УИХ-ын ээлжит сонгууль айсуй.  Нэр дэвших эрхийн төлөөх тулаанд олон хүн мордсон.  Өрсөлдөгчөө гэж харсан бүхнээ намнаж буй нь ч нууц биш.    Улс төрийн намуудын их, бага хуралдай зарлагдах хүртэл хичнээн хүн аавын хаалга татахыг таашгүй.  Намынхаа даргад ойр, ам тохироогоо сайн хийж чадсан нөхдүүд л бүтэн нойртой хонож байгаа болов уу. Буланд шахагдсан, ЖДҮ-д  нэр холбогдсон гишүүдийн тухайд  хувь заяатайгаа эвлэрэхээс   өөр арга үлдээгүй.    Ингээд  УИХ-ын 2020 оны сонгуульд хэн хэн хаана нэр дэвшихээр байна вэ гэх  таамгийг хүргэе.

Архангай аймаг.  Улс төрийн нөхцөл байдлын хувьд харьцангуй тайван тойрог.  Бэл бэнчинтэй нөхдүүд сүүлийн 20 жилийн турш  бууриа засах гэж  тэмцэлдэж буй учраас   хурдан удмын адуу,   сүүтэй үнээ зэрэгт хууртахаа больсон байна лээ.   Өнгөрсөн сонгуульд   Ардчилсан намаас Р.Гончигдорж, Д.Ганхуяг, Н.Батбаяр,  МАХН-аас   Ц.Цэдэндамба, Б.ГаЫнцэцэг  нар нэр  дэвшиж байсан бол Б.Мөнхзул, Б.Мэндсайхан хоёр бие даасан юм. Харин  2020 оны сонгуульд  УИХ-ын гишүүн  Ж.Мөнхбат,  Ё. Баатарбилэг хоёр бараг л тодорхой болж байгаа бол  Г.Тэмүүлэнгийн хувьд М.Энхболдын фракц гэдгээрээ буланд шахагдаад байгаа аж.  Ардчилсан намын хувьд  Сангийн сайд асан   Болор, Портунаагийн охин Б Жаргалан,  УИХ дахь   АН-ын бүлгийн ажлын албаны дарга,  Д.  Золжаргал,  Багшийн дээд сургуулийн  ректор  Б. Мөнхзаяа  нар намдаа  дэнчингийн 40 саяаа тушаачихсан гэх яриа байна.

Баян-Өлгий. МАН-аас ХХААХҮЯ-ны дэд сайд А.Сауле эмэгтэйчүүдийн квотод нэр дэвшихээр яригдаж байна. Харин Г.Солтан гишүүний хувьд ЖДҮ –ээс зээл авсан гэдгээрээ  буруудан торгуулийн суман руу илгээгдээд байгаа.   Барилга хот байгуулалтын сайд Х.Баделханы тухайд  нам нь дэмжвэл  буцах юун хэмээж буй.  Шинэ хүний тухайд  Засаг дарга А.Гылымхан   намын даргаас хариу хүлээж байгаа гэх тайлбартайгаар орон нутгаа тойроод эхэлсэн гэх яриа байна.  Харин Ардчилсан намаас А.Бакей, Х.Ержан, Мурат гэсэн нэр яригдаад эхэлсэн.  Өмнөх сонгуульд  АН-ын гурван нөхөр гурвуулаа нэр дэвшин өвдөг шороодсон байдаг.  БН-аас Н.Самат гэх эр нэр дэвшиж байсныг өгүүлэх хэрэгтэй болов уу.

