Улс төр
Ж.Ганбаяр: Боомтын сэргэлт, шинэчлэл нь Засгийн газрын урдаа барьж буй бодлогын нэг
Эдийн засаг хөгжлийн яамны Хөгжлийн нэгдсэн бодлогын газрын дарга Ж.Ганбаяртай ярилцлаа.
-Монгол Улсын хөгжлийн дунд хугацааны бодлого болсон “Шинэ сэргэлт”-ийн бодлогын хүрээнд 14 боомтыг сонгож хөгжүүлэх тухай туссан. Гэхдээ бүтээн байгуулалтын ажил эхнээсээ иргэдийн эсэргүүцэлтэй тулж байна. Жишээ нь, Өмнөговь аймгийнхан Гашуунсухайт, Шивээхүрэн байхад гуравдагч боомт хэрэггүй гэх байдлаар замын ажлыг гацаагаад байгаа. Тэгэхээр боомт эдийн засгийн хөгжилд яагаад чухал вэ гэдэгт та эхлээд мэдээлэл өгөөч?
-Одоогоор манай улс хилийн 40 гаруй боомттой байна. Үүний 2-3 нь бүрэн ажиллаж, нийт эдийн засгаа нуруун дээрээ үүрч явна. Тодруулбал, Замын-Үүд, Алтанбулаг боомтоор импортын гол ачаа, бараагаа оруулж, Гашуунсухайт, Шивээхүрнээр уул уурхайн бүтээгдэхүүн, өмнийн говьд байгаа нүүрсээ гаргадаг. Хүчин чадлын хувьд Шивээхүрэн жилдээ 13-14 сая тонн бүтээгдэхүүн гаргах боломжтой. Ковидын өмнөх 2-3 жилд Шивээхүрэн боомтын гаргасан ачааны хэмжээ 12.6 сая тонн буюу оргил хэмжээндээ хүрсэн. Мөн Гашуунсухайт боомт суурилагдсан хүчин чадлаараа стандарт шаардлагаа хангаад явбал жилдээ 20-22 сая тонн бүтээгдэхүүн гаргах боломжтой. Бидний мэдэхээр хэдэн жилийн өмнө Шивээхүрэн боомтоос урагшаа 150 километр урт нүүрс тээврийн автомашины дараалал үүсч байсан. Энэ нь боомт хүчин чадалдаа тулчихсан учраас дараалал үүсэж, бүтээгдэхүүнээ гаргаж чадахгүй байдалд хүрсэнтэй холбоотой. Тэгэхээр дээрх хэмжээний бүтээгдэхүүн гаргаж, валют олох боломжоо алдаж байсан гэсэн үг. Юуны түрүүнд боомтын хүчин чадлыг нэмэгдүүлж, валютын орлогоо ахиулж, эдийн засгаа томруулах шаардлага бий. Тиймээс энэ хязгаарлагч хүчин зүйлийг арилгахын тулд боомтын сэргэлт, шинэчлэл нь Засгийн газрын урдаа барьж буй бодлогын нэг болж байна.
-Бодлогын хүрээнд боомтын хүчин чадлыг хэд дахин томруулна гэж төлөвлөж байна вэ?
-Тус зорилгын хүрээнд боомтуудын хүчин чадлыг гурав дахин томруулъя гэдэг зорилго тавьсан. Мэдээж экспортын орлого өссөнөөр ажлын байр бий болно, хүмүүсийн цалин орлого нэмэгдэж, өрхийн амьжиргаа дээшилнэ. Ингэснээр эдийн засгийн тогтвортой өсөлтийг урт хугацаандаа хангах суурь тавигдах юм.
