“Монгол модель” агентлагийн загвар өмсөгч, “Mongolia’s next top model” нэвтрүүлгийн оролцогч Ч.Чамин-Эрдэнэ зуурдаар амь насаа алдсан харамсалтай мэдээлэл хэвлэлийн хуудаснаа гарч, түүний оролцож байсан нэвтрүүлгийн зохион байгуулагч “Боловсрол суваг” телевизээс албан ёсны мэдэгдэл гаргаж, эмгэнэл илэрхийлсэн. Энэхүү эмгэнэлийн араас цахим орчинд олон талын мэдээлэл цацагдах болсон ба хэргийн ард нэр бүхий гишүүний хүүхэд бий гэх мэдээлэл ч  тараад байгаа. Харин талийгаачийн ар гэрийнхэн “Ч.Чамин-Эрдэнэ амиа хорлох хүүхэд биш” гэж хэлж байгаа юм. Талийгаачийн ээж Г.Чимгээ “Миний охин амиа хорлох хүн огтоосоо биш. Би болон эмээ нь үүнийг сайн мэднэ. Надад хэргийн газраас авсан зургуудыг үзүүлсэн. Цогцсыг нь харуулаагүй. Зургаас харахад нүүр нь цэвэрхэн, ам нь эцсээ хүртэл том ангайсан, царай нь цонхийсон байсан. Хүн харахад их айж сандарсан гэмээр харагдаж байсан. Мөн хоёр өгзөгнийх нь арьс хуураад зулгарсан, гэрийнх нь цагаан футболкны баруун мөрөн дээр цус юм шиг толбо болсон, цамцных нь зүүн тохойн хэсэг иртэй зүйлээр зүссэн мэт урагдсан, цамцан дотуур нь өвс болсон байсан гэж би харсан. Түүнчлэн миний охины бүх биеийн яс хугарсан юм шиг байна лээ. Их л амь тэмцэж, тарчилж амиа алдсан юм шиг байна лээ. Охиныг маань чирсэн гэж бодож байна. Мөн гэрийнхээ түрхүүрийг гартаа чанга атгасан байсан. Амиа хорлох хүн гэрийн түлхүүрээ атгах уу. Өндрөөс унасан байхыг нь тус байрны цэвэрлэгч хог шүүрдэж байгаад олсон гэсэн. Тэгээд цагдаад дуудлага өгсөн юм билээ. Хүн дуудаж гаргасан эсэхийг би сайн мэдэхгүй байна. Гэхдээ би бодохдоо амиа хорлосон гээд хэргийг хаах гэж байна гэж ойлгож байна. Миний охиныг зохион байгуулалттайгаар алчихлаа. Миний охин эмээтэйгээ хамт амьдардаг байсан. Өдөр бүр утсаар яриад “Ээж ээ, охин нь заавал түрүүлнэ. Зорилгодоо заавал хүрнэ” гэдэг байсан. Охин минь гуравхан настай байхаасаа эхлээд би алдартай модель болно гэдэг байсан. Сайхан охин минь шоуныхаа шилдэг гуравт орсон байсан шүү дээ” хэмээн ярьсан байна. Мөн амиа алдахаас нь хэдхэн хоногийн өмнө Нүхтийн нэг рестранд шоунд оролцож байхад эмээ нь эргэж очжээ. Тэр үед хамт шоуд оролцож байсан нэг охины ээж талийгаачийн өмнө маанийн ерөөл тавиад байсан аж. Тэгэхээр нь эмээ нь дургүйцэж, нас бараагүй байгаа хүний өмнө яагаад маань тавиад байгаа юм бэ, ав гэхэд нь үргэлжлүүлэн тоглуулаад байсан гэнэ. Тэр хүнийг ч шалгуулна гэсэн бодол ар гэрийнхэнд нь байгаа аж.