2019 оны 7 сарын 30-ны өдөр, АНУ-ын Азийн сангаас санаачлан, НҮБ-аас зарласан хүний наймаанаас урьдчилан сэргийлэх “Хөх Зүрх аян”-ы өдрийн “Засгийн газартаа, хүн худалдаалах гэмт хэрэгтэй идэвхтэй ажиллахад нь уриалцгаая!” олон улсын уриалгад эв санааны нэгдлээ илэрхийлэх уулзалтыг зохион байгуулсан.

Жил бүрийн “Хөх Зүрх аян”-ы хүрээнд уриалга гарган ажилладаг бөгөөд 2019 онд НҮБ-ын Ерөнхий нарийн бичгийн дарга А. Гуттереш болон НҮБ-ын хар тамхи, зохион байгуулалттай гэмт хэрэгтэй тэмцэх хэлтсийн /UNODC/ дарга Юрий Федотов нар тус тус мэдэгдэл хийснээс гадна, 7 сарын 1-ээс 30-ныг хүртэл дөрвөн долоо хоногийн турш мөрдөж ажиллах удирдамжийг НҮБ-ын төрөлжсөн байгууллагууд, олон улсын байгууллагуудаар дамжуулан, улс орон бүрийнхээ засгийн газарт, идэвхтэй ажиллахыг уриалах, хүн худалдаалах гэмт хэргийг үйлдэгчдэд бодит ял оноох, хэргийг шүүн таслахад нөлөөлөл үзүүлж, чанга дуу хоолойгоор ажиллахыг уриалсан уриалгыг удирдлага болгон хүргүүлсэн. Уг удирдамжийн дөрөв дэх 7 хоног буюу 7 сарын 22-30-ны өдрүүдэд #Endhumantrafficking #Humantrafficking зэрэг албан ёсны хаштагуудыг ашиглан, Дэлхийн өдрийн материалуудыг нийгмийн сүлжээнд хуваалцаж, мэдээллийг түгээж ажиллахыг уриалсан.

“Хөх Зүрх аян”-ы “Яг одоо тэмц!” уриалгад, АНУ-ын Азийн сан, Олон Улсын Шилжилт Хөдөлгөөний байгууллага, Олон Улсын Хөдөлмөрийн байгууллага, Хүйсийн Тэгш Эрхийн Төв, Хүний эрх хөгжил төв, Монголын Эмэгтэйчүүдийн Сан, ЭКПАТ Монгол байгууллага, Анбаунд Монгол байгууллага, Талита Ази, Хүүхэд Өмгөөлөл төв болон Хүний наймаатай тэмцэх ТББ-уудын сүлжээ, хар тамхи, мансууруулах бодисын хор хөнөөлтэй тэмцэх сүлжээ зэрэг хүний эрх, хууль эрх зүй, хохирогч хамгаалал, урьдчилан сэгийлэх, нөхөн сэргээх, сургалт нөлөөллийн чиглэлээр ажилладаг байгууллагууд эв санааны нэгдлээ илэрхийлсэн.

Тус уулзалтаас гарсан, “Жил бүрийн 7-р сарын 30-ыг НҮБ-аас Хүн худалдаалах гэмт хэрэгтэй тэмцэх олон улсын өдөр болгон тэмдэглэдэг билээ. Тиймээс өнөөдөр Монгол улсад энэ чиглэлээр үйл ажиллагаа явуулдаг төрийн бус болон олон улсын байгууллагууд уулзаж тулгамдаж буй асуудлуудыг ярилцаж хэлэлцлээ. Хэлэлцүүлгийн үр дүнд олон улсын жишгийг дагаж Монголын төр засгийг тус гэмт хэрэгтэй тэмцэх чиглэлээр 4P буюу Prevention – Урьдчилан сэргийлэх, Protection – Хамгаалах, Prosecution – Хэрэг хянан шийдвэрлэх,  Partnership – Хамтын ажиллагааг хөгжүүлэх чиглэлээр цогц бодлого боловсруулж, идэвхтэй ажиллахыг уриалж байна” гэсэн уриалгыг дэмжиж, эв санааны нэгдлээ илэрхийлэн, цахим орчинд мэдээллийн давлагаа өрнүүлсэн.

Мөн “Хөх Зүрх аян”-ы Дэлхий нийтийн өдөр 7 сарын 30-аас хойш сар бүр тогтмол уулзаж, үйл ажиллагааны мэдээлэл солилцох, тулгамдаж буй асуудлуудаа зөвлөлдөх, шийдлийг олох, хамтын ажиллагаа түншлэлийг бэхжүүлэх боломжуудыг туршиж, харилцан чадавхжих эв санааны платформ хөгжиж байна.

#Endhumantrafficking #Humantrafficking #Solidaritymatters #Ягодоотэмц!