Улс төр

Бие даагчдыг дэмжих “Электорат”’ хөдөлгөөний II чуулган боллоо

Нийтэлсэн

6 жил өмнө

2019-05-24

Нийтэлч

УИХ-д мэдлэг, чадвартай, шударга, олон нийтийн дэмжлэгийг хүлээсэн хүмүүсийг гаргах зорилготой “Электорат”’ хөдөлгөөний II чуулган өчигдөр боллоо.

Энэхүү хөдөлгөөнийг өнгөрсөн гуравдугаар сарын 28-нд “Бие даан нэр дэвшигчдийн холбоо” нэрийн дор албан ёсоор байгуулж, хөдөлгөөний 60 гаруй гишүүн хамтын тунхаг бичигт гарын үсэг зурсан юм. Тус хөдөлгөөнийг Ерөнхий сайд асан Д.Содном, Сангийн сайд асан Э.Бямбажав, Гадаад явдлын яамны сайд асан Ц.Гомбосүрэн, УИХ-ын гишүүн, сайд асан С.Оюун, хамба лам Д.Чойжамц, Төрийн хошой соёрхолт, хөгжмийн зохиолч Н.Жанцанноров, нийтлэлч Б.Баабар нар санаачилжээ. Улмаар хөдөлгөөнд Монголын төр, нийгмийн болоод олны итгэлийг хүлээсэн соёл, урлагийн олон зүтгэлтэн нэгдсэн байна.

Энэхүү хөдөлгөөн нь УИХ-ын сонгуульд нэр дэвшүүлэх субъект биш бөгөөд 2020 оны УИХ-ын сонгуулийн 76 тойрогт өрсөлдөх, бие даан нэр дэвшиж болохуйц хүмүүсийг олон түмнээр бүтэн жилийн турш хэлэлцүүлэх юм. Улмаар бие даан нэр дэвшигчдийн дундаас олон түмний шалгуурт нийцсэн хэсгийг шалгаруулан дэмжих үүргийг тус хөдөлгөөн хүлээж буй.
Энэхүү хөдөлгөөний II чуулганаар үйл ажиллагааныхаа талаар мэдээлэл өгсний зэрэгцээ Олон нийтийн санаа бодлын судалгааны дүнг танилцуулсан юм. Уг судалгааг “Непко” судалгааны байгууллагаас түүврийн аргаар 1,500 иргэнийг хамруулан хийжээ. Энэ талаар судлаач Б.Болдбаатар “Бид өмнө нь энэ оны нэгдүгээр сард судалгаа хийсэн. Энэ сард хоёр дахь судалгаагаа хийлээ. Улсын хэмжээний судалгааг 1,200-1,600 хүнээс санал асуулга авах замаар хийдэг. Тиймээс бид судалгаандаа Улаанбаатар хот, Дархан-Уул, Хэнтий аймгийн 1,500 гаруй иргэнийг хамруулсан. Яагаад Хэнтий аймгийг онцолсон бэ гэвэл тэнд нэг сарын дараа нөхөн сонгууль болно.

Тиймээс сонгуулийн урьдчилсан хандлага ямар байгааг тандсан юм. Энэ сарын судалгааг өмнөхтэй нь харьцуулбал, улс төрийн нөхцөл байдлыг харьцангуй тогтворжиж байна гэсэн үнэлгээ гарч байна. Улс төрийн намын рейтингийн тухайд МАН-ынх өсөх хандлагатай гарсан.

Харин улстөрчдөөс рейтингээрээ Ерөнхий сайд У.Хүрэлсүх, Засгийн газрын Хэрэг эрхлэх газрын дарга Л.Оюун-Эрдэнэ нар тэргүүлж байна. Түүнчлэн бие даасан, боловсролтой шинэ улс төрчийг ард иргэд хүсэмжилж байна. Нэгдүгээр сард судалгаанд оролцсон иргэдийн 65 хувь нь ийм улстөрч шаардлагатай гэж байсан бол энэ удаа 61 хувь болж буурсан.