Баянхонгор. МАН-аас одоогийн УИХ-ын дарга Г.Занданшатар, Л.Элдэв-Очир,   аймгийн Засаг дарга Г.Батжаргал,    ЭМЯ-ны төрийн нарийн бичгийн дарга асан Э.Содномжамц нар  энэ тойрогт өрсөлдөнө.  Хүчтэй тулаан  Засаг ноён Э. Содномжамц хоёрын дунд болж буй сурагтай. Эмэгтэйчүүдийн квот дээр  М.Билэгтээс өөр хүний   нэр  дуулдахгүй байна.  Намд эмэгтэйчүүдийн суудал хэрэгтэй гэж үзвэл түүнийг “залах” л байх.   Харин Ардчилсан намаас Консул асан Д.Мөнх-Эрдэнэ, Нийслэлийн Ардчилсан намын ҮБХ-ны гишүүн П.Нүрзэд, УИХ-ын гишүүн асан “битон” Д.Ганбат, АН-ын ҮБХ-ны гишүүн “Номгон санчир” ХХК-ийн захирал А.Адъяасүрэн  нар горилж яваа.   Өмнө нь энэ тойрогт АН-аас  Д.Ганбат, Н. Түвшинбаяр, Х.Баттулга,  О.Амартүвшин МАХН-аас А.Одончимэг, Б.Ууганбаяр, А.Батдорж, Монголын Ардчилсан хөдөлгөөний намаас М.Чинзориг, бие даагчдаас Ж.Төмөрхуяг, Б.Бат-Эрдэнэ нар нэр дэвшин  өрсөлдөж байв.

Булган.  Энэ тойрог  хоёр мандаттай. МАН-аас Ж.Бат-Эрдэнэ, хуульч  Б.Гүнбилэг,  БОАЖЯ-ны төрийн нарийн бичгийн дарга Ц.Цэнгэл,  “Содмонгол”-ын Н.Анандбазар   нар хүч үзнэ. Хэн нь нэр дэвших нь  Ж.Бат-Эрдэнээс бусад нь таамагт орсон нөхдүүд.   Хуульч Б.Гүнбилэгийн хувьд  нам нь дэмжлэг үзүүлэхгүй бол бие даах бодолтой   байгаа бөгөөд тэрбээр Уухай хөдөлгөөний тэргүүн эгнээнд яваа юм.  Ц.Цэнгэл даргын тухайд   Элчин  сайдад зүтгэх үед нь Ерөнхийлөгч   зөвшилцсөнөөсөө ухарсан учраас  гомдолтой үлдсэн  тэрбээр нэр дэвшинэ хэмээж буй  бол Н.Анандбазар  өмнөх сонгуульд намайг шоронд суулгаа биз дээ хэмээн зүтгэх нь зүйн хэрэг.    Ардчилсан намаас Н.Түвшинбаяр , ХУАҮ-ийн танхимын дарга  О.Амартүвшин нарын  нэр одоогоор яригдаж буй.   Мөн  Ерөнхийлөгчийн зөвлөх,  МАН-ын гишүүн Э.Мөнх-Очир бие даан нэр дэвших бодолтой яваа гэсэн. Өмнө нь тус тойрогт   АН-аас О.Амартүвшин, МАХН-аас Б.Шижирбаатар, Эх орон эвсэлээс М.Болормаа нар нэр дэвшиж байв.

Говь-Алтай.  Хоёр мандаттай тойрог. Өмнө нь нэг л мандаттай байсан юм.  МАН-аас тус намын генсек Д.Амарбаясгалан,    Уул уурхайн сайд агсан Д. Дашдоржийн  төрсөн дүү  Д. Баянмөнх нарын нэр бараг л тодорхой болжээ.  УИХ-ын гишүүн Ш.Раднаасэдийн хувьд  таван жил нэр дэвших эрхгүй болоод байгаа.  Нам нь түүнийг шийтгэсэн хэрэг.  Ардчилсан намаас   Засаг дарга асан О.Амгаланбаатар,   Ерөнхийлөгчийн оюутны бодлого хариуцсан орон тооны бус  зөвлөх   Н.Лхагвадорж  хоёрын нэр сонсогдох болсон.   МАХН    хошууч генерал Н.Жалбажав гуайд нэр дэвших санал тавьжээ.

