Нийслэл хот үүсэн байгуулагдсаны 385 жил, Нийслэл Хүрээг “Улаанбаатар хот” хэмээн нэрийдсэний 100 жилийн ойд зориулан Нийслэлийн Засаг даргын Тамгын газар болон нийслэлийн Архивын газраас 2024 оны аравдугаар сарын 23-30-ны өдрүүдэд “Улаанбаатар хот-100” архивын баримт, биет үзмэрийн үзэсгэлэнг танилцуулж байна.

Үзэсгэлэнд 1924 онд хотын захиргаа байгуулагдсантай холбогдох архивын баримтууд голлосон бөгөөд анхны хурлын дарга, анхны хотын дарга томилогдсон үеийн түүхэн баримтууд дэлгэгджээ.

Энэ үеэр нийслэлийн Засаг даргын Нийгмийн салбар, ногоон хөгжил болон агаар, орчны бохирдлын асуудал хариуцсан орлогч А.Амартүвшин “Улаанбаатар хотын түүхт ойг тохиолдуулан гаргаж буй уг үзэсгэлэнд Улсын анхдугаар их хуралд нийслэл хотоос сонгогдсон төлөөлөгчдийг батламжилсан баримт бичгүүд, анхдугаар үндсэн хууль боловсруулах комиссын гишүүдийн гар бичмэл, хуулийн төсөл, Нийслэл хүрээг “Улаанбаатар” хэмээн нэрийдсэн тогтоол, тухайн үед ашиглаж байсан тамга гэх мэт олон түүхийн үнэт биет бүтээлүүдийг дэлгэн гаргасан. Нийслэл хотын ойн хүрээнд гаргаж буй уг үзэсгэлэнг өргөнөөр ирж үзэхийг уриалж байна” гэв.

Катар улсын нийслэл Доха хотод хятад пүүл бильярд (Heyball)-ын Ази тивийн аварга шалгаруулах тэмцээн аравдугаар сарын 19-22-ны өдрүүдэд болов.

Тэмцээнд манай улсаас Э.Тэмүүжин, Б.Нарантуяа, Б.Баттуяа, Э.Ариунцэцэг нар өрсөлдсөнөөс Э.Тэмүүжин алтан медаль хүртэж, Монгол Улсаас бильярдын спортын анхны Ази тивийн аварга төрлөө.

Э.Тэмүүжин өмнө нь Америк пүүл бильярдын өсвөр үеийнхний ДАШТ-ээс хошой мөнгөн (2016, 2017 онд) медаль хүртсэн бөгөөд 2024 оны снукер бильярдын УАШТ-ээс алтан медаль хүртсэн тамирчин юм.

Катарын Доха хотод тус тэмцээний араас аравдугаар сарын 23-26-нд Катарын нээлттэй тэмцээн болох бол аравдугаар сарын 28-наас арваннэгдүгээр сарын 9-нд снукер бильярдын 15 улааны дэлхийн аварга шалгаруулах тэмцээн болно гэж Биеийн тамир, спортын улсын хорооноос мэдээллээ.