Нийгэм
Япон улстай шүдний эмч, шүдний эрүүл ахуйч бэлтгэхэд хамтрах хүсэлт илэрхийлэв
УИХ-ын гишүүн, Засгийн газрын гишүүн, Эрүүл мэндийн сайд С.Чинзориг Японы Парламентын Төлөөлөгчдийн танхимын гишүүн, Төлөөлөгчдийн танхим дахь Япон-Монголын найрамдлын бүлгийн гишүүн Хиромичи Ватанабег хүлээж авч уулзлаа.
Тэрбээр Эрүүл мэндийн сайдад Япон улсын эмч нарын Монголд хэрэгжүүлсэн хүүхдийн амны хөндийн эрүүл мэндийг сайжруулах төслийн явцын тайланг гардуулж, цаашдын хамтын ажиллагааны талаар санал солилцох хүсэлт тавьсан юм.
Түүнтэй хамт нийслэлийн хоёр сургуульд шүд, амны хөндийн эрүүл мэндийг сайжруулах чиглэлээр төсөл хэрэгжүүлсэн багийн эмч нар ирсэн. Тэд төсөл 2025 онд дуусах бөгөөд төслийн хугацаанд Японоос эмч нар ирж хүүхдүүдэд үзлэг хийсэн, мөн монгол эмч нарыг Японд сургасан нь ач холбогдол өндөртэй байсныг танилцуулсан.
Төслийн багийн хүүхдүүдийн дунд хийсэн үзлэгээр шүд, амны хөндийн эрүүл мэндийг сайжруулахад юуны түрүүнд урьдчилан сэргийлэхэд илүүтэй анхаарах ёстой гэсэн дүгнэлтийг хийсэн бөгөөд цаашид энэ чиглэлд үйл ажиллагааг үргэлжлүүлэх хүсэлтэй байгаагаа илэрхийлсэн.
Эрүүл мэндийн сайд С.Чинзориг иргэдийн дунд 2022 оноос хойш зохион байгуулж буй эрт илрүүлэг, үзлэг шинжилгээнд хамрагдсан хүүхдүүдийн 67 хувь нь амны хөндийн эрүүл мэнд сайнгүй, шүд цооролттой гарсан учраас Засгийн газраас тогтоол гарган “Шүд” хөтөлбөрийг хэрэгжүүлэхээр шийдвэрлэсэн. Энэ хөтөлбөрийн хүрээнд урьдчилан сэргийлэх, эмчлэх олон төрлийн үйл ажиллагаа явуулахаар төлөвлөсөн бөгөөд Эрүүл мэндийн сайд Боловсрол, шинжлэх ухааны сайд хамтран тушаал гаргаж цэцэрлэг, сургуулийн хүүхдүүдэд шүд угаах зөв дадал хэвшүүлэх, шүдний өвчлөлөөс урьдчилан сэргийлэх мэдлэг олгоход анхаарч байгаа талаар танилцуулж, Японы эмч нарын Монголын хүүхэд залуусын амны хөндийн эрүүл мэндийг хамгаалахын төлөө хийж хэрэгжүүлж байгаа ажлыг үргэлжлүүлэхийг дэмжиж байгаагаа хэлсэн.
Тэрбээр “Амны хөндийн эрүүл мэндийн чиглэлээр бидэнд тулгамдаж буй асуудлууд олон байна. Хамгийн наад зах нь улсын хэмжээний 330 сумын ердөө 30 нь шүдний эмч, шүдний кабинеттай. Бусад нь шүдний эмчгүй, урьдчилан сэргийлэх үйл ажиллагаа явуулах, эмчилгээ хийх тоног төхөөрөмж байхгүй. Шүдний чиглэлээр үйл ажиллагаа явуулдаг 600 гаруй эрүүл мэндийн байгууллага байгаа ч 80 хувь нь Улаанбаатарт ажилладаг. Тиймээс энэ чиглэлд анхаарч шүдний эмч, шүдний эрүүл ахуйч бэлтгэхэд Япон улстай, ЖАЙКА байгууллагатай хамтарч ажиллах хүсэлтээ илэрхийллээ.