Өнөөдөр Монгол Улс эдийн засгийн хүнд нөхцөлд байна. Энэ нь эдийн засгийн бүтэцтэй холбогдож тайлбарлагдахаар байгаа. Дэлхийн зах зээл дээрх түүхий эдийн үнэ ямар байгаагаас шалтгаалж эдийн засаг, иргэдийн маань орлого хэлбэлздэг. Алт зэсийн үнэ жаахан өсөх юм бол орлого нэмэгдэнэ. Хоёрдугаарт, бүх салбарын хөдөлмөрийн бүтээмж доогуур байна. Хамгийн өндөр бүтээмжтэй нь уул уурхай, санхүүгийн салбар. Үүнээс бусад нь дэлхийн улс орнуудтай харьцуулахад хангалтгүй. Жишээ нь, Монголд нэг барилгачин өдөрт 100 тоосго өрдөг бол Скандинавын орны ажилчин 1500 тоосго өрнө. Ингээд харвал тус хоёр улсын хооронд бий болгох баялаг, эдийн засагт үүсэх нэмүү өртөг зэрэгт асар том ялгаа үүснэ. Дараагийн нэг асуудал бол хууль засаглал. Монгол Улсад хуулийн хэрэгжилт хангалтгүй, шүүхийн шударга тогтолцоо бүрдээгүй байна. Жишээ нь, шүүхэд 10 сая төгрөгийн маргаан үүсгэсэн хүн түүнийгээ авах гэж бараг л тэр хэмжээний зардал, 6-7 жилийг зарцуулах нь бий. Энэ үйл явц, эдийн засаг нь бизнесийн зарчмаар явахгүй, сэргэх боломж өгөхгүй, хөрөнгө оруулалтыг нь боймилсон гэх мэт асуудал үүсгээд байгаа юм. Богино хугацаанд хамгийн түрүүнд бид юу хийж чадах вэ гэвэл уул уурхайн салбараа түшиглэж, эдийн засгаа богино хугацаанд томруулъя, дараа нь “солонгоруулъя” гэсэн чиглэл рүү явна. Ойрын 5-10 жилийн дотор уул уурхайн баялгаа гаргахын тулд боомтуудаа өргөжүүлэн, гадаад зах зээл дээрх харилцаа холбоогоо сайжруулж, үнэ цэнийг нь өсгөх шаардлагатай. Эдгээр ажлыг нэн тэргүүнд хийснээр уул уурхайгаас орж ирсэн орлогоороо бусад салбараа өргөжүүлж, хүндээ хөрөнгө оруулах, нийгмээ сайн сайхан болгох зэрэг ажил руу анхаарлаа хандуулах юм. Эдийн засгаа томруулахын тулд манайх шиг жижиг улс өөрсдөө бүхнийг бүтээх потенциал бага, хүний нөөц болоод бусад нөөцөөр хязгаарлагдмал тул гадагшаа зах зээл руу гарах нь хамгийн эхний сонголт. Бидэнд байгаа эхний ээлжийн боломж нь уул уурхай нөөц, баялаг. Түүнийг ашиглаж богино хугацаанд эдийн засгийн үр ашигтай ажиллах нь чухал болоод байна. Тиймээс л боомт чухал.
-Боомтын эдийн засгийн ач холбогдлыг зөвхөн нүүрснийх эсвэл уул уурхайд зориулсан мэтээр ойлгох тал бий. Цагаандэл уул боомтыг байнгын ажиллагаатай болгох асуудлыг хэр судалгаатай хийсэн юм бэ?
-Одоогоор яригдаж буй боомтуудыг мэдээж тухайн газар ормын уул уурхайн баялгийг экспортлох, цаад талын зах зээлтэй хялбар холбогдох боломж бүхнийг судалж гаргасан. Бидний экспортоо өсгөх эхний зорилгыг хангахад боомтуудын хүчин чадлыг нэмэгдүүлэх нэн тэргүүний зорилт. Түүний дотор хамгийн сайн стратегийн байрлалтай, дэмжиж болох цэг нь Цагаандэл Уулын боомт байна гэдэг агуулгаар нь манай талаас дэмжээд хоёр улсын хооронд тус боомтыг хөгжүүлье гэдэг бодлого гарсан юм.
