Нийслэлийн Засаг дарга С.Амарсайхан өнөөдөр хийж хэрэгжүүлсэн ажил болон цаашид хийхээр төлөвлөөд байгаа ажлуудынхаа талаар мэдээлэл хийлээ.

Тэрээр “Миний бие Улаанбаатар хотын захирагч бөгөөд хотын даргын ажлыг 2019 оны хоёрдугаар сарын 27-ны өдөр албан ёсоор хүлээж авснаас хойш хийж хэрэгжүүлсэн ажил болон цаашид хийх ажлынхаа талаар мэдээлэл өгөх албан ёсны уулзалтаа өнөөдрөөс эхлүүлж байна.

Өнөөдөр нийслэл замбараагүй, зах хязгааргүй байгаа нь үнэн. Тиймээс дотоод зохион байгуулалтдаа анхаарч ажиллахаар болсон. Маш олон ажил хийх шаардлага байдаг боловч зохион байгуулалт байхгүйгээс ажил эзэнгүйдэн хийж хэрэгжүүлж байгаа төсөл хөтөлбөрүүдэд нь ямар ч үр дүнгүй болж байна. Дээр нь ёс зүй гэдэг зүйл байхгүй болсон. Энэ асуудлыг цэгцэнд нь оруулж эхэлсэн.

Дотоод зохион байгуулалттайгаар дамжуулан мэдээлэл түгээхэд буруу талаас нь харагдуулах, буруу мэдээлэл өгөх явдал их гарах боллоо. Жишээ нь, олон нийтийн хэвлэл мэдээллийн хэрэгслээр тарж байгаа мэдээлэлтэй холбогдуулан байр сууриа илэрхийлэх шаардлагатай байна.

Сүүлийн өдрүүдэд олны анхаарал татаж байгаа асуудал бол Хятадын компанид С.Амарсайхан 50 га газар олгосон гэсэн гүтгэлэг. Засгийн газрын тэргүүний захирамж гарч судалгаа тооцоо нь 2012 онд гарсан. Үүний дагуу Тяньжин хотын захиргаатай хамтран хүнсний ногоо тарих, хүлэмж барих ажлыг судлах шаардлагатай байна гэсэн бичиг ирүүлсэн.

Дараа нь миний зүгээс ЗГХЭГ-ын дарга Л.Оюун-Эрдэнийн нэр дээр хамтын ажиллагааг судлах Нийслэлийн өмчит менежментийн компанийн нэрийг явуулсан. Үүнийг НИТХ-ын тэргүүлэгч С.Мөнхчулуун хятадуудад 50 га газар олгосон гэж гүтгэсэн. Өөрийнхөө хадам эхийн нэр дээрх ААН-д нийслэлийн өмчит байрыг хувьчилж өгөхөөр оруулж ирсэн юм. Миний бие НИТХ-ын даргаар ажиллаж байхдаа энэ асуудлыг 2-3 удаа буцаасан байгаа. Цаана нь өөрийнх нь ажил амьдралтай холбоотой олон асуудал байгаа юм билээ. Энд ямар нэгэн газар олголт явагдаагүй, тийм шийдвэр гараагүй. Харин дотоодын хүлэмж эрхлэгчдийг дэмжих тал дээр анхаарч ажиллаж байгаа.

Хоёрдугаарт, төв цэвэрлэх байгууламжид үйлдвэрлэлийн осол болж дөрвөн хүний амь эрсэдсэн. Ар гэрт нь нялх биетэй, жирэмсэн, өвчтэй хүмүүс үлдэж байгаа. Яг тэр осол болсон газар өмнө нь найман тэрбум төгрөгөөр засвар хийсэн.Засвар чанаргүй хийснээ нуухын тулд дээрх гүтгэлгийг тарааж байна.

Нийслэлд шүд, эрүү нүүрний төв гэж бий. Төвийн зориулалтаар 1000 м2 байрыг 4.8 тэрбум төгрөгөөр худалдаж авсан асуудал бий. Би энэ ажлыг өмнө нь буцааж байсан ч сая нээлттэй сонгон шалгаруулалт зохион байгуулж худалдаж авсан юм билээ. Төлбөрийнх нь 70 хувь орсон байгаа. Үлдсэн төлбөрийг би өгөхгүй гэж бодож байгаа. Учир нь уг барилга гаднаа зогсоолгүй, шаардлага хангахгүй. Энэ мэт үйлдэл гаргасан хүмүүс булхайгаа нуух гэж элдэв гүтгэлэг тарааж байна” гэв.