Эх үрсийн баярын өдрүүдэд Төв талбай, Цэцэрлэгт хүрээлэн, Үндэсний парк гээд олон газар тусгай хөтөлбөртэй үзвэрүүд болж, дуу хуур, дурсамж хөөрөөр дүүрэн байлаа.

Хүүхэд багачуудын хамгийн их очих дуртай Үндэсний соёл амралтын хүрээлэнд хүүхдүүдийн шимтэн үздэг хүүхэлдэйн кинонуудын дуу, хөгжим эгшиглэсэн. Хэдийгээр зургадугаар сарын 1-ний үдэш бороо орсон ч уран бүтээлчид цугласан олонд уран бүтээлээ толилуулж, үзэгчид ч бороог үл анзааран шимтэн сонсож байлаа.

Дуучин Насаа буюу Л.Насанбуян энэхүү үдшийн гол эзэн байсан бөгөөд тэрбээр бороонд норсон ч сэтгэл хангалуун дуулсан. Үзэгч хүүхдүүд ч түүний дуулахыг чагнан сонсохдоо бороонд норохоо үл анзаарч байв. “Үнэхээр гоё үдэш. Бороонд норсон ч хүүхдийн дуртай хүүхэлдэйн киноны дуу, хөгжим паркад эгшиглэв. Бороонд норон дуулсан ч сайхан байлаа.” гэж сэтгэгдлээ илэрхийлсэн.

Хэдийгээр баярын өдөр хур бороотой байсан ч Үндэсний соёл амралтын хүрээлэнд саатсан хүүхэд багачууд, эцэг, эхийн хамт сонирхолтой тоглолтын нэгэн үзэгч болсон юм.

Дуучин Л.Насанбуян охинтой болсоноос хойш уран бүтээл хэсэг завсарласан ч эргэн орж, хамгийн сүүлд “Үүрд хайрлаарай” бүтээлээ олны хүртээл болгосон. Тэгвэл уран бүтээлч маань энэ жилийн эх үрсийн баяраар хүүхэд, багачуудтай хүүхдийн киноны бүтээлээр уулзлаа.