Мексикийн Эль Чапо хочит Хоакин Гусманыг орчин цагийн гэмт IWI хэргийн ертөнцийн хамгийн нэр цуутай, дуулиантай гэмт хэрэгтэн гэж тооцдог юм. Нью-Йорк хотын Бруклины холбооны шүүх дөрвөн сарын туршид Гусманд холбогдох хэргийг шалгаад түүнд хар тамхины хэрэгтэй холбоотой 10 зүйл анги хэрэг тулгасны дотор мөрдөн шалгах үйл явцын дүнд Америкт сүүлийн 25 жилийн хугацаанд нийтдээ 155 тонн хар тамхи, тэр дундаа метамфетамин, марихуан зэргийг хууль бусаар нийлүүлсэнд буруутай гэж үзсэн байна. 61 настай Гусман саяхныг хүртэл АНУ-д хамгийн ихээр эрэн сурвалжлагдаж байсан гэмт хэрэгтний жагсаалтыг тэргүүлж байсан. Өнгөрсөн 2015 онд Гусман эхнэр болон хамтрагчдынхаа оролцоотойгоор Мексикийн чанга дэглэмтэй Альти-плано шоронгоос оргосон. Улмаар түүнийг 2016 оны нэгдүгээр сард Гусманы төрөлх нутаг болох Мексикийн Синалоа мужийн Пос Мочис хотоос баривчилж, чанга дэглэмтэй шоронд буцаан хорьсон байна. Тэрбээр оргоод байх үедээ Холливудын жүжигчин Шон Пөннд ярилцлага өгч, ярилцлага нь “Rolling Stone” сэтгүүл болон “rolling-stone.com” сайтад нийтлэгдсэн юм. Хууль сахиулагчдаас хагас жил хэртэй нуугдаж байсан Гусманыг ярилцлага өгснийх нь орой нуугдаж байсан газраас нь баривчилсан. Эль Чапогийн 2016 онд өгсөн ярилцлагыг хөрвүүлэн хүргэж байна.

-Их нууцлаг бөгөөд сонирхолтой ярилцлага болох байх. Тантай уулзахыг эртнээс хүсэж явлаа?

-Би өөрийнхөө амь насыг эрсдэлд оруулж ярилцлага өгөхийг зөвшөөрсөн. Яагаад ярилцлага өгөхийг зөвшөөрснөө мэдэхгүй байгаа ч өөрийгөө нууцлахыг хүссэнгүй. Магадгүй цаашид нуугдахыг хүсээгүй учир та нарын саналыг зөвшөөрсөн байх.

-Та өнгөрсөн 2015 оны долоодугаар сард Мексикийн чанга дэглэмтэй Альтип-лано хорих ангиас хонгилын тусламжтай амжилттай оргосон. Аз туршсан зүйл хийхдээ айгаагүй юу?

–Аймхай хүн амжилтад хүрдэггүй юм. Шоронгоос амжилттай оргоход Германд инженерийн чиглэлээр суралцаж байсан минь тус болсон. Би оргохоосоо гурван сарын өмнөөс хонгил ухсан. /Тэрбээр шоронгийн доогуур 1.5 км-ын хонгил ухаж, оргосон юм/

-Таны хүүхэд нас яаж өнгөрсөн бэ?

-Би зургаан наснаасаа хойшхыг л санадаг. Манай гэр бүл маш ядуу байсан. Ээж минь талх барьж би түүнийг зардаг байлаа. Ээж маш завгүй ажилладаг байсан.

-Яаж яваад хар тамхины бизнест оролцох болов?

-Би 15 настайгаасаа хар тамхины хэрэгт холбогдох болсон. Тухайн үед марихуан зарах нь амьд үлдэх, хоолоо олж идэх ганц арга зам шиг санагдсан.

-Хар тамхины бизнесээ хэрхэн өргөжүүлсэн бэ?

-18 настайдаа гэрээ орхин Калиакан хотыг зорьсон. Тэндээсээ Гуадалхара, Ла Туна гэх зэргээр хаана л худалдаалах боломж байна тэнд хар тамхиа зарж, холбоо сүлбээ тогтоодог байв.

-Өнгөрсөн үетэй харьцуулахад одоо таны хамаатан садан болон гэр бүлийн амьдрал хэрхэн өөрчлөгдсөн бэ?

-Миний хамаатан садан, үр хүүхдүүд хангалттай сайхан амьдарч байгаа.

-Хар тамхи хүн төрөлхтөнд хамгийн их хор нөлөө учруулж буй хорт зүйлийн нэг гэдэгтэй та санал нийлэх үү?

-Тийм ээ, үнэн. Гэхдээ дээр би хэлсэн дээ. Тухайн үед энэ замыг сонгохоос өөр амьд үлдэх, амь зогоох боломж надад байгаагүй юм. Манай улс эдийн засгийн хямралтай, ажлын байр байхгүй, хүнд цаг үе байсан.

-Та хоригдож байх үедээ бизнесээ хэрхэн явуулдаг байв. Ашиг орлого нь буурсан уу?