Боомт өөрөө цогцоороо хөгжөөд явах ёстой. Зөвхөн боомтын байгууламжийг бариад түүгээр бүтээгдэхүүн гаргаж чадахгүй. Тэнд ажиллаж, амьдарч байгаа хүмүүсийн амьдрах орчин тав тухыг хангасан дэд бүтцийг бий болгох хэрэгтэй. Хоёрдугаарт, уул уурхайн баялгаа боомт руугаа зөөдөг дэд бүтцийг байгуулах ёстой. Гуравдугаарт, зөөлөн дэд бүтцүүд буюу боомтын үйл ажиллагааг хялбар явуулдаг зохион байгуулалтын ажлууд давхар хийгдэх юм. Энэ бүх ажил цогцоороо явах ёстой. Бид цар тахлаас өмнө боомтын асуудлыг төдийлөн анхаардаггүй байж. Харин ковидын улмаас хүн болгон амьдрал дээр, арьсан дээрээ мэдэрлээ шүү дээ. Хил хаагдсанаас болоод будаа, сахар нь тасраад ирэхээр боомт ямар чухал вэ гэдэг талаар мэддэг болох шиг байна. Боомтыг хөгжүүлэх нь том агуулгаараа хийгдэх ёстой. Тиймээс Засгийн газрын боловсруулсан бодлого төлөвлөлт боомтын иж бүрэн бүтээн байгуулалтын хөгжүүлэлт, боомт хүртэлх автозам, төмөр зам дэд бүтэц, зохион байгуулалтын ажлыг цогцоор нь хийе гэдэг байдлаар ажиллаж яваа.
-Гэвч Цагаандэл уул боомт ашиглалтад орвол түүнийг дагаад хайгуулын тусгай зөвшөөрөл, ашиглалтын лиценз амилж, малчдын амьдралд төдийгүй байгаль экологид сөргөөр нөлөөлнө гэж буй. Үүнээс болж одоо хүртэл тус боомтын замын ажил гацлаа. Боомтыг авто замаар холбож, бүс нутгийн эдийн засгийн өрсөлдөх чадварыг үе шаттайгаар сайжруулах зорилтууд дотор үнэхээр уул уурхайн лиценз олгох, ашиглах талаар туссан уу?
-Нэгдүгээрт, боомт нээх асуудал нь хоёр улсаас хамаарна. Зөвхөн манай тал юм уу би хүсээд болох асуудал биш. Хоёрдугаарт, Цагаандэл Уулын боомт тухайн нутгийн иргэдийн амьдрал амьжиргаатай шууд холбогдох учраас энэ талыг нь харгалзаж үзэх ёстой. Боомтыг байгуулснаар байгаль орчиндоо үзүүлэх нөлөө нь хэр вэ, иргэдийнхээ амьдралд тустай юу гээд хамгийн гол нь улс орны стратегийн зорилт, эдийн засагт экспорт, импортоо нэмэгдүүлэх зорилготой маань яаж уялдав, энэ хоорондох тэнцвэр нь хэрхэн хангагдаж байна гэдгээс л шийдлүүд гарна. Эдгээр судалгаа эхний түвшинд сайн хийгдсэний үндсэн дээр хоёр улс энэ цэг дээрх байгаль орчны тогтоцыг харгалзан үзэж, дүгнэлтээ гаргаад яриа хэлэлцээрээ хийх дараалалтай юм. Гацаж байгаа ил шалтгаан нь тухайн орчмын иргэдийн эсэргүүцэл, өөр бусад цаагуураа ямар шалтгаан байгааг мэдэхгүй байна.
-Уул уурхайн лицензийн талаар?
-Зам дагасан асуудлын тухайд хайгуулын орд нь тогтоогдож, нөөцийг нь ашиглах боломжтой гээд лиценз нь гараад ирэх юм бол тухайн үед судалгаанууд нь хийгдэнэ. Үнэхээр зөв тогтоож чадвал ашиглах шийдвэр нь гарах байх. Гэхдээ ашиглалтын лиценз олгоно гэсэн юм зорилт дотор байхгүй, одоогоор хэлэхэд эрт байна. Ер нь эдийн засгийн үр ашгаа бодвол нэг дэд бүтэц тавиад түүнийгээ ашиглаад, боломжтой нөөц баялгаа борлуулбал нэгжийн зардал нь бага. Үүний хүрээнд одоо тавьж буй төмөр зам, автозамын төслүүдийг аль болохоор олон жил ашиглах нь тодорхой болсон ордуудыг дамнуулж, тэр бүтээгдэхүүнийг зах зээлд богино хугацаанд хүргэх байдлаар хийж байгаа юм. Харин орд болгоноос зам татах юм бол төсөл үр ашиггүй байдалд хүргэнэ.