Гэхдээ иргэдийн ихэнх нь буюу 60 гаруй хувь нь бие даатдыг дэмжих бололцоотой гэсэн үг. Тухайлбал, Хэнтийн сонгуульд бие даасан хэн ч бай дэмжинэ гэж 20 гаруй хувь үзсэн байна. Энэ нь өмнөх сонгуулиудын үеийн судалгаатай харьцуулахад шинэлэгүзэгдэл юм. Түүнчлэн хоёр том улс төрийн намаас гадна парламентад суудалгүй намуудыгдэмжсэн хүмүүсийн тоо буурсан нь иргэд намаас залхаж байгаагийн илрэл болов уу” гэлээ.

Мөн энэ үеэр хөдөлгөөнийг санаач-лагчид болоод гишүүд байр сууриа илэрхийлж, чөлөөт хэлэлцүүлэг зохион байгуулав. Тухайлбал, нийтлэлч Б.Баабар “Хүмүүсийн улс төрийн намд итгэх итгэл алдарсан байна. Бүх намын дэмжлэг 30 хувиас илүү гарахгүй байна. 20 гаруй жилийн судалгаанаас үзэхэд хоёр том улс төрийн хүчний дэмжлэг 50 хувиас давдаг байсан. Хэзээ ч одоогийнх шиг бага байгаагүй. Энэ нь ард түмэн бие даасан шинэ хүмүүсийг дэмжиж байпаагийн илрэл” гэдгийг онцолж байлаа.

Мөн нийтлэлч Б.Цэнддоо “2020 оны сонгуульд олон бие даагч оролцохоор харагдаж байна. Энэ хүмүүсээс бид итгэл хүлээлгэсэн хүнийг сонгох ёстой. Хэрэв популист гараад ирвэл улс төрийг самраад л хаяна. Бид 2020 оны сонгуулиар нэр, бие цэвэр хүмүүс сонгогдоно гэдэгт итгэлгүй байна. Гэхдээ 2020 оны сонгуулийн үйл явц 2024 оны сонгуулийг шударга байлгах, шинэ намууд бүрэлдэж гарч ирэх тэр нөхцөлийг бий болгохын төлөө явж байна” гэсэн юм.

Харин Жавзандамба хутагт төвийн багш, гавж Д.Нямсамбуу “Энэ хөдөдлгөөнд би зүг чиг авах санаатай нэгдсэн. Улс эх орныхоо маргааш, ирээдүй хөгжлийн төлөө санаа зовж явдаг хүний хувьд эрх барьж байсан хүмүүс юу бодож, юу сэтгэж байгааг ойроос мэдэхийг хүссэн юм. Надтай ижилхэн зүг чиггүй болчихсон олон хүн байгаа байх. Шашны талаас үүнийг тайлбарлая гэвэл би мэдэхгүй байна. Бурхан шашинд тайлбар байхгүй байх. Харин бурхны шашин Монголд зөв сайн зүйлийг мэдээд нөлөө үзүүлж чадах байх гэж би итгэдэг” гэсэн юм.

Ийнхүү шударга бие даагчдыг олон түмэнтэй хамтран гаргаж ирснээр Монголын улстөрийн хямралыг даван туулах боломж нээгдэнэ гэж үзэж буй “Электорат” хөдөлгөөнийхөн хоёрдугаар чуулганаа өргөн хүрээтэй өрнүүллээ.

Дашрамд дурдахад, сонгуулийн дүн гарснаар “Электорат” үүргээ гүйцэтгэж дууссан гэж үзэх аж. Улмаар санал болпосны дагуу УИХ-д сонгогдон төрийн түшээ болсон хүмүүсийг эргэж нэгтгэх, тухайлсан бүлэглэл болгох, хариу нэхэн шахалт үзүүлэх зэргийг хөдөлгөөний зүгээс зохисгүй үйлдэл гэж үзэж буй.

