Цахим орчинд үг, үйлдлээрээ үлгэрлэдэг олон залуучууд бий. Хоёрхон хоногийн өмнө монгол ахуйг шигтгэсэн этгээд загварын эрээн алаг чимэглэлтэй хувцас өмссөн нэгэн өрөөл бусдад пүүз, гутал бэлэглэсэн эерэг энергитэй бичлэг цахим орчноор тархаж, олон хүнээс А үнэлгээ авч, урмын үгсээр “услагдсан”. Хөлс хүчээ дуслуулж, хөдөлмөрлөж олсон зүйлээрээ бусдыг баярлуулж, нийгэмд эерэг энерги түгээсэн түүнийг М.Сандаг гэдэг. Тэрбээр “Z Sneakers Shop” дэлгүүрийг ажиллуулдаг. Нар мандахаас сар “шингэх” хүртэл ажилладаг Монголын мянга мянган залуусын нэгээхэн хэсэг.
“Баян цатгаландаа биш ээ. Бусдыг баярлуулах чин сэтгэл нь чухал” хэмээн хэлэх М.Сандаг 100 орчим хүнд пүүз, гутал бэлэглэсэн нь олон нийт алга таших шалтгаан болсон билээ. Орон нутгаас нийслэлийг зорьж, эмчид үзүүлэхээр ирсэн эмээгээс эхлээд иргэдийн амар тайван, аюулгүй байдлыг сахин хамгаалдаг цагдаа, хөөр баяслаар дүүрэн хүүхдүүд гээд Улаанбаатар хотын өнцөг булан бүрээр явж тараасан түүний нийт гутлын үнэлгээ нь найман сая төгрөг. Бусдыг баярлуулсан сэтгэлийн хариу буцаж ирэхдээ бороо мэт асгардаг. Бичил бизнес эхлүүлж, эрхэлж байгаа тэрбээр өөрийн боломжийн хүрээнд нийгмийн хариуцлагаа ухамсарлаж, олон хүнд өглөгийн гараа сунгаж, хандивын ажилд идэвхтэй оролцдог нэгэн. Түүнтэй ярилцсанаа хүргэж байна.
–Таны бичлэгийг үзээд бахарлаж, бахархах сэтгэл төрлөө. Өөрийгөө уншигчдад танилцуулна уу?
-Намайг М.Сандаг гэдэг. Говь-Алтай аймагт төрсөн. КТМС-ийг Программ хангамжийн мэргэжлээр төгссөн. Дараа нь, бизнесийн удирдлагаар магистрийн зэрэг хамгаалсан. Гурван жилийн өмнө хувийн компанид маркетингийн менежерээр ажилладаг байсан. Одоо эхнэрийнхээ хамт хувийн бизнесээ эхлүүлээд явж байна. “Z Sneакерs shop”-ыг нээгээд найман сар болж байна.
–Таны хүмүүст пүүз болон гутал бэлэглэсэн талаарх бичлэг цахим орчинд багагүй хандалт авсан байна лээ. Ийм санаачилга яагаад гаргах болсон юм бэ?
-Бизнес хийж ашиг олж байгаа бол тодорхой хэмжээгээр эргээд гаргах ёстой гэж боддог. Сайн үйлсийн аянд олон удаа оролцсон. Түүний нэг хэсгийг бичлэг болгон баримтуулж авч үлдсэн нь хүмүүст гутал, пүүз бэлэглэх байсан. Тухайн үед бичлэгээ үзэхэд олон хүнээс урмын сайхан үгс сонсч, эерэг энерги авлаа. Сайн үйлсийн аянаа үргэлжлүүлнэ. Аливаа арга хэмжээг зохион байгуулахад нэн түрүүнд Пи-Ар маягаар хийх биш, бодит ажил болгох нь чухал. Ихэвчлэн амьжиргааны төвшин доогуур хүмүүст туслах эсвэл баярлуулдаг. Харин би тэгж ялгахыг хүсдэггүй. Яагаад гэхээр, энэ бизнесээ эхлүүлсэн цагаасаа цаг наргүй хөдөлмөрлөсөн. Өөр шигээ ажилладаг хүмүүсийг үнэлж, баярлуулмаар санагдсан. Цагдаа, магадгүй ус түгээдэг худгийн эгчийг сонгох нь зүгээр санагдсан. Өвөл болох гэж байгаа учраас настай хүмүүсийг ч давхар баярлуулсан. Нийт 100 орчим хүнд бэлэглэсэн.
–Танихгүй хүнд гэнэтийн бэлэг барихаар хэрхэн хүлээж авч байна. Баярлах гайхах зэрэгцсэн байх даа?
