Дэлхий дахинд

Ухрахыг зөвлөсөн Оросын генерал дарамтад орж байна

Нийтэлсэн

2 жил өмнө

2022-11-22

Нийтэлч

Оросын Армагеддон генерал гэж нэрлэгддэг Сергей Суровикин энэ сарын 9-ний өдөр Херсон болон Днепр мөрний баруун эргээс ухрахыг зэвсэгт хүчиндээ зөвлөсөн. Тэрбээр өдгөө энэ шийдвэр нь зөв байсан гэдгийг нотлох дарамт шахалтад оржээ. Нөлөө бүхий цэргийнхэн энэ шийдвэрт шүүмжлэлтэй хандаж буй. Тухайлбал, телеграмд хагас сая гаруй дагагчтай Владлен Татарский “Бид юуны тулд цусаа урсгаж байгаа юм бэ? Зеленский яаж Херсонд тайван ирж чадаж байна? Түүний толгой дээр дрон буусан бол үнэхээр сайхан байх байлаа” гэх мэтээр тэр дургүйцлээ илэрхийлсэн байна. Мөн Оросын үндсэрхэг үзэлтэн Александр Дугин ч Суровикинд шахалт үзүүлж эхлэв.

Зарим хүн Украины эрчим хүчний дэд бүтцийг бөмбөгдөх кампанит ажлаа эрчимжүүлэхийг Суровикинаас шаардах болжээ. Энэ тактик нь Украиныг хэлэлцээрийн ширээний ард суулгах зорилготой гэж үзэж байна. Оросын хамгийн алдартай үндсэрхэг үзэлтэн, ток шоуны хөтлөгч Владимир Соловьев өнгөрсөн долоо хоногт Суровикинд хандаж уриалга хүргүүлсэн. “Оросын баатар, армийн генерал Суровикинд хандаж уриалах нь: Би та бүхнээс эрчим хүчний дэд бүтцийг бүрэн устгаж дуусгахыг хүсч байна” гэж тэр хэлжээ. Харин “RT” телевизийн ерөнхий редактор Маргарита Симонян “Бид таны гайхалтай үр дүнг хүлээж байгаа шүү” гэж хэлсэн.

Чечень, Сирийн дайнд оролцож явсан 56 настай Суровикин нь ерөнхийлөгчийн нэрэмжит өргөмжлөлөөр шагнуулж байсан. Түүний зөвлөгөөний дагуу Москва цэргээ татсанаар техник хэрэгслээ хэмнэж, цэргээ дахин байршуулах боломжтой болно гэж ажиглагчид тооцоолжээ. Цэргүүдийн зарим нь өмнөд нутгаас зүүн зүг рүү шилжсэн. ОХУ Херсоноос эргүүлэн татсан хүчнийхээ тусламжтайгаар баруун зүгт гурав дахь фронтоо нээхээр завдаж байж магадгүй аж. Херсоноос ухарсан явдлыг АНУ-ын цэргийн албан тушаалтан хэлэхдээ “Оросын өмнөх ухралттай харьцуулахад харьцангуй эмх цэгцтэй байсан” гэжээ.

Сергей Суровикиныг томилсон нь Путин болон Сергей Шойгуг олон нийтийн шүүмжлэлээс тусгаарлах гэсэн оролдлого гэж ажиглагчид үзэж байна.

Эх сурвалж: REUTER

Сэдвүүд:

Дэлгэрэнгүй ...

Дэлхий дахинд

БНСУ даяар галын нөхцөл байдал ноцтой түвшинд хүрснийг зарлалаа

Нийтэлсэн

2 долоо хоног өмнө

2025-03-26

Нийтэлч

24barimt

2025 оны гуравдугаар сарын 26-ны өглөөний 07:30 цагийн байдлаар БНСУ даяар галын нөхцөл байдал ноцтой түвшинд хүрсэн гэж зарласан бөгөөд энэ нь гал түймрийн хамгийн дээд түвшин юм.

Одоогийн байдлаар нас барсан хүмүүсийн тоо 18, түлэгдэж угаартсан хүмүүсийн тоо 19 болж, нийт 37 хүн амь нас, эрүүл мэндээрээ хохирсон байна.

Гал түймрийн гарал үүсэл нь тодорхой болж эхэлсэн бөгөөд салют буудуулах болон талийгаачийн булш эргэж байх үед гал алдсан нь гол шалтгаан болсон гэж үзэж байна.

Мөн аюултай нөхцөл байдал үүссэнтэй холбогдуулан нийт 27,000 орчим иргэнийг аюулгүй газар нүүлгэн шилжүүлж, 1,600 иргэнийг түр хоргодох байранд байрлуулжээ.

