Алдарт “Vogue” сэтгүүл загвар зохион бүтээгч Жаргалсайханы Мандхай хэмээх 30 настай монгол бүсгүй болон түүний үүсгэн байгуулсан ноолууран хувцасны “Mandkhai” брэнд өрнийн хувцас загварын ертөнцөд анхаарал татаад байгаа талаар сурвалжлага бэлтгэж, түүнээс ярилцлага авсан байна. Мөн саяхан алдарт загвар өмсөгч Жижи Хадид “Mandkhai” брэндийн ноолууран хүрмээр гангарч Нью-Йоркийн гудамжаар алхаж байгаа нь хэвлэлийн дуранд өртсөн ажээ.

“Mandkhai” брэнд АНУ, Их Британи зэрэг орнуудад хурдацтайгаар амжилт олж, загварын олон шоун дээр танилцуулагдсан. Тэр ч байтугай дэлхийн зарим алдартнуудын өмсөх дуртай брэнд болоод байгаа ажээ. Үүсгэн байгуулагч Ж.Мандхайн талаар “Vogue” сэтгүүл бичихдээ түүнийг хориод насандаа загвар болон маркетингийн чиглэлээр суралцахаар Лондонд шилжиж ирсэн, түүний эцэг эх нь 90 оны ардчилсан хувьсгалын дараахан хувиараа ноолууран хувцасны бизнес эхэлсэн анхны монгол гэр бүл болсон. Өдгөө тэдний эзэмшдэг ноолуурын хоёр үйлдвэр улсдаа томоохонд тооцогддог хэмээн танилцуулжээ. Мөн Мандхай сургуулиа төгссөнийхөө дараа томоохон дизайнеруудад ноолуур нийлүүлэгчийн бизнесийг эрхлэхийн хажуугаар өөрийн нэрийн брэндээ үүсгэн байгуулсан гэжээ. Мандхайн гаргасан дизайнууд биед эвтэйхэн, тухтай байдгийг тус сэтгүүл мөн онцолсон байна.