Д.Нэргүй

“Зэс” брэнд,“Таван эрдэнэ” урлангийн захирал Ц.Зэс-Эрдэнэ хэмээх уран гартай бүсгүй эрчүүдийн гоёлын бугуйвч урлаж хэрэглэгчдэдээ хүргэсээр байна. Өнгө хийц загварын хувьд дахин давтагдашгүй, хэрэглэгчдийн эрэлт хэрэгцээнд яв цав нийцсэн хосгүй сайхан бүтээл түүний гараас гардаг  болохоор  эрчүүдийн  энергийн дуудлага болж чаджээ. Тэд гэр бүлээрээ бүтээл урладаг. Эгч Номин-Эрдэнэ нь Герман улсад “Номин брэнд” нэртэй урлан байгуулж Европ болон дэлхийд таниулж  байна. Хөгжлийн бэрхшээлтэй Ц.Зэс-Эрдэнэ  ч мөн амжилтынхаа үүдийг  нээж авьяасаа хөгжүүлж яваа нэгэн.Тэрбээр долоон жилийн хөдөлмөрөө үнэлүүлж “Нийслэлийн бизнесийн салбарын Шилдэг эмэгтэй-“гээр шалгарсан байна. Ийнхүү бүтээгдэхүүнээ монголдоо төдийгүй дэлхийд гаргана гэсэн зорилготой шаргуу ажиллаж байгаа  Ц.Зэс-Эрдэнэтэй ярилцлаа.

 -Зэс брэнд  хэдийнэ монгол эрчүүдийн дуртай гоёл  болж чаджээ. Бүтээгдэхүүн хийх санаа хэдийд төрж байв?

-Ээж, эгч хоёр маань “Сувдан хэлхээ” гэж монгол хатдын гоёл толгойн ороовч, бугуйвч, зүүлт хийдэг, уламжлалт өв соёлоо хадгалсан хүмүүс. Би оюутан байх үеэсээ л энэ  урланд нь ажилладаг байлаа. Гэтэл нэг залуу эрэгтэй хүний гоёлын бугуйвч байгаа юу гэж асууснаар энэ “Зэс брэнд бүтээгдэхүүнээ хийх санаа төрсөн түүхтэй. Дөрөвдүгээр дамжаанд байхдаа ажилд орох гэтэл хөгжлийн бэрхшээлтэй, магистр, бас хоёр жил ажилласан байх ёстой гээд аваагүй. Ингээд л сургалтын төлбөрөө олохын тулд  энэ бизнестээ түлхүү  орсон. Эхний жилүүдэд найз нөхдийнхөө хүрээнд зарж борлуулдаг байсан бол сүүлдээ хүмүүс мэддэг болоод  сургалтын төлбөрөө  төвөггүйхэн олсон.  Ингээд бодохоор их өгөөжтэй ажил байгаа юм. Удалгүй магистраа төгсөөд эргээд хартал “Зэс” брэнд маань олонд танигдаад  өөрийн гэсэн үйлчлүүлэгчидтэй хүмүүсийн хэрэглээ болсон нь сайхан санагдаж билээ.

-Бугуйвч бүхэн өөрийн гэсэн энерги, бэлгэдэл, утга учиртай байх. Тухайлбал…. ?

– Юуны өмнө “Эрэгтэй брэнд” гэсэн тодотголтой. Монголчууд эрт дээр үеэсээ л очир, нацагдорж зэрэг эрчүүдийн хүч чадлыг бэлгэдсэн гайхалтай бүтээгдэхүүн хэрэглэж ирсэн. Тухайлбал, очир эр хүний ноён нуруу, хамгаалалт болж өгдөг, эр хүнлэг тэнгэрлэг байдал эрч хүчийг нь  улам нэмэгдүүлж, дөрвөн зүг найман зовхист харилцаа холбоотой байхыг бэлгэдсэн байдаг. Энэ бүх утга учрыг  эр хүний гоёлд шингээж арслантай, ирвэстэй бугуйвч зэрэг хүч чадлын бэлгэ тэмдэг оруулж  эр хүнийг илүү эрэлхэг хиймортой болгодгоороо онцлог давуу талтай. Монгол өв соёл, хас тэмдэг, өлзий хээ зэрэг нь  нэг талаар маш том соёл хадгалагдаж  байгаа юм.

–Сэтгэл оюун, ур ухаан шингээж урлаж байж сая бүтээл болно.Тэгэхээр   хэрэглэгчдийн сэтгэгдэл  ямар байдаг бол?

–Хэрэглэгчид маань “Зэс” брэндийнхээ бугуйвчийг зүүхгүй болохоор ажил үйлс бүтэхгүй байна  гэдэг. Харин  зүүгээд гарахаар цог хиймортой, сэтгэл санаа өөдрөг болоод хүнд маш гоё энерги өгдөг юм байна гээд зүүлтээ ихэд дээдэлж хэрэглэдэг нь анзаарагддаг. Нөгөө талаас бүтээл бүхэндээ чин сэтгэлээ шингээж урладаг учраас миний энерги ч тэдгээр хүмүүст нөлөөлж байгаа гэсэн үг.

