Утаа нь хоолой хорсгож, угаар нь толгой өвтгөдөг байсан улаанбаатарчуудын уушги цэвэршиж, өглөөний цэвэр тунгалаг агаараар амьсгалахыг сайхныг өнөө өглөө дахин мэдрэв. Ийм мэдрэмжийг сүүлийн арав гаруй жил эдлээгүй билээ бид. Уг нь утаанаас зөвхөн улаанбаатарчууд ангижрах ёстой бус улсын хэмжээгээр хорт утаа гэдгийг мартахын төлөө хамтдаа тэмцэх хэрэгтэй байна. Өнгөрсөн пүрэв гаригт орон нутагт томилолтоор ажиллаад ирлээ. Явсан ажил бүтэмжтэй сайхан ч суудлын галт тэрэгний угаарт хордон шөнөжин толгойгоо ганзаглаж, эмтэй “найзалж” ирсэндээ бухимдаж сууна. Уг нь Улаанбаатараас хөдлөхөд угаар үнэртэхгүй л байсан. Гэвч “Эмээлт” өртөө зогсоод л хөдлөхөд л галт тэргээр дүүрэн түүхий нүүрсний үнэр үнэртэж улмаар шөнөдөө угаараар амьсгалж эхэлсэн. Утаатай тэмцэж буй энэ цаг дор угаартна гэдэг байж болшгүй зүйл. Тэр өдөр “Улаанбаатар- Зүүнхараа- Дархан-Эрдэнэтийн чиглэлийн галт тэргээр дор хаяж 300 гаруй зорчигч аялсан болов уу. Орон нутгийн галт тэргээр зөвхөн монголчууд зорчдоггүй. Өдөрт дунджаар мянга орчим хүн урд хойд чиглэлд зорчдог гэж үзвэл тэр хэрээр мянган хүн түүхий нүүрсний хорт утаагаар амьсгалж, уушгины хорд хавдраар өвчлөхийн эхлэл тавигдаж байна гэсэн үг. Нөгөө талаар МТЗ цаашлаад Жигжиднямаа дарга Засгийн газраас авч хэрэгжүүлж байгаа утаанаас салах хөтөлбөрийг эсэргүүцэж, тэрхүү эсэргүүцлээ түүхий нүүрс түлэх байдлаар илэрхийлж байгаа юм болов уу. Манай купенд дөрвөн зорчигч аялсны гурвынх толгой шөнө дундаас хойш өвдсөн нь угаарт хордсоны шинж болов уу. Эцэст нь хэлэхэд, энэ бол шийдэж болохгүй зүйл биш. Жигжиднямаа дарга вагон депогийнхондоо түүхий нүүрс түлэхгүй байх талаар үүрэг өгөхөд л шийдэгдэх асуудал. Сэтгэл гаргахгүй л байна даа. Би дахиж угаар үнэртсэн галт тэргээр зорчиж, уушгиа өвчлүүлмээргүй байна шүү, Жигжиднямаа дарга аа.