УБТЗ-ын Тээвэр зохион байгуулалтын алба үүсэж байгуулагдсаны 70 жилийн ойн нэрэмжит галт тэрэг аялууллаа. Тухайн галт тэрэг нь импортын ачаанаас суларч БНХАУ руу хоосон буцах чингэлгүүдийг нэг терминалд цуглуулан нэмүү өртөг шингэсэн бараа бүтээгдэхүүнтэй төрөл бүрийн экспортын ачаагаар бүрдүүлэн чингэлгийн буухиа галт тэрэг болгон аялуулсан юм. БНХАУ-ын төмөр замд хүлээлгэн өгөх энэхүү анхны тээврийг зохион байгуулсан нь Монгол Улсаас гарах их хэмжээний хоосон чингэлгүүдийг ачаатай болгон илгээж, төмөр замын тээврийн орлого ашгийг нэмэгдүүлээд зогсохгүй жижиг дунд үйлдвэрлэгчид болон экспортогчдыг дэмжиж буй чухал онцлогтой тээвэрлэлтийн анхны алхам болов. Тус тэрэг нь Улаанбаатар хотын Амгалан өртөөний Амгалан Ложистик терминалд цугласан ноос, өөхөн тос, самар, хивэг, рапс бүхий хөдөө аж ахуйн ачаатай 2049 тонн жинтэй таван тээвэр зуучлагчийн 10 орчим илгээгч аж ахуйн нэгжтэй, 70 ширхэг чингэлэгтэй, 70 вагоноос бүрдсэн 980 метр урттай, 3440 тонн жинтэй, Монгол Улсын хөдөө аж ахуйн бараа бүтээгдэхүүн бүхий чингэлгийн галт тэрэг.

УБТЗ ХНН жил бүр БНХАУ-ын Эрээн өртөөнд хоногт дунджаар 1.5-2.5 хоосон чингэлэг бүхий галт тэрэг хүлээлгэж өгдөг. Энэ нь, жилд дунджаар 65-70 мянган TEU хоосон чингэлгийг вагонд ачиж гаргадаг буюу маш их зардал мөнгө, цаг хугацаа зарцуулдаг. Өөрийн өртөгөө нөхөх боломжгүй тээвэр юм. Хэрэв тус галт тэргийг хоосон чингэлэгтэй аялуулсан бол УБТЗ-д 40887000 төгрөгийн орлого орох байсан. Харин экспортын бараа бүтээгдэхүүн бүхий ачаатай чингэлгийн галт тэрэг болгон аялуулснаар 98231000 төгрөгийн орлого олж, Замын санхүүд төвлөрүүлж буй орлогын хэмжээ 2.4 дахин нэмэгдэнэ. Мөн хоосноор 2016 тонн жинтэй явах байсан галт тэрэг ачаатай болгосноор 3440 тонн жинтэй болж, төмөр замын тээврийн чанарын үзүүлэлт 1.7 дахин нэмэгдэх юм.

Монгол Улсын экспортлогч компаниуд бараа бүтээгдэхүүнээ вагонд ачих терминалын хомсдолд орж ачилт, тээвэр удаашрах үйл явц гарч байсан. Энэ нь, хувийн хэвшлийн терминалууд гадаадын өндөр түрээс бүхий хоосон чингэлгүүдийг вагонд ачаад бараа бүтээгдэхүүнтэй чингэлгүүд ачигдаж чадахгүй үлдэх тохиолдол тулгарч байсан. Үүнийг УБТЗ ХНН-ийн Тээвэр зохион байгуулалтын алба соргогоор анзаарч илгээгч, зуучлагч нартай зөвлөгөөн зохион байгуулснаар ачаатай чингэлгүүдийг нэгээс хоёр терминалд төвлөрүүлэн чингэлгийн галт тэрэг болгон аялуулж байгаа нь улс орны хөгжилд чухал үүрэг гүйцэтгэхээс гадна  жижиг дунд үйлдвэрлэгч бизнес эрхлэгчдийг бодитоор дэмжсэн чухал алхам боллоо.

Манай улс руу ирэх импортын ачааны урсгалын 50 орчим хувь нь чингэлэгт тээвэрлэгдэн ирдэг. Ачаа ачиж ирсэн чингэлгүүдийн  95-98 хувь нь хоосноор буцаж илгээсэн газар руугаа явдаг. Ийнхүү хөдөө аж ахуйн бараа бүтээгдэхүүн бүхий анхны чингэлгийн галт тэргийг илгээсэн нь магадгүй ирээдүйд Монгол Улс нэмүү өртөг шингэсэн бараа бүтээгдэхүүн экспортлогч орон болоход энэ их хоосон чингэлгийн урсгалыг ашиглан дэлхийн өнцөг булан болгон руу ачаа бараагаа илгээх анхны замыг нээж байна гэж хэлж болно.