Х.Баттулга: Нийгмийг зураг гэвэл би шинээр зурахгүй. Харин ч МОНГОЛ болгож сайн засна гэж боддог
“ – Эрдэнэ намаа ялагдуулж хөлсөө ( шан харамж) авах гэж зүтгэнэ.
Баттулга намаа ялуулж төрөө төвхнүүлэх гэж зүтгэнэ.”
-“Х.Баттулга бусдаас өөр. Титэм үг тэрлэж Оюутолгойгоос хоол горьдоогүй. Дээлээ нефтээр мялааж Тамсгаа харьд зараагүй. Эрдэнэт бол нөөц нь дууссан саалийн үнээ гэж өөрөө авахыг санаархаагүй жинхэнэ ерөнхийлөгч байлаа. Монгол Улс хуульдаа нам болж л улсаа удирдах гарцтайгаас хойш намын даргад дэвших эрх нь нээлттэй. Сайн зүтгэ … “ гэсэн постууд цахим ертөнцийг шуугиулж байна. Үнэхээр тийм.
Монголын ардчилагчид талцан хэмлэлдэх бус эвлэлдэн нийлэх ёстойг, талын нэг тарж одсон түмнээ атгандаа багтааж чадах нь хэн бэ гэдгийг цахим ертөнцийн давалгаа хэлээд өглөө. Энэ бол нэг хүний байр суурь бус талын Монголыг сэрээсэн дуудлага юм.

Экс Ерөнхийлөгч АН-ын даргын сунгаанд оролцохоор нэрээ бүртгүүлсэнд түмэн олон юуны учир хөл нь газар хүрэхгүй болтлоо баярлаад байгаа юм бэ.
Дахин хэлье. АН-аа нэг толгойтой, нэг тамга тэмдэгтэй нам шиг намтай болохыг хүсээд байгаа хэрэг. Иргэд сонгогчдод урьдын адил нэг намын эрхшээлд автах хүсэл алга.
Эрх баригчдын алдаа дутагдлыг ил тод хэлж чаддаг хүчтэй сөрөг хүчин хэрэгтэй байна. Цаад язгуур нь АН-аа аварч авч үлдэх гэсэн тэмүүлэл нь тэднийг дотроос нь шатааж байгаа нь ч нууц биш билээ. Тэр тусмаа дарга шиг даргатай болчихвол Монгол Улсад ардчилал, хүний эрх, эрх чөлөөг ингэтлээ уланд гишгэгдэхгүй. Улаан цагаандаа гарсан авлигалчид улсын хөрөнгө, иргэдийн татварын мөнгөөр ингэж гараа угаахгүй байхсан. Энэ бүхнийг ард түмний хүссэнчлэн байранд нь буцааж тавих нэгэн бол Х.Баттулга. Түүн шиг улсдаа ихийг хийж бүтээсэн, Монголоо, монгол түмнээ гэсэн элгэн халуун сэтгэлтэй хүн АН-ын даргаар сонгогдвол зөвхөн энэ намын төдийгүй энэ төрийн ажил үйл зөв зүг чигээ олно гэдгийг иргэд дэндүү сайн мэдэж байгаа хэрэг. Өнөөдөр эрх баригчдын алдаа дутагдал, буруу зөрүүг ойлгон санаа бодлоо илэрхийлдэг хүн, олон нийтийн байгууллага, хөдөлгөөн улам олон болж хүрээгээ тэлсээр байна. Ганцхан эрх баригчид хэт олонхидоо дулдуйдан үл тоомсорлосоор байгаа нь нүдний өмнө илт. Ийм л үед хүчтэй сөрөг хүчин, тэгэх тэгэхдээ улс төрийн хүчин үгүйлэгдэж байгаа болохоор олон нийт АН-ыг зөв төлөшөөсэй хэмээн хүсч байгаа болохоороо экс ерөнхийлөгч Халтмаагийн Баттулгыг чухам энэ намыг зөв голдрилд нь оруулж чадна хэмээн найдаж буй нь дамжиггүй.

