Ольга Ившина

Би-би-си агентлаг нээлттэй эх сурвалжид үндэслэн Украинд амь үрэгдсэн оросын 6020 цэргийн албан хаагчийн нэрийг тодруулан тогтоосноо есдүгээр сарын 2-нд ил болгосон байна. Украинд Оросын тусгай отряд, бага тушаалын офицерууд илүү их амь үрэгдэж байна гэж Би-би-си-гийн шинжээч бичжээ. Энэ бол зөвхөн нэрсийг нь тодруулсан дайчдын тоо болохоос биш, оросын арми хөрш улсдаа түрэмгийлэн халдсанаас хойш амь үрэгдсэн  нийт цэргийн тоо биш гэж энд дурдсан байна.

Оросын өнцөг булан бүр дэх суурин газруудад  долоо хоног бүр л  оросын цэргийн албан хаагчдыг оршуулж байгаа ч  орон нутгийн засаг захиргаа энэ талаар мэдээлэхгүй байгаа юм.

Оросын удирдагчид, цэргийнхэн Украинд амь үрэгдсэн цэргийн албан хаагчдын талаар тун бага мэдээлж байгаа болохоор гадны хэвлэлүүдийн гол эх сурвалж нь оршуулгын газрууд дахь хөшөө, сургуулиудын хананд байрлуулсан самбар, цэргийн ангиуд, цэцэрлэгт хүрээлэн, оршуулгын газарт болж байгаа ёслол болж байна.

Энэ бүхэн л эрх баригчдын хийгээд, орон нутгийн сэтгүүлчид, амь үрэгдэгсдийн төрөл төрөгсдийн олон нийтийн сүлжээнд нийтлэхгүй байгаа дайны талбарт үрэгдсэн цэрэг офицеруудын нэр овгийг хэлж өгч байгаа юм. Яг ийм байдлаар Смоленскоос гэхэд л  амь үрэгдсэн тусгай салбарын 10 дайчны нэрийг тодруулсан байна.

Ер нь оросууд амь үрэгдсэн дайчдыг дунджаар 14-20 хоногийн дараа оршуулж байна. “Танай нөхөр сураггүй алга болсон, одоо утасдах хэрэггүй” гэсэн зурвас ар гэрт нь ирсэн ч төрөл төрөгсөд нь горьдлого тасрахгүй “амьд үхсэн аль нь боловч сураг гарна” гэж хүлээсээр.

Украинд амь үрэгдэгсдийн тоогоор оросын Дагестан 278 хүнээр тэргүүлж байгаа бол Буриадын 256, Краснодарын хязгаараас 227 хүн Украинд амь насаа алджээ. Харин оросын нийт хүн амын есөн хувийг эзэлдэг Москва хотоос ердөө 15 цэрэг амь үрэгдсэн мэдээлэл байна.

Оросын армийн бүрэлдхүүнд хуучин зөвлөлтийн бүгд найрамдах улсаас гаралтай иргэд орон Украинд дайтаж, амь үрэгдэж  байна гэж Би-би-си  мэдээлж байна. Киргизээс гэхэд л хамгийн багаар бодоход 13, Тажикстанаас ес, Гүржийн Өмнөд Осетийн 12, молдавын нэг хүн нас барсан гэдгийг баталжээ.

Нэрсийг нь тогтоосон 6024 хүнээс 1025 нь буюу 17 хувь нь офицер байгаагийн дөрөв нь генерал, 35 нь хурандаа байгаа юм байна.

Гэхдээ мэдээж яг тулааны талбарт тактикийн үндсэн шийдвэр гаргаж байгаа бага тушаалын офицерууд нийт хохирлын ихэнхийг эзэлж байгаа бол тэдний олонхи нь бүр залуу офицерууд байна. Дэслэгч цолыг цэргийнхэн 21-22 насандаа л авдаг болохоор ихэнх нь туршлагагүй ч гэлээ дарга удирдагч нарынхаа тушаалыг биелүүлэхийн тулд тэргүүн шугаманд шийдвэр гарган байлдаж амь насаа алдаж байгаа юм гэжээ.

Үүнээс гадна амь үрэгдэж байгаа офицеруудын дийлэнх нь Тагнуулын удирдах газар, Росгварди зэрэг тусгай салбаруудын ажилтнууд байна. Тусгай салбараас амь үрэгдэж байгаа ажилтнуудын  дөрөвний нэг нь офицер байна.

Оросын цэргийн нийт хохирлын дийлэнхийг явган цэрэг эзэлж байгаа бол десантын цэргийн хохирол харьцангуй буурч байгаа гэжээ. Есдүгээр сарын 2-ны мэдээгээр хохирсон цэргийн албан хаагчдын 20 хувь нь мотобуудлагын анги салбарын дайчид байгаа бол 17 хувь нь агаарын десантын цэрэг байна. Наймдугаар сарын эхнээс амь үрэгдсэн дайчдын тавны нэг нь десантын цэрэг байна. Ер нь Украинд цэргийн тусгай ажиллагаа эхэлсэн эхний саруудад гол гол ажиллагаанд агаарын десантын дайчид гол үүрэг гүйцэтгэж байжээ.

Би-би-си-гийн эх сурвалжийн мэдээлж байгаагаар бол одоо оросын давшилтын тэргүүн шугаманд, үндсэн ачааллыг хувийн цэргийн кампанийн отрядууд буюу төрийн хэвлэл мэдээллээр “сайн дурынхан” гэж нэрлэдэг дайчид гүйцэтгэж байгаа гэнэ.

Энэ салбаруудад голдуу 40-өөс дээш насны, харьцангуй төлбөр багатай хүмүүсийг татаж байгаа юм байна. Хүний эрх хамгаалагчдын мэдээлснээр бол гэр бүлд нь дарамт шахалт үзүүлж байгаагаас болоод Чеченийн иргэд голдуу сайн дурын отрядуудад орон байлдаж байгаа гэжээ. Оросын цэрэгжсэн салбаруудад оросын хоригдлуудыг бас дайчилж байгаа гэж Gulagu.net төслийнхөн өнгөрсөн долдугаар сард мэдээлсэн. Өөр бусад хэвлэлүүд ч ингэж мэдээлж байсан юм. Энэ есдүгээр сарын мэдээлэлд тэднээс лавтай дөрөв нь амь үрэгдсэн гэжээ.

Орос улс Украинд цэргийн тусгай ажиллагаа эхлүүлснээс хойш долдугаар сарын эцэс гэхэд 15000 цэргээ алдсан гэж Тагнуулын төв газар мэдээлсэн бол Британийн тагнуулын байгууллага 20 мянган хүнээ алдсан гэжээ. Харин Украины Зэвсэгт хүчний Жанжин штаб болохоор дайн эхэлснээс хойш Орос 44000 цэрэг дайчнаа алдсан гэж мэдээлж байгаа юм.

Оросын Батлан хамгаалах яам гуравдугаар сард мэдээлэхдээ амьд хүчний хохирлоо 1351 гэсэн байдаг.

Юутай ч Орост өдөр бүр л  амь үрэгдсэн цэргийн нэр, гэрэл зураг, оршуулгыг шинээр мэдээлж байна. Ийм мэдээллийг оросын бүс нутгийн удирдлагууд, засаг захиргааны нэгж, тухайн дайчны суралцаж байсан сургууль, орон нутгийн хэвлэл мэдээллийн хэрэгсэл, төрөл төрөгсөд нь байнга нийтэлсээр байгаа юм.