Ноён Х.Ватанабэ С.Чинзориг сайдын тавьсан саналыг Эрүүл мэндийн яамандаа уламжилж, Монголын анагаахын чиглэлээр мэргэжилтэн бэлтгэдэг их дээд сургуулийг Японы сургуулиудтай холбох замаар тодорхой асуудлыг шийдэх боломжийг эрэлхийлнэ гэдгээ амлав.
Нийгэм
“Улаанбаатар хотын тогтвортой авто зам, тээвэр” төслийн дунд хугацааны үнэлгээг хийнэ
НЗДТГ болон Дэлхийн банк хамтран “Улаанбаатар хотын тогтвортой авто зам, тээвэр” төслийг хэрэгжүүлж байна.
Улаанбаатар хотыг тогтвортой авто зам, тээврээр хангах цогц баримт боловсруулах, сонгосон авто зам, тээврийн коридоруудад замын хөдөлгөөний түгжрэлийг бууруулах, аюулгүй байдлыг сайжруулах тус төсөл 2026 оныг дуустал хэрэгжих юм.
Энэ сарын 20-31-ний өдрүүдэд тус төслийн дунд хугацааны үнэлгээг хийх бөгөөд Дэлхийн банкны ажлын хэсэг Монгол Улсад ажиллаж байна. Энэ хүрээнд НЗДТГ-ын дарга Л.Хосбаяр тус ажлын хэсгийг хүлээн авч уулзлаа.
“Улаанбаатар хотын тогтвортой авто зам, тээвэр” төслийн дунд хугацааны үнэлгээг хийхдээ төслийн хэрэгжилт, үйл ажиллагааны төлөвлөгөөтэй дэлгэрэнгүй танилцаж, төслийн хэрэгжилтийн саатал, эрсдэлийг тодорхойлон, цаашдын тогтвортой байдал, төслийн бүтцэд гарч болзошгүй өөрчлөлтүүдийн талаар хэлэлцэх юм. Төслийг амжилттай хэрэгжүүлж, дуусгахын тулд тодорхой асуудлуудыг дунд хугацааны үнэлгээний үеэр шийдвэрлэхээр талууд санал нэгдсэн юм.
Нийгэм
“Оюутан цагдаа” хөтөлбөрийн бүртгэл эхэллээ
Нийслэлийн 2021-2025 онд хөгжүүлэх үндсэн таван жилийн чиглэлийн гэмт хэрэг, зөрчлөөс урьдчилан сэргийлэх ажилд иргэд, олон нийтийн оролцоог нэмэгдүүлж, гэмт хэргийн гаралтыг бууруулах, оюутан залуучуудыг гэмт хэрэг зөрчлөөс урьдчилан сэргийлэх ажилд татан оролцуулах, гадаадын иргэд, жуулчдын аюулгүй байдлыг хангах зорилгоор “Оюутан цагдаа” арга хэмжээг Нийслэлийн Цагдаагийн удирдах газар, Аялал жуулчлалын газартай хамтран зохион байгуулах гэж байна.
Өдгөө арав дахь жилдээ зохиогдож буй энэхүү арга хэмжээний бүртгэл эхэллээ.
“Оюутан цагдаа” хөтөлбөр нь зургаадугаар сарын 21-нээс наймдугаар сарын 21 хүртэл үргэлжлэх бөгөөд гадаад хэлний мэдлэгтэй /Англи, Орос, Хятад, Япон, Солонгос гэх мэт/ оюутан залуус тус хөтөлбөрт хамрагдах боломжтой юм байна.
Хөтөлбөрийн давуу тал:
- Цагийн уян хатан нөхцөл
- Хөдөлмөрийн гэрээ байгуулж, нийгмийн даатгал төлөх
- Олон улсын жуулчид иргэдтэй харилцах замаар хэлний мэдлэгээ дээшлүүлэх
- Амьдарч буй нийгмийнхээ аюулгүй, амар тайван байдалд өөрийн хувь нэмрийг оруулах
- Амралтын хугацааг үр бүтээлтэй өнгөрүүлж, гэр бүлийн болон өөрийн санхүүгийн байдалд дэмжлэг үзүүлнэ.
