Монгол Улсад Фэйсбүүк идэвхтэй хэрэглэгчдийн тоо 2.2 саяд хүрсэн. Нийт хүн амын 70 хувь нь сошиал орчинд идэвхтэй байж, мэдээ мэдээлэл авч бусдад түгээж байна. Энэ үзүүлэлтээрээ бид Азид тэргүүлжээ. Тиймээс нийгмийн сүлжээний зохистой хэрэглээг хэвшүүлэх, цахим орчин дахь  мэдээллийн аюулгүй байдал болон хүүхэд хамгааллын асуудалд зөв гарц, гаргалгааг бий болгох, хуурамч мэдээлэлд автахгүй,бодлого зохицуулалт зэрэгт анхаарал хандуулах хэрэгтэй болоод байгаа юм.

Өнгөрсөн оны есдүгээр сард Фэйсбүүк группын Хонг Конг, Тайван, Монгол Улсыг хариуцсан захирал Жорж Чен тэргүүтэй төлөөлөгчид Монгол Улсад айлчлах үеэрээ Харилцаа холбоо, мэдээлэл технологийн газрын дарга Б.Чинбаттай уулзаж, дээрх асуудлаар санал солилцож хамтран ажиллахаар тохиролцсон байна. Тиймээс энэ сарын 1-ны өдрөөс Нийслэлийн ерөнхий боловсролын 20 сургуульд “Dijital literacy” буюу бүх нийтийн тоон бичиг үсэгтэн болгох ажлыг эрчимжүүлж, сурагчдыг “Дижитал бичиг үсэгтэн” болгох хөтөлбөрийг хэрэгжүүлэхээр болжээ.

Тус хөтөлбөрийг Фэйсбүүк компаний захиалгаар Харвардын сургуулийн баг хамт олон боловсруулсан юм байна. Агуулгын хүрээнд үндсэн 18 хичээлээс бүрдэх төдийгүй “Хувь хүний орон зай”, “Хувийн нууцлал” гэж юу вэ?, “Сошиал медиаг хэрхэн зөв ашиглах тухайд”, “Яаж эерэг хандлагатай байх вэ?”,  “Хэрхэн сошиал медиад зөв хэрэглэх вэ?”, “Мэдээллийн бодит үнэнийг яаж шалгах вэ?” зэрэг хичээлүүд орно.

Тус хөтөлбөрийг гол зохион байгуулан, хэрэгжүүлж байгаа “Faro Foundation Mongolia” байгууллагын гүйцэтгэх захирал А.Бямбажаргал:

-Манай байгууллага тус хөтөлбөрийн “Сургагч багш”-ийг  бэлтгэж байна. Бид эхний ээлжинд 20  сургууль сонгосон.  Нэг удаагийн хичээл маань нэг цагаас нэг цаг гучин минут үргэлжилнэ. Тэгэхээр 18 хичээл маань дөрвөн сар буюу нэг улирал бүтэн хичээлнэ гэсэн үг. Энэ нь нэг сургуулийн 500 хүүхдэд хүрнэ гэж төлөвлөвөл нэг улиралд 10000 орчим хүүхдийг сургана. Хөтөлбөрийн үр дүнд хүүхдүүд шүүмжлэлт сэтгэлгээтэй болоод аливаа зүйлд 100 хувь итгэхгүй, хуурамч мэдээлэлд нухацтай хандаж, хуурамч хаягнаас нийтэлсэн мэдээлэлд шууд итгэхгүй байх, өөрийнхөө мэдээллийг ил нийтлэж, гэмт хэрэгт өртөх эрсдлээс сэргийлэх зэрэг мэдлэгтэй болно.  Өөрөөр бол энэхүү хөтөлбөрийн үр дүнд хүүхдүүд сошиалд зөв зохистой оролцож чаддаг болно гэлээ.

• 11-р сургууль
• 1-р сургууль
• 52-р сургууль
• 12-р сургууль
• 45-р сургууль
• 20-р сургууль
• 28-р сургууль
• 115-р сургууль
• 23-р сургууль
• 93-р сургууль
• 44-р сургууль
• 5-р сургууль
• Өсвөрийн зохион бүтээгчдийн сургууль
• Эрдмийн өргөө цогцолбор
• Төгс дэлгэрэх сургууль
• Эрдмийн ундраа сургууль
• Шинэ Монгол сургууль
• Ирээдүй цогцолбор
• Hobby сургууль
• Орчлон сургууль