Дорноговь.   Хоёр  мандаттай тойрог.   МАН-аас   УИХ-ын гишүүн  Б.Дэлгэрсайхан,  “Эрдэнэс Монгол” ХХК-ийн захирал О.Одбаяр нэр дэвших бололтой. Тэрбээр саяхан ажлаа өгсөн. Энэ хоёроос  гадна  МАН-ын дарга,  Засаг дарга  Т.Энхтүвшин нам дэвжвэл  нэр дэвшинэ хэмээж буй.    Харин Ардчилсан намаас одоогоор яригдаж байгаа нэрс тодроогүй байна.

Дархан-Уул аймаг.  Мандатын тоо гурав.  МАН-аас  Б.Баттөмөр, Д.Хаянхярваа нар нэр дэвшихээр зэхэж буй.   Мөн УИХ-ын даргын зөвлөх  Ж.Сүхбаатар санаатай байгаа.   Шинэ хүн гэвэл   Монголын төмөр замын дарга  асан  Б.Цэнгэл.   Харин УИХ-ын гишүүн Б.Жавхлангийн тухайд энэ удаад нэр дэвшихгүй . Учир нь түүнийг МАН-ын дарга У. Хүрэлсүх сонгуулийн дараа  Сангийн сайдаар томилох санал тавьсан хэмээн   саарал  ордны  бор шувуу жиргэж эхэлсэн.   Ардчилсан намаас Н.Мөнхдаш, Л.Наранбаатар нар горилж яваа сурагтай.

Дорнод аймаг.  МАН-д  тус тойрогт шинэ нэр дэвшигчдийг илгээх сонирхол буй. Юутай ч  ХХЕГ-ын дарга, хошууч генерал Ц.Сэргэлэн нэр дэвшихээр ажлаа өгөөд байгаа.  Мөн  Хууль зүй, дотоод хэргийн яамны дэд сайд асан Б.Энхбаяр  нэр дэвшихээр горилж буй. Тэрбээр  нам дэмжихгүй бол Уухай хөдөлгөөнийг төлөөлж, бие даан нэр дэвшинэ  гэдгээ хэвлэл мэдээллийнхэнд ам алдсан удаатай.   Ардчилсан намаас  П.Алтангэрэл өрсөлдөх болов уу.   Түүнчлэн  АПУ-ийн П.Батчимэгийн нэр эмэгтэй квотод дуулдах болсон.  Өмнө нь тус тойрогт МАН-аас   Х.Болорчулуун,   Н.Номтойбаяр   АН-аас М.Зоригт,    МАХН-аас  Ж.Энхжаргал нар нэр дэвшиж байв.

.

Дундговь аймаг, Говьсүмбэр.  Хил залгаа орших боловч   нутгийн олон  хоёр аймгийн нэгтгэн нэг тойрог болгож буйд ихээхэн дургүйцэж буй.  Дундговьчуудын хувьд Б.Наранхүүгээсээ уйдсан гэх яриа  гараад байгаа.  Энэ удаагийн сонгуульд  УИХ-ын гишүүн Г.Мөнхцэцэг,  Засаг дарга Г.Батсуурь  хоёрын нэг нь МАН-аас нэр дэвших байх гэсэн сураг гарсан.  АН-аас  Б.Наранцацралт агсны хүү Н.Соёмбо  нэр дэвшиж магадгүй.  Дашрамд сонирхуулахад,    УИХ-ын гишүүн Д.Дамба-Очир зорихоор бэлтгэж байсан   боловч  нам нь таван жилийн хугацаанд улс төрийн дэмжлэг үзүүлэхгүй гэсэн шийдвэрийг  гаргасан.  Энэ сургаар  Оюутны холбооны Б.Амарсанаа гэх залуу тус тойргийг  сонирхоод эхэлсэн гэнэ.