Гал сөнөөгчид болон цэргийн 5000 гаруй албан хаагч, 146 нисдэг тэрэг дайчлагдан ажиллаж байгаа ч хуурай салхи, хүнд нөхцөл байдлаас болж унтраахад хүндрэлтэй байна.

Гуравдугаар сарын 26-ны үдээс хойш хүчтэй салхи шуурах төлөвтэй байгаа тул иргэдийг аюултай нөхцөл байдлаас урьдчилан сэргийлж, хяналттай байхыг анхааруулж байна.

Консулын газар нь галын голомтын аюултай бүсэд оршин суугаа Монгол Улсын иргэддээ яаралтай үед холбогдох шуурхай утсыг ажиллуулж байна гэж Пусан хотод суугаа Консулын газраас мэдээллээ.

Дэлгэрэнгүй ...

Дэлхий дахинд

Сөүл хотод авто зам цөмөрч мотоциклтой иргэн унажээ

Нийтэлсэн

2 долоо хоног өмнө

2025-03-25

Нийтэлч

24barimt

Өчигдөр буюу даваа гарагт Сөүл хотод авто зам цөмөрч, мотоциклтой иргэн унасан байна. Одоогоор тус иргэнийг аврах ажиллагаа үргэлжилж байгаа аж.

Орон нутгийн цагаар өчигдөр орой 6 цагийн үед Гандун дүүрэг дэх бага сургуулийн ойролцоох авто зам цөмөрч, бараг 20 метрийн өргөнтэй нүх үүссэн байна.

Тус нүх зургаан эгнээтэй замын дөрвийг нь хамарч байгаа бөгөөд нэмж томрох эрсдэлтэй байгаа аж. Улмаар Сөүл хотын захирагч яаралтай арга хэмжээ авахыг үүрэгджээ.

Одоогоор зам цөмөрсөн шалтгааныг тодруулахаар ажиллаж байна.

Гэхдээ албаныхны урьдчилсан байдлаар үзэж буйгаар зам цөмөрсөн шалтгаан нь замын доорх ус дамжуулах хоолой хагарснаас үүдсэн байж болзошгүй гэв.

Осол гарсан замын доор метроны есдүгээр шугамын өргөтгөлийн ажил мөн хийгдэж байжээ.

Дэлгэрэнгүй ...

Дэлхий дахинд

Өмнөд Солонгос даяар 30 шахам ой хээрийн түймэр гарав

Нийтэлсэн

2 долоо хоног өмнө

2025-03-24

Нийтэлч

24barimt

Өмнөд Солонгосын зүүн өмнөд хэсэгт өнгөрсөн амралтын өдрүүдээр 30 шахам ой хээрийн түймэр гарчээ. Тодруулбал, 29 байршил гарсан гал түймрийн улмаас дор хаяж дөрвөн хүн амиа алдаж, зургаан хүн шархдаад байна. Мөн 19 км2 талбай шатсан бөгөөд галт тэрэг, зарим авто замын хөдөлгөөнд саад учирчээ.

Бямба гаригийн орой засгийн газар зарим бүс нутагт гамшгийн онц байдал зарлажээ. Харин Ням гаригийн өглөө ихэнх түймрийг унтрааж, зургаан газар л үлдсэн байна.

Гал унтраахад 1600 орчим гал сөнөөгч, 35 нисдэг тэрэг, олон арван галын машин дайчилжээ.

29 түймэр янз бүрийн шалтгаанаар гарсан бөгөөд тэдгээрээс дурдвал, Санчеон хотын түймэр л гэхэд тариачны зүлэг хадагч шатсанаас болжээ. Мөн Бусанаас холгүй орших Гимхэ хотод хог шатаах зуухнаас үүдэлтэй гал гарсан байна. Цаг агаар хуурай, салхитай байгаа тул гал түймэр амархан тархаж байгааг албаныхан анхааруулж байна. Гурав, дөрөв, тавдугаар сард Өмнөд Солонгос хамгийн хуурай цаг агаартай байдаг. Мөн гал түймэр гарсан зарим газар нь уулархаг бүс нутаг байгаа тул аврагчид хүрч очиход хүндрэлтэй байгаа аж.

Өмнөд Солонгосын ерөнхийлөгчийн үүрэг гүйцэтгэгч Чой Сан Мок галыг түргэн унтраахын тулд боломжит бүх техник хэрэгсэл, хүн хүчийг дайчлахыг тушаажээ.

Дэлгэрэнгүй ...