Филиппиний ерөнхийлөгч Родриго Дутерте саяхан тус улсын хилээр хар тамхи нэвтрүүлэхийг завдсан хэнийг ч буудаж алах зөвшөөрлийг гаалийн байгууллагынхаа удирдлагуудад өгсөн байна.

Даваа гарагийн орой телевизээр дамжуулсан засгийн газрын хуралдааны үеэр Дутерте энэ  тухай мэдэгджээ.

Тэрбээр тухайн өдрийн өглөө Манила дахь ордондоо гаалийн газрын дарга, чөлөөндөө гарсан генерал Рэй Леонардо Гуэрреро болон өөр хоёр албан тушаалтныг хүлээж авч уулзахдаа ийм чиглэл өгсөн байна.

“Манай улсын хилээр хар тамхи нэвтэрсээр байна. Саяхан би та нарын галт зэвсэгтэй болох хүсэлтийг зөвшөөрсөн. Өнөөдрийг хүртэл энийгээ хэрэглэсэн үү? Хар тамхи оруулж ирэх гэсэн хүн бүхнийг буудах хэрэгтэй. Үүнийхээ төлөө та нар хариуцлага хүлээхгүйг би амлаж байна. Хар тамхи илрэх л юм бол шууд бууд” гэж гаалийн удирдлагуудад хэлснээ Дутерте ярьжээ.

Өнгөрсөн хугацаанд Дутерте улс орондоо хар тамхины эсрэг дайн өрнүүлсний үр дүнд нийтдээ 5,700 гаруй хүн цагдаа, хууль сахиулагчдын гарт алагдаад байгаа. Өрнөдийн орнууд, хүний эрхийн байгууллагууд шүүхээс гадуур хүний амь хөнөөж байгааг нь байнга шүүмжилж, зогсоохыг уриалдаг.

Харин Дутерте бүрэн эрхийнхээ үлдсэн хоёр жилийн хугацааг дуустал энэ тэмцлээ үргэлжлүүлэхээ саяхан амласан юм.

Эх сурвалж: Associated Press