Завхан аймаг.    Сонирхол татахуйц тойрог.  МАН-аас  заан Ц.Цэрэнпунцаг,   Ш. Сайхансамбуугийн  дүү .Ш.Батсамбуу,  УИХ-ын гишүүн  О.Содбилэг нар нэр дэвшихээр яригдаж байгаа гэнэ.  Эмэгтэй квот дээр   УИХ-ын гишүүн Д.Оюунхоролыг  зүтгүүлж магадгүй  гэх бор шувуу нисч буй.  АН-аас  УИХ-ын гишүүн З.Нарантуяа, Я.Санжмятав, Завхан аймгийн Засаг дарга Д.Батсайхан нарын нэрс яригдаж байгаа юм.

Орхон аймаг. МАН-ын нарийн бичгийн дарга Ц.Бат-Энх, ЗГХЭГ-ын дэд дарга асан Б.Бат-Эрдэнэ нар Орхон аймгийг тойглож яваа. Хамгийн сүүлд Хууль зүй, дотоод хэргийн сайд Ц.Нямдорж  нутгийн түмнээ түшин   Орхон аймгийг зорихоор зэхэж байгаа гэх мэдээлэл бий.  АН-аас   хэн  нэр дэвших нь  одоогоор бүрхэг байгаа бол МАХН-аас  О.Баасанхүү өрсөлдөнө. Мөн түүнтэй хамт  С.Ганбаатар  нэр дэвшинэ гэх дам яриа  гараад амжсан.

Өвөрхангай.   Энэ аймагт  МАН-аас  магадлал өндөр ганц хүн нь С.Чинзориг л болоод байна. Д.Тогтохсүрэн, Я.Содбаатарын тухайд өнжиж, намдаа ажиллах үүрэг аваад буй. Иймд УИХ-ын гишүүн  Д.Лүндээжанцан  боломж  олгохыг хүлээж буй.   АН-аас  Асашёорү Д.Дагвадорж,  ” Нутгийн буян” ХХК-ий  захирал   н. Баторшихын нэр  дуулдаж эхэлсэн.  Ерөнхийлөгчийн Тамгын газрын дарга З.Энхболд   тус аймгийг сонирхож байсан ч  судалгаандаа бүдэрсэн гэх яриа гарсан.

Өмнөговь. МАН-ын намаас  МСНЭ-ийн дарга Х.Мандахбаярыг дэвшүүлэхээр болсон гэх яриа байгаа ч түүний хүчтэй өрсөлдөгч бол аймгийн Засаг дарга Н.Наранбаатар.  Л.Энхболдын хувьд “ЖДҮ” гэх зүйлд холбогдсон учраас намаас нь  нэр дэвших эрхийг нь таван жил хассан.

Ардчилсан намаас тус аймагт нэр дэвших “Ажнай” Д.Бат-Эрдэнэ, Барилга хот байгуулалтын сайд асан Ц.Баярсайхан нарын нэр дэвших болов уу гэсэн таамаг байгаа. МАХН-аас шадар сайд асан Ц.Оюунбаатар. Бие  даагчийн тухайд  “Монголоо аваръя” хөдөлгөөний тэргүүн  сэтгүүлч А.Эрдэнэ баярын нэр дуулдах болов.

Сүхбаатар аймаг. МАН-аас  Ерөнхий сайд У.Хүрэлсүх өрсөлдөхөөр яригдаж байгаа бол  гавьяат  эмч  Ө.Чинбүрэн,  Батзандангийн ах Ж.Бат-Эрдэнэ хоёрын нэг гэх яриа гараад байгаа. Ч.Улаан сайдын тухайд тэрбээр 2020 оны сонгуульд нэр дэвшихгүй гэх  ам өчигтэйгөөр  ХАА-ны салбарыг тэргүүлэх болсон гэх яриа байдаг ч  тэрбээр нэр дэвших бэлтгэлээ ханган үе үехэн нутгийн зүг хүлгийн жолоо залах болсон.  Ардчилсан намаас экс Засаг дарга Ж.Батсуурь,  ХААЯ-ны төрийн нарийн бичгийн дарга асан Н. Ганибал  дахин хүч үзэх болов уу. Мөн  М.Зоригт гишүүн ч өрсөлдөж мэдэхээр байгаа.

