Нийгэм
АТГ: Дорнод аймагт нэр бүхий албан тушаалтанд холбогдох хээл хахуулийн 11 үйлдэлтэй хэрэг илрүүлэв
Авлигатай тэмцэх газрын Хяналт шалгалт, дүн шинжилгээний хэлтсийн дарга, эрхэлсэн комиссар Х.Хашбаатараар ахлуулсан ажлын хэсэг Дорнод аймагт ажиллалаа.
Дорнод аймгийн хувьд албан тушаалтнууд өөртөө болон өөрийн хамаарал бүхий этгээдтэй холбоотой шийдвэр гаргах, төсвийн хөрөнгийг хууль бусаар үр ашиггүй зарцуулах, худалдан авах ажиллагааны тухай хууль тогтоомжийн хэрэгжилт хангалтгүй, хөрөнгө орлогын мэдүүлгийг хугацаа хоцроох, хувийн ашиг сонирхлын урьдчилсан мэдүүлгийг томилсны дараа хянуулах, иргэд, аж ахуйн нэгжээс гаргасан өргөдөл, гомдлыг хангалтгүй хэмжээнд шийдвэрлэх, төрийн үйлчилгээний албан хаагчид иргэдээс хууль бус төлбөр хураамж авах зэрэг нийтлэг зөрчил, дутагдал илэрч байна.
Аймаг, сумын ИТХ болон Тэргүүлэгчид нь хуулиар олгогдоогүй эрх эдэлж, орон нутгийн татвар, төлбөр хураамжийн хэмжээг тогтоосон байна. Тухайлбал, Баян-Уул суманд 5, Цагаан-Овоо суманд 4, аймгийн ИТХ-аас 3, ИТХ-ын Тэргүүлэгчид 1 шийдвэрийг эрх хэмжээ хэтрүүлэн гаргажээ.
АТГ-ын ажлын хэсэг Дорнод аймагт албан томилолтоор ажиллах хугацаандаа нэр бүхий албан тушаалтанд холбогдох хээл хахуулийн 11 үйлдэлтэй хэрэг илрүүлж, мөрдөн шалгах ажиллагааг явуулж байна.
Аймгаас сумдад ажилласан хяналт шалгалтын болон бусад байгууллагын ажлын хэсгийн гишүүдийн хоол, зочид буудал болон бусад зардлыг сумын Засаг даргын нөөц хөрөнгөөс зарцуулах нь түгээмэл байна. Зарим сумын Засаг дарга, бусад албан хаагчид зардал төлбөрийг хувиасаа гаргадаг аж. Хяналт шалгалтын ажлын хэсгүүд нь чиг үүргийн хувьд давхцсан байдлаар шалгах, ойр ойрхон тасралтгүй ирдэг байдал нь суманд хүндрэл учруулдаг гэв.
Жилд дунджаар суманд 13-16 ажлын хэсгийн 90 гаруй хүн ирж очдог байна. Гаднаас ирсэн зочид төлөөлөгчдийн зардлыг төлж дийлэхгүйгээс өр, төлбөрт орсон сум ч байна. Энэ төрлийн зөрчил гарах болсон шалтгаан хяналт шалгалтын ажлын хэсгийн гишүүдэд албан томилолтын зардал өгдөггүй, хяналт шалгалтын нэгдсэн төлөвлөгөөгүй, ажлын уялдаа холбоогүй байдагтай холбоотой.
Уг асуудлыг газар дээр нь шийдвэрлүүлэхээр АТГ-ын ажлын хэсэг аймгийн удирдлагад танилцуулсны үндсэн дээр Дорнод аймгийн Засаг даргын 2018 оны 10 дугаар сарын 23-ны өдрийн А/470 дугаартай “Төсвийн сахилга бат, хариуцлага, дэг журмыг чангатгах тухай” захирамж гарсан бөгөөд харьяа байгууллагын удирдлагуудад захирамжийг танилцуулж мөрдөн ажиллах талаар үүрэгжүүлсэн байна.
Уг захирамжаар “төрийн байгууллагын хяналт шалгалтын чиг үүргийн давхардлыг арилгаж, ажлын бүтээмж, үйл ажиллагааны уялдаа холбоог сайжруулах, ажлын цаг ашиглалт, ажлын бүтээмжийг дээшлүүлэх зорилгоор нийт төрийн байгууллага, төрийн болон орон нутгийн өмчит аж ахуй нэгж, байгууллагуудын сумдад ажиллах ажлын нэгдсэн төлөвлөгөөг жил бүрийн 2 дугаар сарын 10-ны өдрийн дотор багтаан саналаа хүргүүлж батлуулах, хяналт шалгалтыг нэгтгэн явуулах, төрийн албан хаагчийг дээд шатны удирдах байгууллага, эрх бүхий албан тушаалтнаас баталсан удирдамж, төлөвлөгөөний дагуу албан томилолтоор ажиллуулах тохиолдолд холбогдох шийдвэр, баримт бичгийг үндэслэн томилолтын зардлын 80-аас доошгүй хувиар урьдчилан олгох”-ыг шийдвэрлэсэн байна.