Сэдвүүд:

Дэлгэрэнгүй ...

Сэтгэгдэл үлдээх

Улс төр

“Анхдугаар Үндсэн хуулийн мөн чанар, агуулга, ач холбогдол” сэдвээр улс орон даяар хичээл зааж байна

Нийтэлсэн

2 цаг өмнө

2024-11-25

Нийтэлч

24barimt

Монгол Улсын Их Хурал 2023 онд Бүгд Найрамдах Улсыг тунхаглаж, анхдугаар Үндсэн хууль баталсны 100 жилийн ойг тэмдэглэх тухай 64 дүгээр тогтоолыг баталсан билээ.

Уг тогтоолоор Үндсэн хуулиа эрхэмлэн дээдлэх үзэл санааг иргэдэд тайлбарлан таниулах ажлыг зохион байгуулахыг Ойг тэмдэглэн өнгөрүүлэх ажлыг зохион байгуулах Ажлын хэсэгт даалгасан юм.

Монгол Улсын Их Хурлын 2023 оны 64 дүгээр тогтоолыг хэрэгжүүлэх хүрээнд Монгол орон даяар 21 аймаг, нийслэлийн өмчийн бүх хэлбэрийн ерөнхий боловсролын сургуулийн 2024 оны 11 дүгээр сарын 25-ны өдрийн эхний цагийн хичээлийг “Анхдугаар Үндсэн хуулийн мөн чанар, агуулга, ач холбогдол” сэдвийн доор байгуулахаар шийдвэрлэсэн.

Энэхүү хичээлийг сурагчдад Үндсэн хуулийн ач холбогдол, Монгол Улсын үндсэн хууль, үндсэн хуульт ёсны хөгжлийг таниулж, тэдний үндсэн хууль, төрт ёсоо дээдлэх, эх оронч үзэл санааны төлөвшлийг дэмжих зорилгоор зохион байгуулах гэж байна. Улс орон даяар нэг зэрэг зохион байгуулах хичээлд ерөнхий боловсролын 885 сургуулийн 26.228 бүлгийн нийт 797.905 суралцагч хамрагдана.

Хичээл 2024 оны 11 дүгээр сарын 25-ны өдрийн 08.00 цагт эхлэх бөгөөд нийслэлийн 314, аймаг, сум, багийн 567, бусад 4 сургуулийн бага, дунд, ахлах ангийн сурагчид хамрагдах юм.

Бага ангийн сурагчдад заах хичээлийн агуулгад Үндсэн хуулийн тухай, Үндсэн хууль ба бидний эрх, эрх чөлөө, Үндсэн хууль ба бидний үүрэг гэсэн сэдэв багтсан бол, дунд ангийн сурагчидтай Үндсэн хууль гэж юу вэ гэсэн сэдвээр хэлэлцүүлэг өрнүүлэхээс гадна Монгол улсын Үндсэн хууль, түүний бүтэц, баталсан түүх, хүний эрх, эрх чөлөө, иргэний үндсэн ба журамт үүргийн талаар тайлбарлан таниулахаар хичээлийн агуулгад тусгасан байна.

Ахлах ангийн сурагчидтай Монгол Улсын Үндсэн хууль бидний амьдралд яагаад тийм чухал вэ сэдвээр ярилцан, Монгол Улсын тусгаар тогтнол, Төрийн дуулал, хэн нэгнээс үл хамааран өөрийн үзэл бодлоо илэрхийлэх эрх чөлөө хийгээд, Үндсэн хуулиар олгогдсон бусад эрхийн талаар хэлэлцэнэ хэмээн Улсын Их Хурлын Хэвлэл мэдээллийн газраас мэдээллээ.

Дэлгэрэнгүй ...