Сэлэнгэ.   Энэ удаагийн горилогчид   Д. Эрдэнэбатаас  бусад нь шинэ хүмүүс байгаа.  Гэхдээ нам нь мань хүнийг энэ удаад өнжүүлэх шийдвэрийг гаргаж мэднэ. Тиймээс түүний оронд аймгийн МАН-ын дарга, аймгийн Засаг дарга Ш. Оргилыг хүчээр оруулж ирнэ.    Түүнтэй мөр зэрэгцээд  МАН-ын  ЗТХЯ-ны дэд сайн асан Б.Цогтгэрэл,   эмэгтэй гэх  тодотголоор   МУИС-ийн Санхүү эрхэлсэн дэд захирлаар ажиллаж байсан эдүгээ  Ерөнхий сайдын зөвлөхөөр томилогдсон   Ч.Ундрам нарын  нэр   яригдах болсон.  Ардчилсан намаас УИХ-ын гишүүн Д.Эрдэнэбат,   Таванбогдын  Баатарсайханы дүү  Ц.Отгонбаатар  нэр дэвших нь тодорхой байгаа.   Хамгийн сүүлд авсан мэдээллээр УИХ-ын гишүүн Ж. Энхбаяр    тус аймагт бизнес хийдэг гэх утгаараа нэрээ дэвшүүлэх ихээхэн сонирхолтой байгаа гэнэ. Уг нь түүний нэр БЗД-т яригдаж байсан юм. Гэвч мань эр ЖДҮ-гээсээ болоод энэ удаад өнжих даалгаврыг намаасаа авах болов уу гэсэн таамаг  буй.

Төв.   Тус тойргийн  сонгогчид  шинэ  нэр дэвшигчийг сонирхож байгаа ч М.Энхболд, Н.Энхболд, А.Сүхбат  нарын тойргоо өгөхгүй хэмээн гэдийцгээж буй.  Одоогоор МАН энэ тойрогт хэнийг илгээх тухайд  нам өөрөө  тэвдэж буй.  Ардчилсан намаас Төв аймагт Төв аймгийн АН-ын дарга, Эрчим хүчний дэд сайд асан Д.Доржпүрэв,  Ардчилсан намын генсек Ц.Туваан, УИХ-ын гишүүн асан Х.Тэмүүжингийн нэр яригдаж байгаа.   Харин  эмэгтэйчүүдийн квотын  тухайд хүчтэй эмэгтэйчүүд өрсөлдөхөөр байгаа.   “Зэс эрдэний  хувийн” Алтанхуяг,  Ерөнхиий сайд Бямбасүрэн гуайн охин Энхбайгаль, Эрдэнэсувд нарын нэр дуулдаж буй.

Увс. МАН-аас Б.Чойжилсүрэн, Ч.Хүрэлбаатар, Н.Цэрэнбат нар бэлтгэлээ базааж байгаа бол Ардчилсан намаас “ТЭСО” корпорацийн захирал О.Цогтгэрэл,  С.Отгонбаяр нар өрсөлдөх болов уу.  С.Отгонбаярын тухайд Хотын даргын төрсөн ах.  Мөн дээрх нэр дэвшигчдийн өвдгийг  чичрүүлэх хүн бол ерөнхий сайд асан Н.Алтанхуяг.

Ховд. МАН-аас  УИХ-ын гишүүн Л.Батнасан, С.Бямбацогт, Ц.Цогзолмаа нар  итгэл төгс  байгаа. Ардчилсан нам  УИХ-ын гишүүн Б.Пүрэвдорждоо ихээхэн итгэл өгч буй.  Ерөнхийлөгчийн зөвлөх  Ш.Адьшаа  дөрвөн жилийн турш тус тойргийг усалж яваа.    Энэ хоёр дээр  Ардчилсан намаас залуучуудын төлөөлөл болгож, Монгол Улсаас АНУ-ын Сан франциско хотод сууж байсан  Ерөнхий консул  асан  Э.Галбадрал орж ирж мэдэхээр байна.

