2008 оны 12 дугаар сарын 11-ний өдөр Ансан хотод найман настай На Ёнг /хуурамч нэр/ охиныг хулгайлан, ойролцоох сүмийн угаалгын өрөөнд оруулан хэрцгийгээр хүчиндсэн жигшүүрт хэргийн гэмт хэрэгтэн этгээдийг өнгөрөгч бямба гарагт /2022.12.31/ шоронгоос суллажээ.

Тухайн үед шүүхээс түүнд бүх насаар нь хорих ял оногдуулсан боловч хэрэгтэн этгээд давж заалдан, “Хэрэг үйлдэх үедээ согтууруулах ундааны зүйл хэрэглэн, өөрийгөө хянах чадваргүй, сэтгэц эрүүл бус” гэх дүгнэлт гаргуулан, ялаа хөнгөлүүлсэн байдаг.

Гэмт этгээд шүүгчид хандан “Би найман настай охиныг хүчирхийлдэг өвчтэй мангас биш” гэж 300 гаруй удаа захидал бичжээ. Үүний дараа шүүхээс түүнд өршөөл үзүүлэн, 12 жил хоригдох, долоон жил цахим гав зүүх ял ногдуулсан байна.

Жигшүүрт гэмт хэрэгтэн суллагдаж буйтай холбоотойгоор түүний гэрийн гадна болоод Ансан хотод иргэдийн эсэргүүцлийн жагсаал өрнөсөн байна. Тэд БНСУ-ын хууль хүчингийн хохирогчдыг үл тоосон, гэмт хэрэгтнүүдийг шийтгэхэд хойрго хандсан, сул дорой байдалтай байгааг онцлон шүүмжилжээ. Иргэд гэмт этгээдийн гэрийн гадна “Хэрэгтэнг дахин хорь”, “Эрхтэнийг нь тайр”, “Цаазаар ав”, “Хотоос хөө” гэх мэт уриа лоозонг барин жагссан байна.

Иргэдийн энэхүү бухимдалд Ансан хотын цагдаагийн газраас тайлбар хийхдээ “Чо-г дахин хорих ямар ч боломжгүй. Гэхдээ хэрэгтэн этгээдийн хөлөнд “ухаалаг гав” зүүсэн учраас түүнийг 24 цаг хянах боломжтой. Бид түүний алхам бүрийг хянаж, найдвартай харгалзах учраас та бүхэн тайван байна уу” гэжээ.

БНСУ-д хамгийн их шуугиан тарьсан энэхүү хүчингийн хэргийг үйлдэгч Чо Ду Сү гэх этгээд өдгөө 68 настай бөгөөд хэрэг үйлдэх үедээ 56 настай байжээ. Тухайн үеийн мөрдлөгийн баримтаас дурдахад гэмт хэрэгтэн охиныг зодож ухаан алдуулан, ёс бус үйлдлээ гүйцэлдүүлснийхээ дараа, зэрлэгээр тамласан байдаг.

Охиныг амь голтой олсны дараа бүтэн найман цаг хагалгаа хийсэн бөгөөд хэтэрхий их тамлалд байсан охин найман сар эмчилгээ хийлгэсэн боловч бөгсөн биенийх нь 80 орчим хувь бүрэн ажиллагаагүй болжээ.

Сүүлд охин  хиймэл анус хийлгэх мэс засал хийлгэж амжилттай болсон байна. Хохирогч охин сэтгэлзүйн дарамтанд өртсөн бөгөөд нэг жилийн турш сэтгэцийн эмчилгээ хийлгэжээ. Тэрбээр одоо зөвхөн хүүхэлдэйн кино үздэг бөгөөд сошиал ашиглахаас татгалздаг гэнэ.

На Ёнг охины гэр бүл Чо-г суллагдахаас өмнөхөн Ансан хотоос нүүсэн бөгөөд хохирогчийн аав JoongAng Ilbo-д ярихдаа “Бид эндээс нүүлээ гээд На Ёнгийн олон жилийн зовлонг арилгаж чадахгүй байх. Гэхдээ бид ямартай ч хүүхдүүдийгээ Чо-гийн аймшигт царайтай тулгарахаас сэргийлж чадлаа. Хүүхдүүд минь цаашдаа Чо Ду Сүн гэх нэрийг мартаасай хэмээн чин сэтгэлээсээ хүсэж байна” гэжээ.

Энэхүү жигшүүрт гэмт хэргээс сэдэвлэсэн “Hope” буюу “Найдвар” гэх киног БНСУ-ын найруулагч Ли Жун Ик 2013 онд бүтээсэн бөгөөд тус бүтээлээрээ нэлээд олон шагнал хүртэж, олон нийтийн анхаарлыг тус үйл явдал руу дахин хандуулсан байдаг. Гэвч кино бүтээгчид бусдын зовлонгоор ашиг олсон гэх шүүмжлэлд өртсөн юм.

Гэмт хэрэгтэн Чо Ду Сүн 1970 онд дугуй хулгайлсан хэрэгт холбогдож анх цагдаад бүртгэгдэж байсан бөгөөд 1972 онд захаас хулгай хийсэн хэргээр 1.6 жилийн хорих ял авчээ. 1983 онд 31 настайдаа тэрбээр амьдардаг газрынхаа ойролцоо ажилладаг 69 настай эмэгтэйг хүчирхийлсэн бөгөөд хохирогч эмэгтэй 302 хоног эмчилгээ хийлгэсэн байдаг. Энэ хэргийнх нь төлөө Чо-д гурван жилийн хорих ял оноосон байна.

1995 онд Чо архи ууж байхдаа 60 гаруй насны эрэгтэйг зодож танхайрсан бөгөөд түүнд хоёр жилийн ял өгч, сэтгэцийн эмнэлэгт хэвтүүлсэн байна.

Чогийн талд байдаг цор ганц хүн бол түүний эхнэр юм. Тэрбээр нөхрөө “20 жил хамт амьдрахдаа ганц ч удаа уурлаж, гар хүрч байгаагүй, орчлонгийн хамгийн тайван, сайн хүн” гэж магтдаг нэгэн.

Чо бүх гэмт хэргийнхээ тухай мэдүүлэхдээ “согтуу байсан”, “санахгүй байна” гэж шалтаг тоочсон байдаг.