“Оюутолгой” төслийн 66 хувийг эзэмшдэг “Turquoise Hill Resources” компанийг 100 хувь эзэмшихээр “Rio Tinto” эзэмшлийн бус хувьд ногдох хувьцааг 2.7 тэрбум ам.доллароор худалдан авах санал тавьсан юм. Тэгвэл  “Rio Tinto” компанийн гүйцэтгэх захирал Якоб Стаусхолм “Turquoise Hill Resources”-ийн хувьцааг худалдан авах явц журмын дагуу явагдана гэж мэдэгдсэн байна. “Rio Tinto” компанийн хувьцаа эзэмшигчдийн хурлаар “Turquoise Hill Resources”-ийн хувьцааг худалдан авах, Гвиней дэх төмрийн хүдрийн уурхайн талаар хэлэлцжээ.

Харин “Turquoise Hill Resources”-ийн хоёр хувьцаа эзэмшигч мөн зарим шинжээчид “Rio Tinto”-г саналын дүнгээ нэмэгдүүлэх шаардлагатай гэж үзэж байгаа аж. Якоб Стаусхолм хувьцаа эзэмшигчдийн хурлын үеэр хувьцааны үнэлгээг өсгөхөд бэлэн биш байгаагаа хэлжээ.  Дашрамд дурхад  эрчим хүчний шилжилттэй холбоотойгоор урт хугацаандаа зэсийн эрэлт болон үнэ өндөр байх төлөвтэй байна. “Goldman Sachs” зэсийн үнэ тонн 13 мянган ам.доллар хүрнэ гэж тооцоолсон аж.

Иймд томоохон уул уурхайн компаниуд зэсийн зах зээлд орон зайгаа тэлэхийг хичээж байгааг “Bloomberg Intelligence”-ийн уул уурхайн шинжээч Томас Бишевел тодотгож байна. “Rio Tinto” компанийн нийт орлогын 80-90 нь төмрийн хүдрийн зах зээлээс нь орж ирдэг. Тиймээс ирээдүйд эрчимтэй тэлэх зэсийн зах зээлд үйл ажиллагаагаа тэлэхэд “Оюутолгой” төсөл хамгийн хямд бөгөөд хялбар арга зам, боломж болж хэмээн  тэрбээр онцолсон юм.