Эх сурвалж: АТГ
Нийгэм
Нийслэлийн 5 эрүүл мэндийн байгууллагад яаралтай тусламжийн машин хүлээлгэн өглөө
Нийслэлийн хэмжээнд түргэн тусламжийн машины парк шинэчлэлийг энэ онд хийж байна.
Энэ хүрээнд өнөөдөр нийслэлийн Эрүүл мэндийн газрын харьяа таван эрүүл мэндийн байгууллагад яаралтай тусламжийн зургаан машиныг хүлээлгэн өглөө.
Тодруулбал, яаралтай үед түргэн тусламж үзүүлэхэд шаардлагатай тоног төхөөрөмжөөр иж бүрэн тоноглогдсон БНХАУ-д үйлдвэрлэсэн “FOTON G7 Ambulance” загварын автомашиныг нийслэлийн Түргэн тусламжийн төвд хоёр, “Амгалан”, “Өргөө”, “Хүрээ” амаржих газрууд болон Шүд, эрүү, нүүрний төвд тус бүр нэгийг хүлээлгэн өгсөн юм.
Нийслэлийн Засаг даргын Эдийн засаг, дэд бүтцийн асуудал хариуцсан нэгдүгээр орлогч П.Сайнзориг “Сүүлийн жилүүдэд төрөлт нэмэгдэн, улсын хэмжээнд төрж байгаа эхчүүдийн 50 гаруй хувь нь нийслэлд төрж, эмнэлгийн тусламж, үйлчилгээ авч байгаа гэсэн тооцоолол гарсан. Иймд иргэдэд үзүүлэх эмнэлгийн тусламж үйлчилгээний хүртээмж, чанарыг сайжруулах, эх, хүүхдийн өвчлөл, эндэгдлийг тууштай бууруулах үүднээс нийслэлийн харьяа эрүүл мэндийн байгууллагуудад яаралтай тусламжийн зургаан машиныг хүлээлгэн өглөө” хэмээн эрүүл мэндийн салбарын хамт олонд талархал илэрхийлэн, амжилт хүслээ.
Нийслэлийн Шүд, эрүү, нүүрний төвийн дарга Д.Долгормаа “Манай эмнэлэг 1986 онд байгуулагдсан цагаасаа хойш анх удаа автомашинтай болж байна. “Эрүүл шүд” үндэсний хөтөлбөрийн хүрээнд сургууль, цэцэрлэгийн хүүхдүүдэд явуулын үзлэг хийх, урьдчилан сэргийлэх арга хэмжээг зохион байгуулахад автомашины хэрэгцээ нэн чухал байсан. Ийнхүү бидний хүсэлтийг хүлээн авч, шийдвэрлэж өгсөнд талархаж байна” хэмээв.
Нийгэм
Гал түймэр унтраах, аврах шинэ ангийн барилгын шавьг тавилаа
Нийслэлийн Чингэлтэй дүүргийн 21 дүгээр хороонд байрлах Гал түймэр унтраах, аврах шинэ ангийн барилгын шав тавих ёслол өнөөдөр боллоо.
Арга хэмжээнд ОБЕГ-ын дарга, хошууч генерал Г.Ариунбуян,Чингэлтэй дүүргийн ИТХ-ын дарга Б.Мөнхбат, Засаг дарга Н.Батсүмбэрэл, НОБГ-ын дарга, хурандаа А.Дашням нар оролцсон юм.
Шинээр баригдаж байгаа Гал түймэр унтраах, аврах анги нь нийслэлийн хойд чиглэлийн 80 гаруй мянган иргэнд гамшгаас хамгаалах төрийн үйлчилгээг шуурхай, богино хугацаанд хүргэх боломж бүрдэх юм.
Дүүргийн хөрөнгө оруулалтаар барьж байгаа тус ангийн барилгын гүйцэтгэгчээр “Дуутын нуруу” ХХК ажиллах бөгөөд энэ оны аравнэгдүгээр сард ашиглалтад оруулахаар төлөвлөж байна гэж ОБЕГ-аас мэдээллээ.
Нийгэм
Маргааш Сүхбаатарын талбай орчмын замыг хаана
Нийслэлийн Засаг даргын 2024 оны тавдугаар сарын 30-ны өдрийн А/613 дугаар захирамжийн дагуу Жанжин Д.Сүхбаатарын талбай орчмын замын хөдөлгөөнийг 2024 оны зургаадугаар сарын 1-ний өдрийн 08:00 цагаас 20:00 цагийн хооронд түр хязгаарлана.
Олон улсын хүүхдийн эрхийг хамгаалах өдөр хаагдах авто замуудыг Тээврийн цагдаагийн албанаас танилцуулж байна.