Наадмын дараа ихэнх нутгаар үргэлжилсэн хүчтэй аадар борооны улмаас Гашуун сухайт авто замын 109 ,127, 138 , 162  дахь километрийн хэсгүүд үерийн усанд автаж, нүүрс тээвэрлэлт хийх боломжгүй болоод байсныг Эрдэнэс Монгол компани ажлын хэсэг гарган ажиллаж, автозамыг хэвийн үйл ажиллагаанд оруулсан.

Тэгвэл энэ сарын 27-нд үерийн улмаас дахин замын эвдрэл үүсчээ.  “Эрдэнэс Монгол”  ХХК-ийн тэргүүн дэд захирал С.Эрдэнэбулганаар ахлуулсан баг Гашуун сухайт боомтод ажиллаж, үүссэн нөхцөл байдалтай танилцан шуурхай арга хэмжээ авч, зохицуулалт хийсэн байна.  Тэрээр зам нурах аюултай нөхцөл үүссэн учир уурхайн ачилтыг түр зогсоож, автомашинуудыг түр зам дээр байрлуулжээ. Уг хэсэгт үерийн ус зайлуулах 4 хоолойг нэмэлтээр байгуулж, замын эвдрэлийг засахаар  “Уулын зам” компани ажиллаж байгаа юм байна.

Ус шалбааг их хэмжээгээр тогтсон байгаа учраас уг хэсэгт ус соруулах  2 помп,  40 м урт хоолой, 8 техник, 12 хүнтэй зам засварын бригад ажиллаж байна.  Одоогийн байдлаар түр зам дээр ачаатай 240, ачаагүй 402 машиныг байрлуулаад байгаа бөгөөд  замын хяналтыг сайжруулахад анхаарч өндөржүүлсэн хяналтын 4 хэсэг гарган ажиллуулж байгаа ажээ.  Зам засварын ажлын талаар С.Эрдэнэбулган захирлаас тодруулахад,  “Засварын ажлыг маргааш буюу 7 сарын 31-ний оройн 18.00 цагт дуусгаж, замын үйл ажиллагааг хэвийн болгоно” гэлээ.

Ажлын хэсэг  Цагаан хаданд ажиллагсдын байрны барилгын явц болон хилийн шалганы ажилтай  мөн танилцсан байна.

Боловсруулсан: С.Хүрэл