Баянзүрх дүүргийн 25 дугаар хороо, Сүхбаатар дүүргийн 42 дугаар хороо зэрэг нийслэлийн хэмжээнд нийт долоон байршил үерт автаад буй. Үүнтэй холбоотойгоор Нийслэлийн Засаг дарга захирамж гарган, төвийн зургаан дүүргийг өндөржүүлсэн бэлэн байдалд шилжүүллээ. Үүсээд буй нөхцөл байдалтай холбоотойгоор холбогдох албаныхан газар дээр нь ажиллаж, Нийслэлийн Онцгой комисс /НОК/-оос мэдээлэл өгсөн юм.

Шуурхай штаб 24 цагаар ажиллаж байна

Нийслэлийн Онцгой байдлын газрын дарга А.Дашням:

-Цаг үеийн нөхцөл байдалтай холбоотойгоор НОК 10:00 цагт хуралдаж, Нийслэлийн Засаг дарга захирамж гарган, нийслэлийн төвийн зургаан дүүргийг өндөржүүлсэн бэлэн байдалд шилжүүлсэн. Үүнтэй холбоотойгоор төрийн байгууллагын албан хаагчдыг дайчлан ажиллуулна. Мөн Нийслэлийн Засаг даргын Эдийн засаг, дэд бүтцийн асуудал хариуцсан нэгдүгээр орлогч Ж.Сандагсүрэнгээр ахлуулсан Шуурхай штаб 24 цагаар ажиллаж байна. Дүүргүүдэд үүсэж байгаа нөхцөл байдалтай холбоотойгоор дүүргийн Засаг дарга нар газар дээр нь ажиллаж, урьдчилан сэргийлэх, аврах, сэргээн босгох ажлыг хийнэ. Нийслэлийн зүгээс дэмжлэг үзүүлж ажиллах юм гэлээ.

Албан хаагчдад бүх талын дэмжлэг үзүүлнэ

Нийслэлийн Засаг дарга бөгөөд Улаанбаатар хотын Захирагч, Нийслэлийн Онцгой комиссын дарга Д.Сумъяабазар:

-Үүссэн нөхцөл байдалтай холбогдуулан УОК, цэргийн анги нэгтгэлүүдээс хүн хүч татах, Сэлбийн байршлууд дээр далан босгох, зарим гүүрэн байгууламжийг буулгах асуудлыг хэлэлцэнэ. Цаашид ч бороо үргэлжлэн орох тул өндөржүүлсэн бэлэн байдалд шилжих, хүн хүчээ зөв хуваарилаад эрсдэлээс сэргийлэх, шаардлагатай арга хэмжээ авах үүрэг, чиглэлүүд өгсөн байгаа. Түүнчлэн нөхцөл байдал хүндэрсэн байршлууд дээр ажиллаж буй албан хаагчдад бүх талын дэмжлэг үзүүлнэ. Цаашид голын ай сав газар зөвшөөрөлгүй барилга барих, стандарт нормыг алдагдуулах зэрэг зүйлсийг таслан зогсоож, засаж залруулж ажиллана хэмээв.

Үерт автсан долоон байршилд 500 орчим албан хаагч ажиллаж байна

Улаанбаатар хотын Ерөнхий менежер бөгөөд Захирагчийн ажлын албаны дарга М.Баяраа:

-Долоодугаар сарын 3-5-ны хооронд бороо үргэлжлэн орсны улмаас Улаанбаатар хотыг тойрсон голуудын усны түвшин нэмэгдэж, үерлээд байна. Сэлбэ болон Дунд гол үерлэн, зам руу хальж урссан. Иймд голын урсгалыг жигд гаргахаар Төв цэнгэлдэх хүрээлэн орчим буюу Соёмботой хөшөөний ойролцоох замыг сэтлэх арга хэмжээ авсан. Усны түвшин тасралтгүй нэмэгдэж, онц аюултай нөхцөл үүсээд байна. Ялангуяа нөхцөл байдал ихээхэн хүндэрсэн Баянзүрх болон Сүхбаатар дүүрэг дэх Сэлбэ голын дагуу төвлөрөн ажиллаж, хальж урсаад байсан хэсгийг барьж, хотхон руу орох урсгалыг зогсоосон. Үерт автсан долоон байршилд 50 гаруй байгууллагын 500 орчим албан хаагч ажиллаж, 7-8 машин техникээр тасралтгүй үерийн усыг соруулж байна. Гэхдээ ус соруулахаас илүүтэйгээр голын усны түвшин нэмэгдэж, хальж байгаа тул голын урсгалыг жигдрүүлэх арга хэмжээ авч байгаа.