Улс төр

Боомтын сайд “Тавантолгой төмөр зам” ХХК-ийн үйл ажиллагаатай танилцав

Нийтэлсэн

2 цаг өмнө

2024-11-25

Нийтэлч

24barimt

“Тавантолгой төмөр зам” ХХК-ийн Гүйцэтгэх захирал Н.Будбаяр Гашуунсухайт өртөөнд өнгөрсөн амралтын өдрүүдээр УИХ-ын гишүүн, Монгол Улсын сайд, Боомтын сэргэлтийн үндэсний хорооны дарга Б.Тулга, УИХ-ын гишүүн Г.Очирбат, Хилийн боомтын захиргааны удирдлага болон ГЕГ, ХХЕГ, ЗТЯ-ны мэргэжилтнүүдийг хүлээн авч уулзлаа.

Уулзалтын үеэр Гашуунсухайт-Ганцмодны боомтын хилийг төмөр замаар холбох төслийн техник, эдийн засгийн судалгаа, өртөө болон замын байдлыг танилцуулав.

“Тавантолгой төмөр зам” ХХК нь одоогийн хүчин чадлаараа жилдээ 5-6 сая тонн нүүрсийг тээвэрлэж байна. Хилийн боомтыг холбосноор 30-40 сая тонн ачааг экспортолж, Монгол Улсын эдийн засгийн өсөлтөд тодорхой хэмжээгээр нөлөөлөх боломжтойг тус компанийн захирал Н.Будбаяр онцолсон юм.

Мөн нэн даруй шийдвэрлэх шаардлагатай асуудлыг УИХ-ын гишүүн, Боомтын сайд нарт уламжиллаа. Тодруулбал, хил холбох төсөлтэй холбоотой газрын асуудал, хилийн боомтод тусгайлсан гарцтай болох зэргийг шийдвэрлэх шаардлагатайг тэрбээр хэлсэн юм.

Монгол Улсын Засгийн газраас хэрэгжүүлж буй 14 мега төслийн нэгдүгээрт эрэмбэлэгдсэн, эдийн засгийн үр өгөөжтэй чухал төсөл тул хил холболтын асуудалд өндөр ач холбогдол өгч буйг УИХ-ын гишүүн, Монгол Улсын сайд Б.Тулга онцоллоо.

Тэрбээр хэлэхдээ “Тавантолгой төмөр зам” ХХК төмөр замын бүтээн байгуулалтыг богино хугацаанд хийж, байнгын үйл ажилдагаанд бэлэн болсон байна. Гашуун-сухайт-Ганцмодны боомтыг холбосноор нүүрсний экспорт нэмэгдүүлэхэд тус компани чухал үүрэг гүйцэтгэх юм” гэв гэж “Тавантолгой төмөр зам” ХХК-иас мэдээллээ.

Дэлгэрэнгүй ...

Улс төр

Дата, өгөгдлийн бие даасан байдлыг бүрдүүлнэ

Нийтэлсэн

3 өдөр өмнө

2024-11-22

Нийтэлч

24barimt

Цахим хөгжил, инновац, харилцаа холбооны сайд Ц.Баатархүү Канад Улсаас Монгол Улсад суугаа Онц бөгөөд Бүрэн эрхт Элчин сайд хатагтай Сандра Шуфани болон Канадын ГХЯ-ны Энэтхэг-Номхон далайн бүс нутгийг хариуцсан худалдааны Ерөнхий төлөөлөгч Пол Топпил, Blackberry компанийн төлөөлөл Мааз Ясин нарыг хүлээн авч уулзлаа.