-Эхлээд Хархорин зах дээр очсон. Жижиглэнгийн бараа зараад өдөржин гадаа суудаг эмээ нар тэнд их байдаг. Тиймээс урт түрийтэй дулаахан гутал бэлэглэсэн. Тэдний амар мэндийг мэдээд, урмын сайхан үг хэлээд, хувиараа сайн үйлсийн аян хийж байгаагаа учирласан. Анх орон нутгаас эмнэлэгт үзүүлэхээр ирсэн эмээтэй уулзаж, ярилцсан. “Эмээ нь хөдөөнөөс ирлээ” гээд л инээгээд их сайхан хүлээж авсан. “Баярлалаа. Буян нь дэлгэрэг” гээд үнсэхэд ээжийгээ санасан. Ээж маань Швейцарьт амьдардаг. Ээжээсээ хол байгаа болоод ч тэр үү эмээ нараас урмын үг сонсоод сэтгэл их хөдөлсөн дөө. Хүмүүст гутал, пүүз бэлэглэж байхдаа ямар нэг байдлаар олны анхаарал татахыг хүсээгүй. Бусдыг сэтгэлээрээ баярлуулахыг зорьсон. Хэн хэндээ сайхан үг хэлж, хэн хэндээ эерэг сэтгэгдэл төрүүлсэн өдөр болж өнгөрсөн гэж бодож байна.
–Гэр хорооллын гудамжинд сагс тоглож байсан хөвгүүдэд пүүз бэлэглэсэн байна лээ. Тэдгээр хүүхдийн хүсэн хүлээж байсан бэлэг юм шиг санагдсан?
-Хамгийн гэгээн ертөнц хүүхдүүд байдаг. Тиймээс хүүхдүүдийг баярлуулах сайхан. Сагс тоглож байсан хөвгүүд дээр очоод пүүз бэлэглэсэн. Бүгдээрээ баярлаж байна лээ. Арваннэгдүгээр сарын дундуур ахиж сайн үйлсийн аян хийхээр төлөвлөсөн. Хийсэн ажлаасаа урам авч, хийж бүтээхийн хүсэлд автагдаж, илүү олон хүнд бодит тусламж үзүүлэхийг зорьж байна.
–Нийт хэдэн хүнийг баярлуулсан бэ. Мөнгөн дүнд шилжүүлээд бодвол хэдэн төгрөг болох бол?
-50 пүүз, 50 гутал бэлэглэсэн. Машиныхаа тээш, суудлыг дүүргээд гарсан. Сүхбаатарын талбай, Хархорин зах, 21 дүгээр хороолол, Хайлааст гэсэн маршрутаар явсан. Миний бэлэглэсэн пүүз, гутал манай дэлгүүрт худалдаалагдаж байгаа. Бэлгэнд өгсөн пүүз нь гэхэд 80, гутал нь 75-85 мянган төгрөгийн үнэтэй. Нийт найман сая төгрөг орчим болох байх. Хүнд сэтгэлээ шингээж бэлэглэж байгаа учир чанарыг бас эрхэмлэх хэрэгтэй.
–Найман сая төгрөгийн бараа бусдад бэлэглэсэн гэхээр таныг хөрөнгөлөг гэж харах хүмүүс байж магадгүй…?
-Мэдээж би баян тансаг амьдралтай хүн биш. Бизнес хийж байгаа болохоор тодорхой хэмжээний ашиг олдог. Бусдыг баярлуулах гэсэн сэтгэлдээ хөтлөгдөж хийсэн. Хүн баярлуулж сайхан энерги авсан. Пүүз бэлэглэлээ гээд би дампуурахгүй. Харин ч тэр зүйлийг хийснээрээ олон хүнийг баярлуулж, бусдад үлгэр дуурайлал үзүүлсэн байх. Бичлэг тавигдсаны дараа хүмүүс утсаар ярьж, баярласнаа илэрхийлж, “Ээжийгээ дагуулж очоод гутал авна” гэж хэлсэн. Алдагдал гэхээсээ илүү онолт гэж ойлгож байна.
–Монголд маш олон бизнесийн байгууллага үйл ажиллагаагаа явуулж байна. Энэ дундаас нийгмийн хариуцлагаа ухамсарлаад бусдад тусалдаг нь гарын хуруунд багтах цөөн. Залуу хүнийхээ, бизнес эрхэлдэг байгууллагын эзний хувьд олон удаа сайн үйлсийн аянг зохион байгуулж оролцсон гэсэн?
-Бизнес хийхэд сайн, муу тал байдаг. Бизнес хийж байгаа бол нийгэм рүүгээ чиглэсэн, өөрийн боломж бололцоогоороо бусдад тусалж, баярлуулах хэрэгтэй. Иймэрхүү ажил хийгээд явж байгаа мундаг залуус зөндөө бий.
–Таны цаашдын зорилго юу вэ?
-Зарим хүмүүс өмссөн хувцас, зүүсэн цаг, унаж яваа машинаараа гангардаг. Миний хувьд урдаа тавьсан зорилго, намайг дэмжиж түшиг тулгуур болдог хайртай ханиараа гангарч амьдардаг. Одоогоор ажлын байр түрээслэж байна. Өөрийн гэсэн обьекттой болчихвол олон зүйлийг хийхээр төлөвлөсөн. Маш олон ч хүнийг баярлуулна.
С.Ичинхорлоо