Бороо дахин орвол нөхцөл байдал аюултай түвшинд хүрэх тул үерийн даланг шороо, дайрга, элсээр хүчитгэнэ. Мөн стандартын шаардлага хангалгүй барьсан гүүрнүүд байгаа тул тэдгээрийг Улсын Онцгой комисст танилцуулж, цаашлаад гүүрнүүдийг сэтлэн, голын урсгалыг жигдрүүлэх арга хэмжээ авна гэв.

Үерийн далангийн орчим байгаа айлууд сонор сэрэмжтэй байх шаардлагатай

Геодези, усны барилга, байгууламжийн газар ОНӨААТҮГ-ын дарга Л.Ариунтуяа:

-Манай газар болон нийслэлийн инженерийн барилга байгууламжийн байгууллагууд хамтран долоодугаар сарын 3-наас эхлэн ажиллаж байна. Үерийн далангийн ойр орчим байгаа айлууд сонор сэрэмжтэй байх шаардлагатай. Бид өглөө 03:50 цагаас хойш гараашинд байгаа машинуудыг гарган ажилласан. Улаанбаатар хотын хэмжээнд Баруун 4 замаас Хархорин хүртэл ганц өргөлт нацосс байгаа. Улаанбаатар хотыг усгүй байлгая гэвэл дөрвөн талд нь нацосс өргөлтийн станц хийх ёстой.

Манай байгууллага Улаанбаатар хотын үерийн барилга байгууламжийн засвар, арчлалт, үйлчилгээг хариуцдаг. Бид эхний ээлжид иргэдийг аюулгүй байлгах, эд хогшлыг хамгаалах үүрэгтэй ажиллаж байна. Томоохон гурван нүхэн гарц усанд автаж, Дунд гол эргээ хальсан нөхцөл байдалтай байна. Улаанбаатар хотын хэмжээнд 461 км үерийн далан шаардлагатай.

Нийт авто замын 20 хувьд л борооны ус зайлуулах шугам сүлжээ байна. Манай байгууллага 206 км авто замын борооны шугам сүлжээний засвар, арчлалт, цэвэрлэгээг хариуцдаг. Бүх авто замд борооны ус зайлуулах шугам сүлжээг стандартын дагуу хийх шаардлагатай. 2020 онд Улаанбаатар хотын хэмжээнд ус тогтдог томоохон хэмжээний 25 байршил байсан. Манайх УБЗАА, Нийслэлийн Замын хөгжлийн газартай хамтран Баянбүрд, Эрэл, Е-март гэх мэт 17 байршлыг усгүй болгосон. Одоо найман байршил үлдээд байна гэлээ.

Улаанбаатар цахилгаан түгээх сүлжээ ТӨХК-ийн инженер Ш.Хосбаяр:

-Барилга байгууламж, цахилгаан тоног төхөөрөмж рүү ус орсон тул Баянзүрх, Сонгинохайрхан дүүргийн тодорхой байршлуудад хүчдэл таслах арга хэмжээ авсан. Байгалийн гамшиг, аюултай үзэгдэл тохиолдож буй учраас буцааж залгах тодорхой хугацаа хэлэх боломжгүй. Үерийн гамшиг бүрэн арилсны дараа үзлэг шалгалт хийсний үндсэн дээр хүчдэлийг эргэн залгана. Нийт 4-5 байршилд 320 албан хаагчийн бүрэлдэхүүнтэй ажиллаж байна гэв.