Улс төр
Монгол Улсын Их Хурлын дарга Г.Занданшатар, Бүгд Найрамдах Киргиз Улсын Жогорку Кенешийн дарга Н.Шакиев нар албан ёсны хэлэлцээ хийлээ
Монгол Улсын Их Хурлын дарга Гомбожавын Занданшатарын урилгаар Бүгд Найрамдах Киргиз Улсын Жогорку Кенеш буюу Парламентын дарга Нурланбек Шакиев Монгол Улсад албан ёсны айлчлал хийж байна.
Айлчлалын хүрээнд Монгол Улсын Их Хурлын дарга Г.Занданшатар, Бүгд Найрамдах Киргиз Улсын Жогорку Кенеш буюу Парламентын дарга Н.Шакиев нар 2024.04.23) Төрийн ордонд албан ёсны хэлэлцээ хийлээ.
Хэлэлцээний эхэнд Улсын Их Хурлын дарга Г.Занданшатар Эрхэмсэг ноён Нурланбек Шакиев тэргүүтэй төлөөлөгчдийг Монгол Улсад тавтай зочлохыг уриад Жогорку Кенеш-ийн даргын түвшинд анх удаагаа Монгол Улсад хийж буй энэхүү айлчлалд парламентын зүгээс өндөр ач холбогдол өгч байгаагаа илэрхийлэв. Монгол, Киргиз улс хооронд ээлж дараалан төрийн дээд, өндөр хэмжээний айлчлалуудыг давтамж нэмэгдсэний үр дүнд нь хоёр улсын худалдааны эргэлт даруй 5 дахин нэмэгдээд байна. Үүнээс гадна Монголын хувийн хэвшлийн компаниуд тус улсын зах зээлд үйл ажиллагаагаа эрчимтэй тэлж байгааг УИХ-ын дарга тодотголоо.
Тэрбээр, Бүгд Найрамдах Киргиз Улсын Жогорку Кенеш буюу Парламентын дарга Н.Шакиевын айлчлал нь хоёр орны парламент хоорондын хамтын ажиллагааг бэхжүүлэхийн зэрэгцээ Монгол, Киргизийн харилцаа, хамтын ажиллагааг гүнзгийрүүлэн хөгжүүлэхэд чухал түлхэц үзүүлнэ гэдэгт итгэлтэй байна. Монгол Улс нь Төв Ази дахь чухал түнш Бүгд Найрамдах Киргиз Улстай хөгжүүлж буй харилцаагаа бэхжүүлж, харилцан ашигтай худалдаа, эдийн засгийн хамтын ажиллагааг өргөжүүлэн гүнзгийрүүлэхэд өндөр ач холбогдол өгдөг. Бид Төв Азийн бүс нутагт зэрэгцэн оршдог, далайд гарцгүй, хөгжиж буй орнуудын хувьд хөгжлийн туршлагаасаа харилцан хуваалцаж, цаашид олон талт хамтын ажиллагааг хөгжүүлэх боломж байгааг онцлов.
Талууд өнгөрөгч 02 дугаар сард Улсын Их Хурлын дарга Г.Занданшатарын БНКирУ-д хийсэн албан ёсны айлчлалын үеэр хоёр улсын Парламент хоорондын байнгын зөвлөгөөний механизм байгуулах тохиролцоонд хүрч, хамтын ажиллагааны санамж бичгийг үзэглэсэн нь хоёр улсын уламжлалт найрсаг харилцааг өргөжүүлэн хөгжүүлэхэд чухал алхам болсонд санал нэгдэв. Тухайлбал, уг айлчлал нь Монгол, Киргизийн харилцаа, хамтын ажиллагааг банк санхүү, даатгал, алт цэвэршүүлэх зэрэг салбарын хамтын ажиллагаагаар баяжуулах үндэс суурийг тавьснаараа онцлог болсныг тэмдэглэлээ.
