Жо Байдены засаг захиргаа Африкт хүнсний аюулгүй байдлыг хамгаалахад туслахын тулд 2.5 тэрбум америк долларын хүмүүнлэгийн тусламж үзүүлэхээ мэдэгдсэн байна.

АНУ, Африкийн удирдагчдын дээд хэмжээний уулзалт энэ долоо хоногт Вашингтон хотноо болсон юм.

Мягмар гарагт эхэлсэн дээд хэмжээний уулзалтад Африкийн 49 улс, Африкийн холбооны төлөөлөгчид, иргэний нийгэм, хувийн хэвшлийнхэн оролцсон байна.

Ерөнхийлөгч Жо Байден энэхүү гурван өдрийн дээд хэмжээний уулзалтаар Африкийн түншүүдтэй харилцан хүндэтгэх, нийтлэг ашиг сонирхол, үнэт зүйлсийн зарчимд тулгуурласан харилцаа холбоог бэхжүүлэх хүчин чармайлт гаргасан юм.

Энэ нь мөн АНУ, Африкийн тив болон манай дэлхийн хамтын нийгэмлэгийн ирээдүйд нэн чухал гэж тодорхойлсон гол салбаруудын талаар Африкийн түншүүдийнхээ байр суурийг сонсож, хамтран ажиллах боломжийг нээсэн байна.

Африкчууд ган гачиг, үерийн улмаас хүнсний аюулгүй байдалд онц ноцтой байдал үүсээд байгаа юм. Орос-Украйны дайны уршгаар үр тариа, бордооны тээвэрлэлтийг зогсоосон нь хүнсний хямралыг улам хүндрүүлсэн.

Жо Байдены засаг захиргаа Африкт 11 тэрбум гаруй америк долларын хүмүүнлэгийн тусламж үзүүлээд байна. Ерөнхийлөгч Жо Байден хүнсний өндөр үнэ, худалдааны саад бэрхшээл нь тус тив даяарх олон сая хүний амь нас, амьжиргаанд сөргөөр нөлөөлж байгааг дурджээ.

Иймд Африкийн айл өрхүүдийг өлсгөлөнд нэрвэгдэхээс сэргийлэхийн тулд дахин 2.5 тэрбумын тусламжийн багцыг зарласан юм. Түүнчлэн, тэрбээр Африк тив нь асар хурдацтай өсөн нэмэгдэж буй хүн ам, байгалийн асар их нөөц баялагтай тул НҮБ-ын Аюулгүйн зөвлөлд байнгын төлөөлөгчийн санал хураалтад оролцох боломжтойг цохон тэмдэглэсэн байна.

Үүнээс гадна Жо Байден мөн “Долоогийн бүлэг” болон Хорийн бүлгийг Африкийн хүнсний аюулгүй байдлын асуудалд анхаарахад нь түлхэц болохоо мэдэгджээ.

Цагаан ордны тэргүүн Жо Байден, Африкийн дуу хоолой, манлайлал, инноваци зэрэг нь дэлхийн хамгийн тулгамдсан сорилтуудыг шийдвэрлэхэд чухал ач холбогдолтойг онцлон тэмдэглэжээ.