Засгийн газрын өчигдрийн хуралдаанаар “Эрдэнэс-Тавантолгой”-н хувьцааны асуудлыг хэлэлцсэн боловч ямар шийдвэр гаргасан талаарх мэдээллийг олон нийтэд танилцуулаагүй байна.

“Эрдэнэс-Тавантолгой” компанийн ТУЗ хуралдаж нэгж хувьцааны үнийг 25 төгрөгөөр тогтож, 1072 ширхэг хувьцаатай хүн 26800 төгрөгийн тогдол ашиг авна гэсэн мэдээлэл гарсан билээ. Энэ талаар Тавантолгой компанийн гүйцэтгэх захирал Д.Ганхуягаас тодруулахад “Засгийн газар “Эрдэнэс-Тавантолгой” компанийн 85 хувийг эзэмшдэг учраас нэгж хувьцааны үнийг тогтоох эрхтэй. ТУЗ хуралдаж нэгж хувьцааны үнийг 25 төгрөгөөр тогтсон гэдэг нь 25 төгрөгөөс доошгүй гэсэн шийдвэр гаргасан гэсэн үг л дээ. Дээшээ байх уу, үгүй юү гэдгийг Засгийн газар шийднэ. Энэ сарын 30-нд манай компанийн хувьцаа эзэмшигчдийн хурал болно” гэсэн юм.

“Эрдэнэс-Тавантолгой” компани энэ жил 807 гаруй тэрбум төгрөгийн цэвэр ашигтай ажилласан учраас иргэдэд ногдол ашиг өгнө гэсэн мэдээллийг салбарын сайд болон компанийн удирдлагын зүгээс өгч байсан билээ. Ингэхдээ 1072 ширхэг хувьцааны ногдол ашиг 53000 орчим төгрөг болох талаар мэдээлж байсан ч компанийн ТУЗ нэгж хувьцааны доод үнийг 25 төгрөгөөр тогтоох шийдвэр гаргасан байна. Гэхдээ үүнээс өндөр байх боломжтой бөгөөд эцсийн шийдвэрийг Засгийн газар гаргах юм.

Дашрамд сонирхуулахад, Тус компанийн 85 хувийг төр, 15 хувийг иргэд эзэмшдэг. Харин бусад хувийн компаниуд маш бага хувь эзэмшдэг  аж. “Эрдэнэс-Тавантолгой” компанийн хувьцааг 2.8 сая иргэн эзэмшдэг гэсэн тооцоо бий. Эдгээрээс 2016 оны сонгуулийн үеэр Ерөнхий сайд асан Ч.Сайханбилэг зарим иргэдийн 300 ширхэг хувьцааг 300 мянган төгрөгөөр худалдан авч мөнгөжүүлсэн бол  оюутнууд сургалтын төлбөр хэлбэрээр ашигласан байдаг билээ.