“Үйлдвэржихгүйгээр, үйлдвэржилтийн бодлогогүйгээр хөгжсөн улс орон нэг ч байхгүй. Хэрвээ Монгол Улс үйлдвэржихгүйгээр хөгжинө, энэ улсад үйлдвэржилт хэрэггүй гэдгийг нотлоод, хуульчлах аваас би улстөрөөс өнөөдөр ч гарахад бэлэн. Харин Монгол Улс хөгжих ёстой, ганцхан газрын зураг дээр бус, эдийн засгийн хувьд ч бие даах учиртай, түүний төлөө бид зүтгэх ёстой нь үнэн бол би үйлдвэржилтээ үргэлж ярих болно. Энэ бол миний үүрэг. Амьдралын энгийн жишээн дээр хэлье. Үр тарианы нэг компани байлаа гэж бодъё. Энэ компани хөгжье, хөлжье, томоръё гэвэл эхлээд гурил, дараа нь талх, боов үйлдвэрлэж нэмүү өртөг бий болгож байж хөгжинө. Тэгэхгүй, үр тарианы компани хэвээрээ явбал ханган нийлүүлэгч хэвээрээ л үлдэнэ. Нэг жил ган болж ургац алдана, дараа жил нь томоохон гурил үйлдвэрлэгчид үр тариаг нь чанар муу гээд хямд авна, аягүй бол тариалангийн талбайг чинь худалдаад авна. Улс яг адилхан. Үйлдвэржилт, дэд бүтцийн хөгжлийн бодлогыг урт хугацаанд, тогтвортой мөрдөж хөгжүүлэх ёстой. Харамсалтай нь төрд гарсан хүмүүс, намууд тэгэхгүй байна…” хэмээн Х.Баттулга нэгэнтээ хэлсэн удаатай. Улсаа боддог хүн ингэж хэлдэг ажээ. Урваач, шараачидтай адилхан өнөө маргаашийн өөх хөөцөлдсөн өс хонзон өвөрлөөд гүйгээд байдаггүй л юм байна.
Х.Баттулга улсаа, үндэстнээ боддог хүн гэдгийг харуулах бас нэгэн баримт сөхье “…Сүүлдээ Монголыг хөгжүүлэхгүй байх, монголчуудыг хүнд амьдралд нь удаан барих зориудын бодлого яваад байна уу гэж хардахад хүрч байна. Ямар ч улс төмөртэй, төмрийн хүдэртэй бол хөгжиж болдог. Европыг, дэлхийг хөгжүүлсэн түүхий эд манайд байгаад байна. Гэтэл энэ бүгдийг түүхийгээр нь экспортлож буй нь худалдаа хийж байгаа бидэнд бус, бидний баялгийг худалдан авч байгаа талд л ашигтай. Нэг жишээ ярья. XIII зуунд Африк иргэдээ боол болгон зарж амьдардаг байлаа. 200 гаруй жил ингэж явсан. Нэг боолыг 10 ам. доллараар зарснаас, ажил хийлгэж цалин өгөөд, 100 ам. долларын ашиг унагах нь дээр гэдгийг ойлгосон хэдхэн улс нь түрүүлж хөгжсөн. Нэмүү өртөг шингээх, хөгжлийн бодлогоор XXI зууны монголчууд тэр үеийн африкуудаас л дор сэтгэж байна шүү дээ”… хэмээн тэрбээр халагласан. Монголоо гэсэн сэтгэл түүний үг, үйлдпэл бүхнээс харагдаад байдаг болохоор АН-ын даргаар түүнийг сонгоё гээд олуулаа, бүр олуулаа алга ташаад байгаа юм аа.
“Нийгмийг зураг гэж бодвол би шинээр зурахгүй. Харин ч сайн засна гэж боддог. МОНГОЛ БОЛГОЖ” хэмээн мань хүн онцолсон. Х.Баттулга чадна. Тэрбээр шинээр биш Монголоор зурж чадна. Түүний хийсэн бүтээсэн, зурсан бүхэн энэ Монгол Улсад олон бий. Шийдвэрээ ч гаргалаа. Монгол Ялах нь дамжиггүй. Бүү эргэлз.