Дэлхий дахинд

Грект төмөр замын осолтой холбогдуулан жагссан эсэргүүцэгчид цагдаа нартай мөргөлджээ

Нийтэлсэн

2 жил өмнө

2023-03-06

Нийтэлч

Грект төмөр замын осолтой холбогдуулан жагссан эсэргүүцэгчид Афин хотноо, парламентын ордны өмнө цагдаа нартай мөргөлджээ. Эсэргүүцэгчдийн зарим нь хогийн сав шатааж, шатаах бодистой лонх шидсэн байна. Хариуд нь цагдаа нар нулимс асгаруулагч хий, дууны гранат ашигласан гэж хэвлэлүүдэд мэдээлжээ.

Цагдаагийн байгууллагын мэдээлснээр, ням гарагт парламентын ордны өмнө болсон эсэргүүцлийн ажиллагаанд 12 мянга орчим хүн оролцсон гэнэ. Тэд Лариса хотын ойролцоо болсон ослын үеэр амиа алдсан хүмүүсийн дурсгалыг хүндэтгэж, хэдэн зуун хар бөмбөлөг хөөргөжээ.

Мөн энэ өдөр Грекийн Ерөнхий сайд Кириакос Мицотакис төмөр замын ноцтой ослын үеэр хохирсон хүмүүсийн ар гэрийнхнээс уучлалт хүсчээ. “Грект 2023 онд эсрэг чиглэлд явж байсан хоёр галт тэрэг нэг зам дээр байж, үүнийг хэн ч анзаараагүй нь байж боломгүй” хэмээн тэрбээр мэдэгдсэн байна.

Грект эсэргүүцлийн ажиллагаа энэ сарын 2-ноос хойш үргэлжилж байна. Үүнтэй зэрэгцээд тус улсад төмөр замын ажилтнуудын ажил хаялт ч эхэлжээ. Үйлдвэрчний эвлэлүүдийн удирдлагуудын мэдээлснээр, 3 дугаар сарын 1-нд болсон осол хүн хүчний дутагдал, ажилладаггүй тоног төхөөрөмж зэрэг олон хүчин зүйлээс болсон гэжээ. Грекийн засаг захиргаа 2000 оноос хойш хөдөлгөөний аюулгүй байдлын орчин үеийн цахим систем суурилуулахад 20 тэрбум гаруй евро зарцуулсан боловч төсөл бүрэн хэрэгжээгүй, суурилуулсан тоног төхөөрөмжүүд нь ажилладаггүй гэж төмөр замын ажилтнууд мэдэгджээ. Гэтэл Ерөнхий сайд Кириакос Мицотакис хүний алдаанаас болоод осол гарсан гэж мэдэгдсэн нь төмөр замын ажилтнуудын дургүйцлийг хүргэжээ.

3 дугаар сарын 1-ний шөнө Афин-Салоники хотын хооронд шугамд, Лариса хотын ойролцоо зорчигчийн галт тэрэг ачааны галт тэрэгтэй мөргөлдсөний улмаас 57 хүн амиа алдсан юм. Өөд өөдөөсөө явсан хоёр галт тэрэг нэг зам дээр таарч, маш хүчтэй мөргөлдсөний улмаас вагонуудын дугуй, эд ангиуд ойрын хэдэн арван метрийн зайд шидэгджээ. Зорчигчийн 4 вагон замаасаа гарч, нэг нь шатсан байна. Зорчигчийн галт тэргэнд 350 хүн сууж явсан. Тэдний олонх нь урт амралтаа дайруулан гэр лүүгээ харьж явсан оюутнууд байжээ. Харин ачааны галт тэрэг нь далайн чингэлэг тээвэрлэж явсан байна. Энэ бол тус улсын төмөр замын түүхэнд байгаагүй томоохон осолд тооцогдож байгаа юм.

Сэдвүүд:

Дэлгэрэнгүй ...

Дэлхий дахинд

БНСУ даяар галын нөхцөл байдал ноцтой түвшинд хүрснийг зарлалаа

Нийтэлсэн

1 долоо хоног өмнө

2025-03-26

Нийтэлч

24barimt

2025 оны гуравдугаар сарын 26-ны өглөөний 07:30 цагийн байдлаар БНСУ даяар галын нөхцөл байдал ноцтой түвшинд хүрсэн гэж зарласан бөгөөд энэ нь гал түймрийн хамгийн дээд түвшин юм.

Одоогийн байдлаар нас барсан хүмүүсийн тоо 18, түлэгдэж угаартсан хүмүүсийн тоо 19 болж, нийт 37 хүн амь нас, эрүүл мэндээрээ хохирсон байна.

Гал түймрийн гарал үүсэл нь тодорхой болж эхэлсэн бөгөөд салют буудуулах болон талийгаачийн булш эргэж байх үед гал алдсан нь гол шалтгаан болсон гэж үзэж байна.

