Нийгэм
2030 он гэхэд зам, тээврийн ослын хохирогчдын тоог 2 дахин бууруулах зорилт дэвшүүлжээ
НҮБ-аас зохион байгуулж “Аюулгүй байдлын төлөө үгээ хэлцгээе” замын хөдөлгөөний аюулгүй байдлыг хангах дэлхий нийтийг хамарсан аянд Монгол Улс нэгдлээ.
НҮБ-ын Ерөнхий нарийн бичгийн даргын Замын хөдөлгөөний аюулгүй байдлын асуудал хариуцсан тусгай элч Жан Тодт тус аяныг Монгол Улсад зохион байгуулахаар хүрэлцэн ирж, өчигдөр мэдээлэл хийлээ.
Тэрбээр “Дэлхийд зам, тээврийн ослын улмаас жил бүр 1.2 сая хүн амь насаа алддаг. Үүний 90 гаруй хувь нь хөгжиж буй орнуудад тохиолддог. Зам, тээврийн осол гарах үндсэн шалтгаан нь ихэвчлэн согтуугаар тээврийн хэрэгсэл жолоодох, хурд хэтрүүлэх, хэт ядарсан үедээ жолоо барих, анхаарал болгоомжгүй хандах, хамгаалах бүс, хүүхдийн зориулалтын суудал, хамгаалалтын малгай хэрэглэхгүй байх, замын хөдөлгөөний дүрэм
биелүүлээгүйгээс үүдэн гарч байна. Иймээс дэлхий нийтэд тулгамдсан энэхүү асуудлаар замын хөдөлгөөний аюулгүй байдлыг сурталчлах, таниулах зорилгоор “Аюулгүй байдлын төлөө үгээ хэлцгээе” уриан дор дэлхий нийтийг хамарсан аяныг эхлүүлээд байгаа”-г дурдлаа.
Тус аяны үр дүнд 2030 он гэхэд зам, тээврийн ослоос шалтгаалсан хохирогчдын тоог хоёр дахин бууруулах зорилго дэвшүүлж, хоёр жилийн хугацаанд буюу 2023-2025 онд дэлхийн 80 улсын 1000 хотыг хамруулахаар ажиллаж байна.
Энэхүү аяны хүрээнд дэлхийн болон үндэсний хэмжээний алдартнуудыг НҮБ-ын албан ёсны 6 хэл дээр замын хөдөлгөөний аюулгүй байдлын дүрэм, журмыг энгийн хялбараар болон үр ашигтайгаар сурталчлах, нутагшуулах давхар зорилготой юм гэж Зам, тээврийн хөгжлийн яамнаас мэдээллээ.
Нийгэм
Ханги боомтод экспортын шинэ гарц нэмэгдлээ
Уул уурхайн бүтээгдэхүүний экспортыг нэмэгдүүлэх зорилгоор Ханги эко логистик ХХК-ийн 100 хувийн хөрөнгө оруулалтаар “Олон төрөлт чингэлэг тээврийн ухаалаг систем нэвтрүүлэх төсөл” Ханги боомтод хэрэгжиж байна.
Тус төслийн хүрээнд 2024 оны 05 дугаар сарын 10-нд экспортын тээврийн үйл ажиллагааг эхлүүлсэн бөгөөд нийт 50 тээврийн хэрэгслээр нийт 5,911.56 тн нүүрсний экспорт хийгдлээ.
“Ханги олон төрөлт чингэлэг тээврийн терминал” нь Ханги боомтоос 1.4 км, БНХАУ-ын хилийн зурвасаас 900м, ӨМӨЗО-ны Мандал боомт дахь ачилт, буулгалтын талбайгаас 2.6 км зайд байрладаг бөгөөд нийт 33.5 га талбайд төмөр зам болон автомашины 3 орцтой, 8.5 км урт 3 салаа төмөр замтай, нийт 4500 орчим чингэлэг хадгалах тээвэрлэх хүчин чадалтай.
Цаашид төсөл бүрэн хэрэгжсэнээр AGV, дүүжин тээвэр, автомашин гэсэн нийт 5 гарцаар экспорт хийгдэнэ гэж ГЕГ-аас мэдээллээ.
Нийгэм
Хөдөлмөрийн баатар, Гавьяат тамирчин Э.Содномпилжээ Дэлхийн цомд түрүүллээ
Тайланд улсын Паттаяа хотод ᠋пара пауэрлифтингийн хэвтээ шахалтын Дэлхийн цомын аварга шалгаруулах тэмцээн тавдугаар сарын 5-11-ний өдрүүдэд болж байна.