Хөвсгөл.  МАН-ын итгэл бүхий тойрог.  УИХ-ын гишүүн Л.Энх-Амгалан, Ц.Даваасүрэн, Л.Мөнхбаатар нарыг дахиад  нэр дэвшихэд үгүйсгэх сонгогч байхгүй л болов уу.   Ардчилсан намаас  ИТХ-ын дарга асан, уяач Болдбаатар,  уяач Мөнхтөр, Ц.Оюунгэрэл  гурваас өөр хүний   нэр  одоогоор дуулдахгүй байна.

Хэнтий. МАН-аас ЗГХЭГ-ын дарга Л.Оюун-Эрдэнэ, УИХ-ын гишүүн Б.Бат-Эрдэнэ,  Засаг дарга С.Ганбямба нар хэдийнэ тойргоо өмчлөөд авцгаасан.  Ардчилсан намаас  УИХ-ын гишүүн Б.Гарамгайбаатар,  Засаг дарга асан  Ж.Оюунбаатар,   М.Хүдэрбаатар нарын нэрс дуулдаж буй ч Ерөнхийлөгчийн  дэмжлэгтэйгээр Г.Баасан  эмэгтэйчүүдийн квотоор хүч түрэн орж ирж байгаа сурагтай.

Баянзүрх дүүрэг.  Улстөрч гэж өөрийгөө үзэж буй хэн бүхэн энэ тойргийг сонирхож буй гэхэд буруудах зүйлгүй. МАН-аас УИХ-ын гишүүн  Б.Саранчимэг,  НОСК-ын дарга асан  Б.Сүхбаатар нарын нэр одоогоор яригдаж байгаа аж.   Дүүргийн МАН-ын дарга    Э.Бат- Амгалангийн тухайд  УИХ-ын хоёр ч сонгуульд  дүүргээ тавьж туусан “гэмтэн” болоод буй.   Тиймээс  2020 онд намынхаа даргыг солихгүйгээр сонгуульд оролцох боломжгүй хэмээн МАН-ын төв удирдлагууд тооцоолж байгаа гэх сураг байна.  Намын даргаар гүйлгээ ухаан, эдийн засгийн чадавхи сайтай гэдгээр нь Б.Саранчимэгийг томилохыг үгүйсгэхгүй.

Ардчилсан намаас Ерөнхийлөгчийн зөвлөх Б.Пүрэвдаваа  дэд сайд  Булгамаа,  БЗД-ийн дэд дарга   Т. Батцогт, Элбэгборжийн хүү  Э. Эрдэнэ нарын залуучууд өрсөлдөх гэнэ. Харин УИХ-ын гишүүн Ж.Батзандан   ШИНЭ намаасаа өрсөлдөж магадгүй. Зарим эх сурвалжаар  мань хүн Сүхбаатарыг сонгож байгаа гэх. Эхийнхээ талаар Хэнтийд хүч үзэхийг ч үгүйсгэхгүй.  Мөн тус дүүрэгт  УИХ-ын гишүүн асан Ш.Сайхансамбуу бие даан нэр дэвших бололтой.

Баянгол дүүрэг. МАН-аас УИХ-ын гишүүн А.Ундраа, Ж.Ганбаатар тэргүүтнүүд дахин өрсөлдөнө. Мөн Сангийн дэд сайд Х.Булгантуяад нам нь дэмжлэг үзүүлбэл тус дүүрэгт нэр дэвших сонирхолтой байгаа ч нам дэмжлэг үзүүлэхгүй бол Уухай хөдөлгөөнөөс бие даан нэр дэвшихээр яригдаж байгаа гэсэн мэдээлэл байна.  Ардчилсан намаас тус намын дарга С.Эрдэнэ, Баянгол дүүргийн Засаг дарга С.Одонтуяа тэргүүтнүүд бэлтгэлдээ ороод буй. Мөн Д.Оросоо АН-аас нэр дэвшигчдийн дунд бий.