-Буурдаг ч үгүй, өсдөг ч үгүй, бүх зүйл үргэлжилдгээрээ л үргэлжилдэг.

-Таныг хүчирхэг хүн гэж хэлж болох уу?

-Үгүй дээ.

-Та ямар нэгэн зүйлийг хүчээр өөрийн болгохыг илүүд үздэг үү, эсвэл наймаалцах зарчмыг илүү гэж боддог уу?

-Тухайн үеийн нөхцөл байдлаасаа л шалтгаална.

-Мансууруулах бодис хэрэглэгчдийн тоо өсөхөд өөрийгөө нөлөөлсөн гэж бодож байна уу?

-Үгүй ээ, тийм биш. Би нэг өдөр байхгүй болно. Намайг байсан байгаагүй хар тамхичид байсаар л байх болно. Тэд цөөрөхгүй.

-Мексик Улсын өнөөгийн нөхцөл байдлын талаарх таны бодол?

-Хар тамхины наймаа зөвхөн Мексикт байгаа юм биш. Дэлхийн өнцөг булан бүрд энэ наймаа явж л байдаг. Би хувьдаа хар тамхины наймаа бол өвөг дээдсээс гаралтай соёлын нэг хэсэг гэж боддог.

-Бизнесээ анх эхлүүлж байсан үеэ одоогийнхтой харьцуулбал?

-Асар том ялгаа бий. Анх эхэлж байх зөвхөн марихуан л худалддаг байсан бол одоо бүх төрлийн мансууруулах бодисыг маш их хэмжээтэйгээр наймаалах болсон.

-Ирээдүйд таны энэ бизнес хэрхэх талаар та юу гэж бодож байна вэ?

-Хар тамхины наймаа бол хамгийн эрсдэлгүй мөнхөд үргэлжлэх “бизнес”. Цаг хугацаа өнгөрөх тусам худалдан авагчийн тоо нэмэгддэг.

-Ойрх Дорнодод өрнөж буй мөргөлдөөн хар тамхины наймаанд нөлөөлөх үү?

-Огтхон ч нөлөөлөхгүй.

-АНУ-ын Засгийн газар, Мексикийн Засгийн газартай хамтран таныг барьж хорих бус цаазлахыг илүүд үзэж байна хэмээн зарим хэвлэл мэдээллийн хэрэгслүүдээр ярьж байна. Харин та энэ тухай юу гэж бодож байна вэ?

-Хэрвээ тэд намайг олбол зүгээр л хорино гэж бодож байна.

-Та өөрийгөө Мексикт хэрхэн нөлөөлж байна гэж боддог вэ. Эсвэл нөлөөлөхгүй гэж бодож байна уу?

-Би өөрийгөө Мексик Улсад нөлөөлж байгаа гэж бодохгүй байна.

-Таны бодлоор мансууруулах бодис худалдаалагч нь буруутан уу, худалдан авагч нь буруутан уу?

-Хэрвээ мансууруулах бодисын хэрэглээ байхгүй байсан бол хэзээ ч хар тамхины наймаа үүсэхгүй. Хаана хэрэглээ байна тэнд худалдаа бий болдог.

-Та хүмүүст хар тамхи хэрэглэх хүсэл сонирхол төрүүлэх ямар нэгэн арга хэрэглэж байсан уу?

-Хүмүүс эхлээд зүгээр л ямар амттай бол хэрэглэх үед ямар мэдрэмж төрөх бол хэмээн сонирхдог. Харин нэг удаа хэрэглээд үзчихвэл дахин хэрэглэх хүсэл төрнө. Энэ мэтээр нэг л мэдэхэд донтогч болчихсон байдаг. Тиймээс надад ямар ч арга хэрэглэх шаардлага байхгүй.

-Танд мөрөөдөл бий юу?

-Мэдээж байгаа. Гэр бүлтэйгээ амьдрах л миний мөрөөдөл болоод байна даа.

-Та хүүхдүүдийнхээ ирээдүйг хэрхэн харж байна вэ?

-Маш сайхан гэгээлгээр төсөөлдөг.

-Та шоронгоос оргосноосоо хойш хэрхэн амьдарч байв?

-Үнэхээр аз жаргалтай байгаа. Хэдийгээр зугтааж, нуугдаж амьдарч байгаа ч эрх чөлөө гэдэг бол хамгийн үнэтэй, үгээр илэрхийлэхийн аргагүй зүйл.

-Та мансууруулах бодис хэрэглэдэг үү?

-Үгүй. Нэлээд олон жилийн өмнө хэрэглэж байсан ч донтох хэмжээнд хүртлээ хэрэглээгүй.

-Та хамгийн сүүлд оргохдоо эрх чөлөөний төлөө юу ч хийхэд бэлэн байсан уу?

-Би хэзээ ч бусдыг хохироохыг урьтал болгодоггүй. Намайг оргоход бурхан тусалсан.

-Танд Мексикийн ард түмэнд хандан хэлэх үг байна уу?

-Тантай уулзахыг зөвшөөрсөн гол шалтгаан маань “Би бол жирийн л хүн” гэдгээ хүмүүст харуулахыг хүссэн юм.