Нийгэм
Н.Мөнхбат нарын 3 хүнд холбогдох хэргийг хяналтын шатны шүүх хуралдаанаар хэлэлцүүлэхээс татгалзав
Улсын дээд шүүхийн Эрүүгийн хэргийн танхимын нийт шүүгчийн хуралдаанаар Н.Мөнхбат, Б.Шинэбаатар, Ч.Отгочулуу нарт холбогдох хэргийг шүүгдэгч Н.Мөнхбат, түүний өмгөөлөгч Ч.Хүрэлбаатар, шүүгдэгч Ч.Отгочулуу, түүний өмгөөлөгч Б.Баяраа болон хохирогч, иргэний нэхэмжлэгч “Хөгжлийн банк” ХХК-ийн итгэмжлэгдсэн төлөөлөгч Д.Оргил, Э.Саранболор нарын гаргасан гомдлыг үндэслэн хяналтын шатны шүүх хуралдаанаар хэлэлцүүлэх эсэхийг 2024 оны 05 дугаар сарын 15-ны өдөр хэлэлцлээ.
Эрүүгийн хэргийн танхимын нийт шүүгчийн хуралдаанаар шүүгдэгч болон хохирогч, иргэний нэхэмжлэгч нарын өмгөөлөгчдийн гаргасан гомдлыг хянан хэлэлцээд Эрүүгийн хэрэг хянан шийдвэрлэх тухай хуулийн 40.1 дүгээр зүйлийн 1 дэх хэсэгт заасан хяналтын журмаар гомдол, эсэргүүцэл гаргах үндэслэлд хамаарахгүй байгаа тул уг хэргийг хяналтын шатны шүүх хуралдаанаар хэлэлцүүлэхээс татгалзав.
Ингэснээр хуулийн хүчин төгөлдөр давж заалдах шатны шүүхийн магадлалын дагуу шүүгдэгч Н.Мөнхбатын нийтийн албанд ажиллах эрхийг 2 жилээр хасаж, 2 жилийн хугацаагаар хорих, мөн Б.Шинэбаатар, Ч.Отгочулуу нарт тус бүр “нийтийн албанд ажиллах эрхийг 2 жилийн хугацаагаар хасаж, 20 сая төгрөгөөр торгох” ялыг эдлүүлэхээр болж байна гэж Монгол Улсын Дээд шүүхээс мэдээллээ.
-
Нийгэм8 цаг өмнө
“Шинэ Хархорум” хотын инженер геологийн судалгаа, байр зүйн зураглал хийж байна
-
Нийгэм15 цаг өмнө
Эрүүгийн 890 хэрэгт мөрдөн байцаалтын ажиллагаа явуулав
-
Дэлхий дахинд15 цаг өмнө
Бельги, Франц, Германд хүчтэй үер болж байна
-
Нийгэм8 цаг өмнө
Хог хаягдлыг ил задгай шатаахад олон төрлийн хорт, аюултай химийн бодис ялгардаг
-
Нийгэм7 цаг өмнө
Н.Мөнхбат нарын 3 хүнд холбогдох хэргийг хяналтын шатны шүүх хуралдаанаар хэлэлцүүлэхээс татгалзав
-
Дэлхий дахинд15 цаг өмнө
“OPEN-AI” компани “ChatGPT” хиймэл оюуны шинэ хувилбарыг танилцуулав
-
Улс төр8 цаг өмнө
Монгол Улс, БНСУ хоорондын эдийн засгийн түншлэлийн хэлэлцээрийн хоёр дахь шатны хэлэлцээ эхэллээ
-
Нийгэм7 цаг өмнө
ДЭЭД ШҮҮХ: 1000 гаруй хүн хүсэлт ирүүлснээс 714 иргэний лавлагааг олгоод байна