Хан-Уул дүүрэг. УИХ-ын гишүүн Б.Энх-Амгалан,   ж. Алдаржавхлан,  Д.Сарангэрэл нар өрсөлдөхөөр яригдаж буй.   С.Алдаржавхлангийн хувьд   өмнөх УИХ-ын сонгуульд  өвдөг шороодсон намаа авч гарсан гавьяатай нэгэн.  Тарж бутрах дээрээ тулаад байсан дүүргийн намыг эв нэгдлэтэй болгосон гэдгээрээ МАН-ын шинэ удирлагад  үнэлэгддэг цөөн Засаг дарга нарын нэг.   Сайд Д.Сарангэрэлийн хувьд  эмэгтэй квот гэдгээрээ улаан гэрэл асаалттай байгаа.  Дэлхийг цочроосон короно вриусыг барьж чадаж байгаа гэдгээрээ түүний нэр хүнд ахисаар байгаа нь нууц биш. Ардчилсан намаас одоогоор Засаг дарга асан Ж.Ганхуяг, “Эрдэнэс монгол”-ын захирал асан Б.Ариунболд нарын  нэр сонсогдож буй.  Эмэгтэй квот дээр  Ерөнхийлөгчийн зөвлөх Г.Байгальмаагийн нэр яригдаж  байсан ч тэрбээр СЕХ—ны гишүүн болж,  тангараг өргөсөн тул оронд нь тэмцэгч бүсгүй цагдаагийн эхнэр  Энхсайханы нэр мэр сэр дуулдах болов.  Харин УИХ-ын гишүүн Л.Болд ШИНЭ намаасаа нэр дэвшинэ.

Чингэлтэй дүүрэг. МАН-аас УИХ-ын гишүүн Т.Аюурсайхан, М.Оюунчимэг,  Хассуурийн гэх тодотголтой Х.Ганхуяг , Д.Ганболд нар  нэр дэвшихээр тойргоо усалцгааж буй.  АН-аас  УИХ-ын гишүүн  Баярсайханаас өөр хүний нэр  тодорхойгүй байгаа. Мөн Ерөнхийлөгчийн зөвлөх асан Г.Уянга тус дүүрэгт бие даан нэр дэвших сурагтай.

Сүхбаатар дүүрэг. МАН-аас УИХ-ын гишүүн С.Батболд, Д.Цогтбаатар, Ц.Мөнх-Оргил нар урьдын адил нэр дэвшинэ.   Харин Ардчилсан намаас Боловсролын сайд Г.Гантөмөр, АН-ын  Ардчилсан залуучуудын холбоо /АЗХ/-ны Ерөнхийлөгч С.Эрдэнэболд нар тойргоо хэдийнэ тамгалсан.

Сонгинохайрхан дүүрэг. МАН-аас УИХ-ын гишүүн Д.Сумъяабазар, Ц.Гарамжав, Х.Нямбаатар, Н.Учрал нарын нэрс яригдаж байна.   Гэхдээ Учралаа жийж болзошгүй гэх яриа гаргаад амжсан.  Ардчилсан намаас тус дүүрэгт УИХ-ын гишүүн асан Д.Батцогт, Эрүүл мэндийн дэд сайд асан Ж.Амарсанаа нэр дэвшихээр яригдаж байна.

Багахангай, Налайх, Багануур. Тус гурван алслагдсан дүүргийг нэгтгэж, нэг юм уу хоёр мандаттай болгохоор зэхэж байгаа бөгөөд МАН-аас одоогийн Хотын дарга С.Амарсайхан өрсөлдөхөөр яригдаж байна. АН-аас  энэ талаар  тодорхой байр суурьгүй байгаа.

С.Бүрэнжаргал