Белорусь даяар Ерөнхий­лөгчийн сонгуулийн дүнг эсэргүүцэн өрнөж байгаа хөдөлгөөний улмаас тус улсын Батлан хамгалаах яам зарим цэргийн ангийн бэлэн байдлыг өндөржүүлэхийн тулд бэлтгэл цэргүүдийг дайчлан татахаар шийдвэрлэжээ. Чухам хэчнээн хүнийг бэлтгэлээс татаж, хэдийн хугацаагаар алба хаалгах талаар мэдээлээгүй байна. Армийн байлдааны бэлэн байдлыг өндөржүүлэх, шалгах ажиллагааны гурав дахь шатны ажлын хүрээнд ийн нөөцийн дайчдыг татаж байгаа гэж Батлан хамгаалах яам мэдэгдсэнээ албан ёсны сайтдаа нийтэлжээ.
“Цэргийн анги нэгт­гэ­лүүдийн бэлэн байдлын энэ шалгалтын гол зорилго нь цэргийн ангиуд өдөр шөнө, цаг агаарын байнга өөрчлөгдөж байгаа нөхцөл байдалд байлдааны үүрэг гүйцэтгэх болон цэрэг дайчдын бэлэн байдлыг төгөлдөржүүлэх явдал. Энэ сургуулилтын явцад цэргийн анги нэгтгэлүүд нөөцийн цэргийг татах, бэлтгэх ажлыг өндөр түвшинд гүйцэтгэх дадлага сургууль хийх болно” гэж Батлан хамгаалах яам мэдэгджээ.
Белорусийн цэргийн анги нэгтгэлүүдийн бэлэн байд­лыг шалгах ажиллагааны гурав­дугаар шат наймдугаар сарын 24-нд эхэлж тактикийн сур­гууль хийснээр өндөрлөнө гэж Жанжин штаб мэдээлж байна.

Сонгуулийн дүн эсэргүүцлэн олон нийтийн жагсаал цуглаан эхэлсний дараа Белорусийн Ерөнхийлөгч Александр Лукашенко гадаадаас цэргийн аюул заналхийлж байна гэж нэг бус удаа мэдэгдсэн юм. Белорусийн Батлан хамгаалахын сайд Виктор Хренин ч бас улс орны улс төрийн нөхцөл байдал, удирдлагыг өөрчлөхийн тулд “нөхцөл байдлыг тогтворжуулах” нэрийн дор сөрөг хүчин болоод гадны хүчин хүч хэрэглэж болзошгүй байна гэж мэдэгдээд байна.
“Бүгд найрамдах Белорусь улсад бий болооод байгаа нөхцөл байдлыг тогтворжуулах нэрийн дор хүчний блокийн үйл ажиллагаа хурцдаж байгаа нь өөрийн ард түмний эсрэг алан хядлага үйлдэх замаар хүч хэрэглэж улс төрийн удирдлагыг өөрчлөхийг эрмэлзэж болзошгүй байна” гэж тэр хэлжээ. Сайд Хренинийхээр бол ийм ажиллагааг цэргийн анги нэгтгэл, салаа салбаруудыг, ялангуяа белорусийн хилийн ойролцоох ангиудыг ашиглаж болзошгүй учраас энэ сургуулилт шалгалтыг хийж байгаа гэнэ.

Энэ наймдугаар сарын 9-нд болсон ерөнхийлөгчийн сонгуулийн дараанаас сонгуулийн дүнг эсэргүүцсэн эсэргүүцлийн хөдөлгөөн Белорусь даяар өрнөсөн юм. Сонгуулийн дүнгээр өнөөгийн ерөнхийлөгч Александр Лукашенко 80,08 хувийн санал авч ялсан бол түүний өрсөлдөгч Светлана Тихановская 10.09 хувийн санал авсан юм.
Улмаар Тихановская “төрийн эрх мэдлийг яриа хэлэлцээний замаар тайван байдлаар шилжүүлэх үйл явцыг тэргүүлж зохион байгуулах” Зохицуулах зөвлөл байгуулах санал гаргасан байна.
Белорусын энэ сөрөг хүчний Зохицуулах зөвлөлийн тэргүүлэгч гишүүн, Нобелийн утга зохиолын шагналт Светлана Алексиевичийг тус улсын Мөрдөн байцаах хороо Зохицуулах зөвлөл гэгчийг байгуулсан гэмт хэргийн гэрч хэмээн наймдугаар сарын 26-нд ирж мэдүүлэг өгөхийг шаардан дуудлаа гэж Зохицуулах зөвлөлийн хэвлэлийн алба мэдээлжээ.

Х.ӨЛЗИЙ