-Хэдэн төрлийн бүтээгдэхүүн урладаг вэ, загвар ур хийцийн хувьд дахин давтагдашгүй гээд л ….

-Ойролцоогоор 1000 төрлийн бүтгээдэхүүн гаргадаг. Зарим загвар нь давхцах нь ч бий. Анхны загвараа өөрөө гаргаад  яавал гоё бүтээл болох вэ гэж өөрийнхөө мэдрэмж, санаа оноог  бүтээгдэхүүндээ тусгахыг хичээдэг. Эмэгтэйчүүдийн хувьд гадны зүйлд өртөх магадлал ихтэй эмзэг хүмүүс байдаг учраас гял цал зүүлт зүүдэг. Энэ нь цаашилбал өөрийгөө хамгаалах  бүтээгдэхүүн болоод явчихна гэсэн үг. Түүн шиг эрчүүдээ ч мөн адил хамгаалъя гэдэг үүднээс хүчирхэг, өөртөө итгэлтэй байдлыг төрүүлж нөгөө талаар гангараа болж олон утга учрыг агуулж байгаа нь хамгийн сайхан.

-Сонирхсон хүмүүс зүүлт авъя гэвэл ямар үнэ ханштай байдаг бол? 

-Бугуйвч  25,000-280,000  төгрөгийн үнэтэй. Тоноглол материалаасаа шалтгаалаад харилцан адилгүй энгийн ямар ч тоноглолгүй бугуйвч 25,000 төгрөг, мөнгөн тоногтой, ориг байгалийн гаралтай чулуун бугуйвч бол мэдээж үнэ нь  нэмэгдэнэ. Заримдаа тухайн хүнд зориулж давтагдашгүй ганцхан загвар гаргах  үе ч бий.

-Танай гэр бүлийнхнийг  бүгд авьяасай  хүмүүс байдаг гэж сонссон. Тэд хаана юцу хийж  байна?

– Эцэг эхээс тавуулаа, бүгд гар урлал хийдэг. Том ах эгч хоёр маань ХБНГУ-д ажиллаж хөдөлмөрлөдөг. Ах Ган-Эрдэнэ дэлхийн  хэмжээний зураач хүн. Дэлхийн 50 орны уран бүтээлч  оролцсон зургийн  уралдаанаас “Гранпри” хүртсэн. Номин-Эрдэнэ эгч маань Германд өөрийнхөө “Номин” нэртэй брэндээ үүсгэн байгуулаад бүтээлээ Европ болон дэлхийд таниулж байгаа. Оюун-Эрдэнэ  эгч маань мөн өөрийн гэсэн салоноо үүсгэн байгуулсан. Сувд-Эрдэнэ эгч хуримын малгайны  гоёл чимэглэл  хийж байгаа.  Үйл урлана гэдэг маш буянлаг бурханлиг ажил. Ажилдаа маш дуртай. Бүтээлээ урлаж байхдаа бясалгал эсвэл бодол санаагаа цэгцлэх зэргээр өөртөө  маш гоё мэдрэмж авдаг.

-Бүтээгдэхүүн үйлдвэрлэгчдэд хамгийн тулгамдсан асуудал маркетинг борлуулалт байдаг шүү дээ. Энэ тал дээр ?

-Хэдийгээр санхүүгийн  гачигдалд орохгүй амьдралд дэмтэй ч бүрэн дүүрэн хүрэлцэхүйц хэмжээний биш л дээ. Энэ бүхэнд хүрэхийн төлөө  хичээнэ.Гэхдээ л борлуулалт дээр санаа зовоод байх зүйлгүй.

-Цаашдаа бүтээгдэхүүнээ өргөжүүлж, олшруулах талаар ямар зорилготой ажиллаж байгаа  бол?

-Цаашдаа олон гоё бүтээгдэхүүн урлаж монголдоо төдийгүй дэлхийд гаргана гэсэн зорилготой байгаа. Манай урланд хөгжлийн бэрхшээлтэй иргэд, хөдөлмөр эрхлэх боломжгүй гэртээ суудаг ээжүүд, цагт баригдаж  ажиллах сонирхолгүй хүмүүс ажилладаг. Ажлынхаа зэрэгцээ  гар урлалын сургалт явуулдаг. Үүгээрээ дамжуулж олон хүнийг ажлын байраар  хангах, гэртээ гар урлал хийгээд нэмэлт орлого олох боломжтой эсвэл хоббигоо хөгжүүлээд явах гарцыг нь нээж өгч байгаадаа баяртай байдаг.