Поп хөгжмийн урлагийн “гүнж” хэмээгддэг нэрт дуучин Бритни Спирс бага залуудаа алдар нэрд хүрсэн ч 2007 оноос хойш хувийн амьдрал болон карьер нь хүнд байдалд орсон билээ. Дуучин бүсгүй санхүүгээ бие даан захиран зарцуулах эрхээ төрсөн эцэгтээ алдаж, бүх эрх мэдэл нь эцгийнх нь мэдэлд шилжин, сэтгэл зүйн хувьд гүн хямралд ороод байв. Тэгвэл Бритниг чөлөөлөхийг уриалсан #FreeBritney олон нийтийн хөдөлгөөн 2008 оноос өрнөснөөр дэлхий даяар Бритнигийн төлөө дуу хоолойгоо өргөж, аавынх нь олон жилийн дарангуйлал, сэтгэл зүйн хүчирхийллийг таслан зогсоохын төлөө нэгдэх болсон юм.

Энэ сарын 12-нд олон жил үргэлжилсэн шүүх хурал “арай гэж” өндөрлөж, Бритнигийн эцэс Жэймс Спирсийг асрамжаас хасч, Бритниг албан ёсоор “чөлөөллөө”.

Бритни CNN-д өгсөн ярилцлагадаа “#FreeBritney хөдөлгөөн, та нар л намайг чөлөөллөө. Би олон жил айж, дарамтлуулж, дуу хоолойгоо хаалгаж явсан. Залуусаа, та нар л миний амьдралыг, намайг 100 хувь чөлөөлсөн юм шүү. Би хохирогчийн дүрд тогломооргүй байна. Гэвч би консерватор дарангуйлал дор 13 жил амьдарчээ. Би үнэхээр бэрхшээл тулгарсан, жинхэнэ зовлон туулж буй хүмүүсийг өмгөөлөхийг хүсэж байна” гэжээ.

Бритни Спирсийн 40 насны төрсөн өдөр ирэх сард болох бөгөөд дуучин бүсгүй ирэх хоёр сард төрсөн өдөр болон эрх чөлөөгөө тэмдэглэх болно гэжээ.

Дуучин бүсгүй олон жил үерхэж буй найз залуу Сэм Асгаритай өнгөрсөн есдүгээр сард сүй тавьсан билээ.

Эх сурвалж: CNN