Цахим хөгжил, инновац, харилцаа холбооны сайд Ц.Баатархүү “Монгол Улсын Засгийн газрын 2024–2028 оны үйл ажиллагааны хөтөлбөрт хиймэл оюун, их өгөгдөл зэрэг дэвшилтэт технологийг бусад салбарт нэвтрүүлэх, инновац, гарааны бизнес эрхлэгчдийг дэмжих, хүний нөөцийг чадавхжуулах зэрэг үндэсний хэмжээний томоохон ач холбогдолтой арга хэмжээ, төсөл хөтөлбөрүүдийг хэрэгжүүлэхээр тусгасан. Мөн Кибер аюулгүй байдал, цахим хөгжилд ихэд анхаарч, эрсдэлийн түвшнийг тодорхойлохоор олон байгууллагатай хамтран ажиллаж байна. Мэдээллийн технологийн хүний нөөцийг чадавхжуулах шаардлага их байгаа тул кибер аюулгүй байдлын чиглэлээр мэргэжилтэн бэлтгэхэд Канадын их, дээд сургуулиудтай хамтрах, хамтарсан хөтөлбөрийг МУИС, ШУТИС дээр түшиглэн байгуулах чиглэлээр хамтран ажиллахыг хүсэж байна. Түүнчлэн цахим эдийн засгийг хөгжүүлэхэд анхаарч, Мэдээллийн технологийн үйлдвэрлэл, инновацид түшиглэсэн бараа бүтээгдэхүүнийг экспортлох нөхцөлийг бүрдүүлж, УИХ-аас хууль баталсан. Цаашид энэ салбарт хамгийн ээлтэй улс болохыг зорьж байна. 2027 онд Үндэсний хиймэл дагуулаа хөөргөж, сансрын эдийн засгийг хөгжүүлэх амбицтай байна. Мөн дрон туршилтын бүс байгуулах бэлтгэл ажилдаа орсон” хэмээн ярилаа.

Талууд хоёр улсын программ хангамж үйлдвэрлэгч хоорондын хамтын ажиллагааг өргөжүүлэх, ялангуяа үүлэн тооцоолол чиглэлээр хамтран ажиллах сонирхолтой байгаагаа илэрхийлэв. Хиймэл оюун, их өгөгдөл, машин сургалт гэх мэт орчин үеийн технологийг төрийн үйлчилгээнд ашиглах талаар xамтарсан төсөл хэрэгжүүлэх боломжийг судлан үзэхээ сайд Ц.Баатархүү илэрхийлэв.

Канадын ГХЯ-ны Энэтхэг-Номхон далайн бүс нутгийг хариуцсан худалдааны Ерөнхий төлөөлөгч Пол Топпил “Канадын Засгийн газраас хоёр жилийн өмнө Энэтхэг, Номхон далайн бүс нутаг руу чиглэсэн стратегиа зарласан. Энэ хүрээнд тус бүс нутаг дахь улсуудтай харилцаагаа өргөжүүлэхийг хүсэж байна. Цахим аюулгүй байдал ардчилсан улсуудын хувьд олон сорилтыг дагуулж байна. Энэ чиглэлд Монгол Улсын Засгийн газартай хамтарч ажиллахдаа таатай байх болно. Мөн манай улсын Blackberry компани энэ чиглэлд найдвартай, дэвшилтэт технологийг Засгийн газруудад санал болгож байна” гэж онцоллоо.

Канад Улс нь мэдээллийн технологийн салбарт үндэстэн дамнасан компаниуд болон үндэсний хэмжээний олон компаниудтай. Тэдгээр компаниудыг дэмжин хөгжүүлэх чиглэлээр арвин туршлагатай аж.

“Blackberry” компанийн төлөөлөгч Мааз Ясин “Blackberry компани аюулгүй харилцаа холбоо, цахим аюулгүй байдлын чиглэлд анхаарч ажиллаж байна. Бизнесийнхээ үйл ажиллагааг цахим аюулгүй байдлыг хангахад чиглүүлж, дэвшилтэт технологийг хөгжүүлсэн. Энэхүү технологийг АНУ, GREAT 7, НАТО-тай хамтран ажиллаж байна. Улмаар Азийн цахим хөгжлийг түүчээлэгч улсуудтай хамтрахыг зорьж байна. Ингэхдээ Засгийн газруудад дата мэдээллийн бие даасан байдлыг санал болгож байгаа юм” гэж ярилаа гэж Цахим хөгжил, инновац, харилцаа холбооны яамнаас мэдээллээ.

Дэлгэрэнгүй ...