Ханхүү Харри, түүний гэргий Меган Маркл нарын Опра Уинфрид өгсөн ярилцлага Их Британийн хаант засаглалыг хямралд оруулахуйц шуугиан тариад байна. Букинхэмийн ордон одоогоор тайлбар өгөөгүй байна. “CBS” сувгаар ням гарагийн үдэш дамжуулсан ярилцлагыг 17.1 сая хүн үзжээ.

Ярилцлагын үер Сассексийн гүн, гүнгийн авхай хоёр хатан хааны гэр бүл, Британийн хаант засаглалын нэр төрд хүчтэй цохилт өгөх хэд хэдэн шуугиан тарьсан мэдэгдэл хийсэн юм.

Тухайлбал, Меган нөхрийнх нь төрлийн нэгэн эрхэм тэдний хүүхдийн арьсны өнгөний талаар сэтгэл зовниж буйгаа илэрхийлж байсан, тэрбээр амиа хорлох тухай бодож байсан, тусламж авч чаддаггүй байсан талаар ярьжээ. Тэр бүү хэл Харригийн ахын эхнэр Кейт түүнийг хэрхэн гомдоодог байсан талаар мөн өгүүлсэн байна.

Ханхүү Харри эцэг Чарлз нь түүний утсыг авдаггүй, асуудлыг нь хамт ярилцдаггүй байсан талаар дурджээ. Тэрбээр эхнэр Меганы хамт хатан хааны гэр бүлд үлдэх боломжтой бүхнийг хийсэн гэж мэдэгджээ. Түүний хэлснээр, хатан хааны гэр бүлийн гишүүний үүрэг хариуцлагаас татгалзах болсон шийдвэр гаргасны дараа эцэгтэйгээ харьцах харилцаанд хүндрэл гарчээ. Түүний эцэг Чарлз ч тэр, ах Уильямс ч тэр өөрсдийн үүргийнхээ “хавханд” орж, чөлөөлөгдөх чадваргүй болсон гэж Харри ярьжээ.

Британийн улстөрчид хатан хааны гэр бүлийн асуудалд тайлбар өгөх нь ховор ч энэ удаад зарим улстөрчид дуугүй өнгөрөөгүй байна.

“Меганы ил гаргаж, тавьсан арьс өнгө, сэтгэцийн эрүүл мэндийн асуудал маш чухал. XXI зуунд Их Британид хэтэрхий олон хүн арьс өнгөний үзэлтэй нүүр тулж буйг бидэнд сануулж байна” гэж Лейборист намын тэргүүн Кир Стармер Лондонгийн нэгэн сургуулийн хичээлийн нээлтэд оролцохдоо онцолжээ.

Их Британид хоёр сар гаруйн дараа хичээл эхэлж байгаа том үйл явдлыг Харри, Меганы нарын тарьсан шуугиан бүдгэрүүллээ гэж ажиглагчид бичиж байна.

Их Британийн Ерөнхий сайд Борис Жонсон мөн сургуулийн хичээлийн нээлтэд оролцохдоо тус улсад арьс өнгөний үзэл байх ёсгүй гэж мэдэгдээд Харри, Меган нарын ярилцлагыг үзээгүй гэжээ.

Тэрбээр хэвлэлийн бага хурлын үеэр Меган хатан хааны гэр бүлийн гишүүдийг арьс өнгөний үзэл гаргасанд буруутгасны дараа хатан хааны гэр бүлийг тойрсон шуугианд оролцохгүй гэж мэдэгджээ.

Харин британичууд Букинхэмийн ордны тайлбарыг хүлээж байна. Харри, Меган нарын хатан хааны гэр бүлд хаягласан асуудлууд маш ноцтой тул энэ удаад ордон “хэзээ ч бүү гомдол, хэзээ ч тайлбарла” гэсэн зарчмаа баримтлах боломжгүй болсон гэдэгт шинжээчид санал нэгдэж байна. Ажиглагчид Букинхэмийн ордон тайлбар хийнэ гэж харж байгаа бөгөөд үгийн сонголт ирээдүйн институцийн хувьд маш чухал байх болно гэж үзэж байна.

Хунтайж Чарлз, Диана гүнжийн бага хүү болох ханхүү Харри АНУ-ын иргэн, жүжигчин Меган Марклтай 2018 оны тавдугаар сард гэр бүл болсон билээ. Хуримын өдөр хатан хаан II Элизабет залуу хосод Сассексийн гүн, гүнгийн авхай гэсэн хэргэм олгосон юм. 2020 онд Харри эхнэрийн хамт хатан хааны гэр бүлийн гишүүдийн хэргэм зэргээс татгалзах болсон тухай зарласан билээ. Хатан хаан Харри, Меган нарт эцсийн шийдвэр гаргахад нэг жилийн хугацаа өгсөн ба өнгөрсөн хоёрдугаар сард Сассексийн гүн, гүнгийн авхай нар шийдвэрээ эргэн харан бодолгүй байгаа тухайгаа баталжээ.