Парламентын тэргүүн нар сүүлийн жилүүдэд хоёр улсын харилцаа, хамтын ажиллагаа эрчимжиж, улс төрийн яриа хэлэлцээний давтамж нэмэгдэж, харилцан айлчлал идэвхжиж, хууль тогтоох байгууллага хоорондын ойр дотно харилцаа бэхжиж байгааг онцлов. Дээд, өндөр түвшний айлчлалын үеэр яригдсан санал санаачилгуудыг ажил хэрэг болгохын төлөө хүчин чармайлт гарган нягт хамтран ажиллахаа харилцан нотоллоо.
Бүгд Найрамдах Киргиз Улсын Жогорку Кенеш буюу Парламентын дарга Н.Шакиев Монгол Улсын Их Хурлын дарга Г.Занданшатартай дахин уулзсандаа баяртай байна гээд бүс нутаг хооронд хамтын ажиллагааг өргөжүүлэн хөгжүүлэхэд бүх талаар дэмжин ажиллахаа мэдэгдэв. Түүнчлэн улс төр, эдийн засаг соёл, хүмүүнлэг болоод иргэд хоорондын харилцаа сүүлийн жилүүдэд тасралтгүй өргөжиж байгаа энэ цаг үед парламент хоорондын хамтын ажиллагаа өргөжин тэлнэ гэдэгт итгэлтэй байна хэмээлээ.
Энэхүү айлчлалын хүрээнд хоёр улсын парламент хоорондын байнгын механизмыг хөгжүүлэхэд чухал түлхэц болох “Монгол Улсын Их Хурал, Киргиз Улсын Жогорку Кенешийн хамтын ажиллагааны комиссын үйл ажиллагааны зохицуулалт” баримт бичгийг Таны айлчлалын үеэр байгуулж байгаадаа сэтгэл хангалуун байгаагаа Эрхэмсэг ноён Н.Шакиев цохон тэмдэглэв.
Тэрбээр, цаашид хоёр орны парламент болон парламентын найрамдлын бүлэг, Тамгын газар хоорондын хамтын ажиллагааг идэвхжүүлэх, худалдааны эргэлтийг нэмэгдүүлэх, Монгол Улсаас мах, махан бүтээгдэхүүн, арьс шир, ноос, ноолуур, Киргиз Улсаас жимс жимсгэнэ, нарийн ногооны нийлүүлэлтэд шаардлагатай бүхий л арга хэмжээг авч хэрэгжүүлэхэд манлайлан ажиллахаа нотолсон юм.
Мөн төрийн дээд, өндөр хэмжээний харилцан айлчлалууд нь хоёр улсын харилцааг улам гүнзгийрүүлж, ард түмний нөхөрлөлийг бэхжүүлэхэд чухал ач холбогдолтой болсон. Бүгд Найрамдах Киргиз Улсаас Элчин сайдын яамыг 2023 онд Монгол Улсад нээсэн нь хоёр улсын харилцааг гүнзгийрүүлэхэд чухал нөлөө үзүүлж байна гэлээ. Цаашид аялал жуулчлал тэр дундаа агаарын тээврийн салбарын харилцаа, хамтын ажиллагааг эрчимжүүлж, Улаанбаатар-Бишкек чиглэлийн иргэний агаарын тээврийн шууд нислэгийг сэргээх, иргэдийн саадгүй зорчих урсгалыг нэмэгдүүлэх нь хоёр улсын хамтын ажиллагаанд чухал хэмээн онцоллоо.