Мөн аюултай нөхцөл байдал үүссэнтэй холбогдуулан нийт 27,000 орчим иргэнийг аюулгүй газар нүүлгэн шилжүүлж, 1,600 иргэнийг түр хоргодох байранд байрлуулжээ.

Гал сөнөөгчид болон цэргийн 5000 гаруй албан хаагч, 146 нисдэг тэрэг дайчлагдан ажиллаж байгаа ч хуурай салхи, хүнд нөхцөл байдлаас болж унтраахад хүндрэлтэй байна.

Гуравдугаар сарын 26-ны үдээс хойш хүчтэй салхи шуурах төлөвтэй байгаа тул иргэдийг аюултай нөхцөл байдлаас урьдчилан сэргийлж, хяналттай байхыг анхааруулж байна.

Консулын газар нь галын голомтын аюултай бүсэд оршин суугаа Монгол Улсын иргэддээ яаралтай үед холбогдох шуурхай утсыг ажиллуулж байна гэж Пусан хотод суугаа Консулын газраас мэдээллээ.

Дэлгэрэнгүй ...

Дэлхий дахинд

Сөүл хотод авто зам цөмөрч мотоциклтой иргэн унажээ

Нийтэлсэн

2 долоо хоног өмнө

2025-03-25

Нийтэлч

24barimt

Өчигдөр буюу даваа гарагт Сөүл хотод авто зам цөмөрч, мотоциклтой иргэн унасан байна. Одоогоор тус иргэнийг аврах ажиллагаа үргэлжилж байгаа аж.

Орон нутгийн цагаар өчигдөр орой 6 цагийн үед Гандун дүүрэг дэх бага сургуулийн ойролцоох авто зам цөмөрч, бараг 20 метрийн өргөнтэй нүх үүссэн байна.

Тус нүх зургаан эгнээтэй замын дөрвийг нь хамарч байгаа бөгөөд нэмж томрох эрсдэлтэй байгаа аж. Улмаар Сөүл хотын захирагч яаралтай арга хэмжээ авахыг үүрэгджээ.

Одоогоор зам цөмөрсөн шалтгааныг тодруулахаар ажиллаж байна.

Гэхдээ албаныхны урьдчилсан байдлаар үзэж буйгаар зам цөмөрсөн шалтгаан нь замын доорх ус дамжуулах хоолой хагарснаас үүдсэн байж болзошгүй гэв.

Осол гарсан замын доор метроны есдүгээр шугамын өргөтгөлийн ажил мөн хийгдэж байжээ.

Дэлгэрэнгүй ...

Дэлхий дахинд

Өмнөд Солонгос даяар 30 шахам ой хээрийн түймэр гарав

Нийтэлсэн

2 долоо хоног өмнө

2025-03-24

Нийтэлч

24barimt

Өмнөд Солонгосын зүүн өмнөд хэсэгт өнгөрсөн амралтын өдрүүдээр 30 шахам ой хээрийн түймэр гарчээ. Тодруулбал, 29 байршил гарсан гал түймрийн улмаас дор хаяж дөрвөн хүн амиа алдаж, зургаан хүн шархдаад байна. Мөн 19 км2 талбай шатсан бөгөөд галт тэрэг, зарим авто замын хөдөлгөөнд саад учирчээ.

Бямба гаригийн орой засгийн газар зарим бүс нутагт гамшгийн онц байдал зарлажээ. Харин Ням гаригийн өглөө ихэнх түймрийг унтрааж, зургаан газар л үлдсэн байна.

Гал унтраахад 1600 орчим гал сөнөөгч, 35 нисдэг тэрэг, олон арван галын машин дайчилжээ.

29 түймэр янз бүрийн шалтгаанаар гарсан бөгөөд тэдгээрээс дурдвал, Санчеон хотын түймэр л гэхэд тариачны зүлэг хадагч шатсанаас болжээ. Мөн Бусанаас холгүй орших Гимхэ хотод хог шатаах зуухнаас үүдэлтэй гал гарсан байна. Цаг агаар хуурай, салхитай байгаа тул гал түймэр амархан тархаж байгааг албаныхан анхааруулж байна. Гурав, дөрөв, тавдугаар сард Өмнөд Солонгос хамгийн хуурай цаг агаартай байдаг. Мөн гал түймэр гарсан зарим газар нь уулархаг бүс нутаг байгаа тул аврагчид хүрч очиход хүндрэлтэй байгаа аж.

Өмнөд Солонгосын ерөнхийлөгчийн үүрэг гүйцэтгэгч Чой Сан Мок галыг түргэн унтраахын тулд боломжит бүх техник хэрэгсэл, хүн хүчийг дайчлахыг тушаажээ.

Дэлгэрэнгүй ...