зарим бүс нутагт цахилгааны албадан хязгаарлалт хийхэд хүрч байгаа юм байна. Киевийн цахилгаан сүлжээ” хувийн компаниас өмнө нь, Украины нийслэлд урьдаас анхааруулалгүй цахилгааны гэнэтийн хязгаарлалт хийх шаардлагатай байгаа тухай мэдэгдэж байсан бол, сүүлд ирсэн мэдээллээр, Украины төрийн өмчит “Укр энерго” компани ачааллыг тэнцвэржүүлж, Киевийн цахилгаан хангамжийг хуваарийн зохицуулалтад оруулснаа мэдээлжээ. Оросын батлан хамгаалах яам пүрэв гарагт Украины аж үйлдвэрийн болон батлан хамгаалах байгууламжууд, түүний дотор пуужин үйлдвэрлэх байгууламжид цохилт өгөхийн тулд холын тусгалтай зэвсэг хэрэглэсэн гэдгээ мэдэгджээ.