Тэмцээнд Монгол Улсын гавьяат дасгалжуулагч, Үндэсний шигшээ багийн ахлах дасгалжуулагч Д.Баттулга, туслах дасгалжуулагч Б.Энхбаяр нарын удирдлага дор эрэгтэйчүүдийн 54 кг-ын жинд Д.Жигмэд, 65 кг-д А.Амартайван, 107 кг-д Паралимпын аварга, дэлхийн аварга, дэлхийн дээд амжилтыг эзэмшигч, Хөдөлмөрийн баатар, гавьяат тамирчин Э.Содномпилжээ эмэгтэйчүүдийн 86 кг-ын жинд Б.Уранжаргал нар хүч үзэж буйгаас 107 кг-ын жинд Энхбаярын Содномпилжээ цээжнээс 235 кг-ыг шахсанаар алтан медаль хүртэж, төрийн дууллаа эгшиглүүллээ.
Э.Содномпилжээгийн Дэлхийн цомын зургаа дахь түрүү болов. Энэ тэмцээнээс “Парис-2024” зуны паралимпын эрхийн оноо олгож байгаа ба паралимпын эрхийн сүүлийн тэмцээн Гүрж улсад зургадугаар сарын 20-26-нд болох юм. Тус тэмцээний дараа “Парис-2024” паралимпын эрх авсан тамирчдыг зарлах бөгөөд одоогийн байдлаар манай улсаас Э.Содномпилжээ “Парис-2024” паралимпын эрхийн оноонд хүрсэн байна гэж Биеийн тамир, спортын улсын хорооноос мэдээллээ.
Нийгэм
Зочлох үйлчилгээний салбарын ажилтнуудыг чадавхжуулах сургалтад хамрууллаа
Монгол Улсын Засгийн газраас 2023-2025 оныг “Монголд зочлох жил” болгон зарласантай холбогдуулан “Go Mongolia” уриан дор зочлох үйлчилгээний салбарын ажилтан, албан хаагчдын мэргэжлийн ур чадварыг дээшлүүлэх, үйлчилгээний чанар хүртээмжийг сайжруулах зорилгоор НЗДТГ, нийслэлийн Аялал жуулчлалын газар, “Экперт хоспиталити” ХХК зэрэг байгууллагууд хамтран зочлох үйлчилгээний сургалтыг тавдугаар сарын 6-9-ний өдрүүдэд зохион байгууллаа.
Сургалтыг БНСУ-ын Сэжун их сургуулийн Профессор Кю Сун Кан, И Ми Ён нар удирдан явуулсан бөгөөд зочлох үйлчилгээний салбарын 25 байгууллагын 140 гаруй удирдах болон үйлчилгээний ажилтнуудыг хамруулсан юм.
Энэхүү сургалтыг зохион байгуулснаар аялал жуулчлалын эдийн засгийн үр ашгийг нэмэгдүүлэх, зочлох үйлчилгээний салбарын хүний нөөцийн чадавхыг бэхжүүлэн, мэргэшсэн ажилтан, албан хаагчдын тоог нэмэгдүүлэх ач холбогдолтой гэдгийг зохион байгуулагчид онцолсон.
Сургалтыг удирдан явуулсан БНСУ-ын Сэжун их сургуулийн багш, профессор И Ми Ён болон зохион байгуулагчдын төлөөллийг НЗДТГ-ын дарга Л.Хосбаяр өнөөдөр хүлээн авч уулзлаа. Тэрбээр зочлох үйлчилгээний салбарын ажилтнуудыг чадавхжуулах сургалтыг амжилттай удирдан явуулсанд талархал илэрхийлж, үйлчилгээний салбарын хүний нөөцийг бэлтгэх, чадавхжуулахад хамтын ажиллагаагаа өргөжүүлэх хүсэлтэй байгаагаа хэлэв.
БНСУ-ын Сэжун их сургуулийн багш профессор И Ми Ён: Нийслэлийн Засаг дарга бөгөөд Улаанбаатар хотын Захирагч Х.Нямбаатар зочлох үйлчилгээний салбарын ажилтан, албан хаагчдыг мэргэшүүлэх, хүний нөөцийг бэлтгэхэд онцгойлон анхаарал хандуулж ажиллаж байгаа явдалд баяртай байна. Цаашид энэ салбарын боловсон хүчнийг бэлтгэх, чадавхжуулахад бидний хамтын ажиллагаа өргөжнө гэдэгт итгэлтэй байна гэв.