Улсын Их Хурлын дарга Г.Занданшатар хэлсэн үгэндээ, “Энэ удаагийн албан ёсны айлчлалын хүрээнд хөдөлмөр, нийгмийн хамгааллын асуудал эрхэлсэн яамд, төрийн албаны асуудал эрхэлсэн байгууллага хоорондын хамтын ажиллагааны эхлэл болох баримт бичгүүдийг байгуулахаар болсонд баяртай байна. Киргиз Улсад хийсэн миний албан ёсны айлчлалын үеэр Монгол, Киргизийн харилцааны бэлгэ тэмдэг, нэрийн хуудас болох хөдөө аж ахуй, хөнгөн үйлдвэрийн салбарын хамтарсан үйлдвэр байгуулахаар тохиролцсон. Энэ ажлын хүрээнд мах болон сүүний үйлдвэрлэлийн үхэр, сарлагийн чиглэлийн хамтарсан аж ахуй байгуулах чиглэлд хамтран ажиллана. Мөн мах, махан бүтээгдэхүүний олон улсын гэрчилгээний загварыг харилцан тохиролцсон нь мах, махан бүтээгдэхүүний экспорт, импортыг нэмэгдүүлэхэд чухал ач холбогдолтой болсныг тэмдэглэхэд таатай байна” гэв.
Мөн “Азийн авто замын сүлжээгээр олон улсын авто тээвэрлэлт гүйцэтгэх тухай Монгол, Орос, Хятад гурван улсын Засгийн газар хоорондын хэлэлцээр”-ийн хавсралтаар баталсан Азийн авто замын сүлжээний АН-4 чиглэлийн тээврийн маршруттай холбогдох Киргизийн авто замын талаарх саналаа ойрын хугацаанд ирүүлнэ гэж найдаж байгаагаа илэрхийлэв.
Хэлэлцээний үеэр талууд Монгол, Киргизийн уламжлалт найрсаг харилцааг бэхжүүлэхэд чиглэсэн хоёр орны худалдаа, эдийн засаг, хөрөнгө оруулалт, эрчим хүч, зам тээвэр, байгаль орчин, аялал жуулчлалын салбарын хамтын ажиллагааг өргөжүүлэх асуудлаар дэлгэрэнгүй санал солилцсон юм.
Хэлэлцээний төгсгөлд Улсын Их Хурлын дарга Г.Занданшатар Эрхэмсэг ноён Н.Шакиев болон киргизийн анд, нөхдөдөө эрүүл энх, ажлын өндөр амжилтыг хүсээд “Алтай дамнасан тогтвортой байдлын яриа хэлэлцээ” чуулга уулзалтад оролцож, илтгэл тавихаар болсонд талархал дэвшүүллээ хэмээн Улсын Их Хурлын Хэвлэл мэдээлэл, олон нийттэй харилцах газраас мэдээлэв.
Улс төр
Хамтын ажиллагааны комиссын дүрэмд гарын үсэг зурлаа
Монгол Улсын Их Хурлын дарга Гомбожавын Занданшатарын урилгаар Бүгд Найрамдах Киргиз Улсын Жогорку Кенеш буюу Парламентын дарга Нурланбек Шакиев манай улсад албан ёсны айлчлал хийж байна. Хоёр орны парламентын тэргүүн нар албан ёсны хэлэлцээ хийсний дараа хамтын ажиллагааны комиссын дүрэмд гарын үсэг зурах ёслолд оролцлоо.
Улсын Их Хурлын дарга Г.Занданшатар, Бүгд Найрамдах Киргиз Улсын Жогорку Кенеш (парламент)-ийн дарга Нурланбек Шакиев нар “Монгол Улсын Их Хурал, Бүгд Найрамдах Киргиз Улсын Жогорку Кенешийн хамтын ажиллагааны комиссын дүрэм”-д гарын үсэг зурцгаасан юм. Уг комиссын дүрмийг үзэглэснээр талууд цаашид олон талт харилцаа, хамтын ажиллагаагаа өргөжүүлэн, хөгжүүлэхээ харилцан нотоллоо.
Мөн ёслолын ажиллагааны үеэр Монгол Улсын Засгийн газрын хэрэгжүүлэгч агентлаг Мал эмнэлгийн газрын дарга А.Нарантуяа, Бүгд Найрамдах Киргиз Улсаас Монгол Улсад суугаа Онц бөгөөд бүрэн эрхт элчин сайд Айбек Артыкбаев нар ноос импортлох нөхцөл харилцан зөвшөөрөх тухай мал эмнэлгийн олон улсын гэрчилгээг солилцов.
Энэхүү арга хэмжээнд Улсын Их Хурлын гишүүн, Улсын Их Хурал дахь Монгол-Киргизийн бүлгийн дарга Б.Бейсен, Улсын Их Хурлын гишүүн Ц.Анандбазар, Т.Аубакир, Монгол Улсаас Бүгд Найрамдах Киргиз Улсад суугаа Онц бөгөөд бүрэн эрхт элчин сайд С.Ганхуяг, Бүгд Найрамдах Киргиз Улсаас Монгол Улсад суугаа Онц бөгөөд бүрэн эрхт элчин сайд Айбек Артыкбаев нар болон албаны бусад хүмүүс байлцлаа хэмээн Улсын Их Хурлын Хэвлэл мэдээлэл, олон нийттэй харилцах газраас мэдээлэв.
Улс төр
Бүгд Найрамдах Киргиз Улсын парламентын дарга Н.Шакиев Монгол Улсад хүрэлцэн ирлээ
Монгол Улсын Их Хурлын дарга Г.Занданшатарын урилгаар Бүгд Найрамдах Киргиз Улсын Жогорку Кенеш (парламент)-ийн дарга Нурланбек Шакиев тэргүүтэй төлөөлөгчид Монгол Улсад албан ёсны айлчлал хийхээр өнөөдөр (2024.04.23) Улаанбаатар хотноо хүрэлцэн ирлээ. Хүндэт зочдыг Улсын Их Хурлын дэд дарга Л.Мөнхбаатар, Улсын Их Хурлын гишүүн, Улсын Их Хурал дахь Монгол-Киргизийн парламентын бүлгийн дарга Б.Бейсен нар албаны бусад хүмүүсийн хамт угтан авлаа.
Айлчлалын хүрээнд Улсын Их Хурлын дарга Г.Занданшатар, Бүгд Найрамдах Киргиз Улсын Жогорку Кенеш (парламент)-ийн дарга Нурланбек Шакиев нар албан ёсны хэлэлцээ хийж, хоёр талын харилцаа, парламент хоорондын олон талт хамтын ажиллагаа болон бусад асуудлаар санал солилцоно.
Энэхүү албан ёсны айлчлал нь Киргиз Улсын парламентын даргын түвшний анхны айлчлал гэдгээрээ онцлог төдийгүй хоёр улсын хууль тогтоох дээд байгууллага хоорондын хамтын ажиллагааг бэхжүүлэх, эдийн засаг, худалдаа, хөрөнгө оруулалтын харилцааг шинэ агуулгаар баяжуулж, холбогдох эрх зүйн үндсийг бататгах ач холбогдолтой юм хэмээн Улсын Их Хурлын Хэвлэл мэдээлэл, олон нийттэй харилцах газраас мэдээлэв.
-
Нийгэм17 цаг өмнө
Улаанбаатараас БНХАУ-ын Хунань мужийн Чангша хот руу шууд нислэг үйлддэг боллоо
-
Нийгэм20 цаг өмнө
Ж.Соронзонгийн хэргийг давж заалдах шатны шүүхээр дахин хэлэлцүүлэхээр буцааж, шийдвэрлэв
-
Нийгэм17 цаг өмнө
Монгол, ОХУ-ын хилийн таван боомт энэ сарын 28-30-ны өдөр түр хаагдана
-
Нийгэм19 цаг өмнө
Ой, хээрийн 44 удаагийн түймэр гарч, 435.658 га талбай түймэрт өртсөн байна
-
Нийгэм19 цаг өмнө
Элсэлтийн шалгалтын бүртгэл дөрөвдүгээр сарын 26-ны 18:00 цагт хаагдана
-
Нийгэм17 цаг өмнө
Ерөнхий боловсролын 12 дугаар сургуулийн шинэ барилга ашиглалтад орлоо
-
Нийгэм17 цаг өмнө
Зарим гудамж, замын хөдөлгөөнд түр хугацаанд хязгаарлалт хийнэ
-
Нийгэм21 цаг өмнө
Монгол Улсын Их Хурлын сонгуульд нэр дэвшигчийн лавлагааг олгож эхэллээ